2 Vimyene 15 - Livulu lya Shukulu Kalunga

Mwene Uziya wa mu Yunda

¹ Mu mwaka wamumakumi avali na itanu na ivali omo Mwene Yelovowame Wamucivali wapwile mwene wa mu Isalele. Co Uziya muna Amaziya wapwile mwene wa mu Yunda

² omo wakele na myaka likumi na itanu na umo, co washwanene mu Yelusalema myaka makumi atanu na myaka ivali. Vaina vapwile Njekoliya wa ku Yelusalema.

³ Ikeye wakavangeyeye vilinga vya ishe, co ikeye walingile vije vyavwaelelesele Shukulu Kalunga.

⁴ Oloni kanyongesele mitambela ije vakele nakulemesela vaje vaka-kujeneka kukulaela. Co vanu vakele nakukombelelako vin̄ombelo nakwenyekelako insense.

⁵ Co Shukulu Kalunga watumine mushongo wa mbumba ali Uziya, wakele nawo mukuyoya kwendi kwoshe. Wakele mu njuvo yendi endi lika, co wecelele vipangi vyoshe, oloni munendi Yotame washwanene lifuti.

⁶ Vyuma vyoshe vije vyalingile Uziya vavisoneka mu Livulu lya Mizimbu ya Vimyene va mu Yunda.

⁷ Uziya watsile, co vamutsindile mu vimbumbo vya vumwene mu Nganda ya Ndaviti, co munendi Yotame wamushwanene kupwa mwene.

Mwene Zekaliya wa mu Isalele

⁸ Mu mwaka wamumakumi atatu na itanu na itatu omo Uziya wapwile mwene wa mu Yunda, co Zekaliya muna Yelovowame Wamucivali wapwile mwene wa mu Isalele, washwanene mu Samaliya vingonde vitanu na imo.

⁹ Ikeye, wafwile ngwe vaje vaashwanene a litanda, walingile vuvi ku mesho a Shukulu Kalunga. Wakavangeyeye vilinga vyavivi vya Mwene Yelovowame muna Nembate, uje watwamenenene Isalele mu vuvi.

¹⁰ Shalume muna Njambeshe watengulukilile Mwene Zekaliya nakumulwisa, co wamutsiilile ku Imbelyame, co wamushwanene kupwa mwene.

¹¹ Vyuma vyoshe vije vyalingile Zekaliya vavisoneka mu Livulu lya Mizimbu ya Vimyene va mu Isalele.

¹² Ngecivene, vashulisile cikulaeso cije calingile Shukulu Kalunga kuli Mwene Yehu ngwendi, “Vatekulwila vove vakapwa vimyene va mu Isalele kweta ku cisemwa camuciwana.”

Mwene Shalume wa mu Isalele

¹³ Mu mwaka wamumakumi atatu na itanu na iwana omo Uziya wapwile mwene wa mu Yunda, Shalume muna Njambeshe wapwile mwene wa mu Isalele, washwanene mu Samaliya ngonde imolika.

¹⁴ Menaheme muna Ngandi watundile ku Tileza waile ku Samaliya, watsiile Shalume, co wamushwanene a litanda kupwa mwene.

¹⁵ Vyuma vyoshe vije vyalingile Shalume, amo na matumbe endi akulwisa Zekaliya, vavisoneka mu Livulu lya Mizimbu ya Vimyene va mu Isalele.

¹⁶ Omo Menaheme watundile ku Tileza, wanyongesele nganda ya Tapuwa, na voshe vakelemo, na membo aje azengelekeleko, omwo ije nganda kuyaliitile kuli ikeye. Co watavwile memo a vanakazi voshe vaje vakele na tufumba.

Mwene Menaheme wa mu Isalele

¹⁷ Mu mwaka wamumakumi atatu na iwana omo Uziya wapwile mwene wa mu Yunda, Menaheme muna Ngandi wapwile mwene wa mu Isalele, washwanene mu Samaliya myaka likumi.

¹⁸ Menaheme walingile vuvi ku mesho a Shukulu Kalunga, co wakavangeyeye vuvi vwa Mwene Yelovowame muna Nembate, uje watwamenenene Isalele mu vuvi kutwala na a litangwa lya kutsa kwendi.

¹⁹ Tingelate Pilesele, mwene wa Asilya walwisile Isalele, co Menaheme wamwanene makilo akupwa 34,000 a mavundungulu a siliva ngeci amukwase kukolesa vumwene vwendi mu lifuti.

²⁰ Menaheme wawanene vimbongo evi kuli vanu vaje vapwile vaka-kufuka mu Isalele, akusindiya munu na munu kweca mavundungulu a siliva makumi atanu. Ngecivene, Tingelate Pilesele welukile ku lifuti lyendi.

²¹ Vyuma vyoshe vije vyalingile Menaheme vavisoneka mu Livulu lya Mizimbu ya Vimyene va mu Isalele.

²² Menaheme watsile, co vamutsindile, co munendi Pekahiya wamushwanene kupwa mwene.

Mwene Pekahiya wa mu Isalele

²³ Mu mwaka wamumakumi atanu omo Uziya wapwile mwene wa mu Yunda, Pekahiya muna Menaheme wapwile mwene wa mu Isalele, washwanene mu Samaliya myaka ivali.

²⁴ Ikeye walingile vuvi ku mesho a Shukulu Kalunga, wakavangeyeye vilinga vyavivi vya Mwene Yelovowame muna Nembate, uje watwamenenene Isalele mu vuvi.

²⁵ Co mwata umo wa mashwalale va Pekahiya, lizina lyendi Peka muna Lemaliya, watumbile vutumbe amo na vanalume makumi atanu va ku Ngilyande, co vatsiilile Pekahiya mu lipela mukati ka cimpaka mu Samaliya, co Peka wamushwanene kupwa mwene.

²⁶ Vyuma vyoshe vije vyalingile Pekahiya vavisoneka mu Livulu lya Mizimbu ya Vimyene va mu Isalele.

Mwene Peka wa mu Isalele

²⁷ Mu mwaka wamumakumi atanu na ivali omo Uziya wapwile mwene wa mu Yunda, Peka muna Lemaliya wapwile mwene wa mu Isalele, washwanene mu Samaliya myaka makumi avali.

²⁸ Peka walingile vuvi ku mesho a Shukulu Kalunga, wakavangeyeye vilinga vya Mwene Yelovowame muna Nembate, uje watwamenenene Isalele mu vuvi.

²⁹ Omo Peka wapwile mwene wa mu Isalele, Tingelate Pilesele, mwene wa Asilya wafungulwile vinganda vya Injone na Avele Mbete Maka na Njanowa na Kendeshe na Hazole na mafuti a Ngilyande na Ngalileya na Nafetali, co watwalele vinzinda ku Asilya.

³⁰ Mu mwaka wamumakumi avali omo Yotame muna Uziya wapwile mwene wa mu Yunda, Hosheya muna Elahe watumbile vutumbe vwakulwisa Mwene Peka, co wamutsiile, wamushwanene kupwa mwene.

³¹ Vyuma vyoshe vije vyalingile Peka vavisoneka mu Livulu lya Mizimbu ya Vimyene va mu Isalele.

Mwene Yotame wa mu Yunda

³² Mu mwaka wamucivali omo Peka muna Lemaliya wapwile mwene wa mu Isalele, Yotame muna Uziya wapwile mwene wa mu Yunda

³³ omo wakele na myaka makumi avali na itanu, washwanene mu Yelusalema myaka likumi na itanu na umo. Vaina vapwile Yelusha, muna Zandoke.

³⁴ Yotame wakavangeyeye vilinga vya ishe Uziya, co walingile vije vyavwaelelesele Shukulu Kalunga.

³⁵ Oloni katundisile ije mitambela vakele nakulemesela vaje vaka-kujeneka kukulaela, co vanu vakele nakukombelelako vin̄ombelo nakwenyekelako insense. Yotame ikeye watungile Cikolo ca ku Kunto ca ku Njuvo ya Shukulu Kalunga.

³⁶ Vyuma vyoshe vije vyalingile Yotame vavisoneka mu Livulu lya Mizimbu ya Vimyene va mu Yunda.

³⁷ Co yapwile simbu yendi yakushwana omo Shukulu Kalunga watumine Mwene Lezine wa Silya na Mwene Peka wa mu Isalele kushangumuka kulwisa Yunda.

³⁸ Yotame watsile, co vamutsindile mu vimbumbo vya vumwene mu Nganda ya Ndaviti, co munendi Ahaze wamushwanene kupwa mwene.