2 Vimyene 14 - Livulu lya Shukulu Kalunga

Mwene Amaziya wa mu Yunda

¹ Mu mwaka wamucivali omo Yehowashe muna Njehoahaze wapwile mwene wa mu Isalele, co Amaziya muna Yowashe wapwile mwene wa mu Yunda,

² omo wakele na myaka makumi avali na myaka itanu, washwanene mu Yelusalema myaka makumi avali na myaka itanu na iwana. Vaina vapwile Njehoyandine wa ku Yelusalema.

³ Walingile vije vyavwaelelesele Shukulu Kalunga, nameme ikeye kafwile ngwe kukulwila yendi Mwene Ndaviti embwe, oloni walingile ngwe muje mwalingile Yowashe.

⁴ Katundisile ije mitambela vakele nakulemesela vaje vaka-kujeneka kukulaela, co vanu vakele nakukombelelako vin̄ombelo nakwenyekelako insense.

⁵ Omo vumwene vwa Amaziya vwakolele na nzili, co watsiile vamyata vaje vatsiile ishe, Mwene Yowashe.

⁶ Nameme ngoco, katsiile vana vavo, oloni wakavele vije vyashikile Shukulu Kalunga mu Lishiko lya Mosesa ngwendi, “Visemi kuvapandele kutsila milonga ije ivanalingi vana vavo embwe, na vana lalo kuvapandele kutsila milonga ije ivanalingi visemi vavo embwe, oloni munu napande kutsila mulonga wanalingi ikeye vavenya.”

⁷ Amaziya watsiile mashwalale va Endome 10,000 mu Cana ca Mwongwa, co wafungulwile nganda ya Sela mu nzita, co wailukile lizina ngwendi Njoketele, lizina eli na lelo lino kulicili.

⁸ Asinoni Amaziya watumine miluwa kuli Mwene Yehowashe wa mu Isalele, nakumushongangeya ngeci valwe nzita.

⁹ Oloni Mwene Yehowashe wamukumbulwile ngwendi, “A simbu imo muti wa mambimbo uje wakele a Minkinda ya Lembanone, watumine lijwi ku muti wa kendale ngwawo, ‘Tava munove ngeci amwambate munange.’ Co kwezile kasitu wakulyatangelele uje muti wa mambimbo.

¹⁰ Ololo yove Amaziya, unafungulula vaEndome, co uli na kulyalesa. Wapwisamo lutsimo lwove, co tumbama kwimbo lyove. Omwo vikajo ulishakela n̄ole ije ikanena tuyando kuli yove na kuli vanu vove?”

¹¹ Oloni Amaziya kamutolililile, ngecivene, Mwene Yehowashe wakatukile na vanu vendi, co wamulwisilile ku Mbete Shemeshe mu Yunda.

¹² Mbunga ya Mashwalale va Amaziya vavafungulwile, co vatewelele ku membo avo.

¹³ Yehowashe wakwatele Amaziya kumupwisa cinzinda, co waile ku Yelusalema, wakasiwile civumbe ca nganda kutunda ku Cikolo ca Efalime nakweta ku Cikolo ca ku Mbango, nunda ya mamita akupwa 200.

¹⁴ Co wambatele siliva na ngolinde yoshe ije yawanene, na vivala vyoshe vya mu Njuvo ya Shukulu Kalunga na vufuko vwoshe vwa mu lipela, wavitwalele ku Samaliya. Co ikeye lalo waile amo na vinzinda vamo.

¹⁵ Vyuma vyoshe vije vyalingile Yehowashe, amo na vilinga vyendi vyakusimpa mu nzita yakulwisa Mwene Amaziya wa mu Yunda, vavisoneka mu Livulu lya Mizimbu ya Vimyene va mu Isalele.

¹⁶ Yehowashe watsile, co vamutsindile mu vimbumbo vya vumwene mu Samaliya, co munendi Yelovowame Wamucivali wamushwanene kupwa mwene.

Kutsa kwa Mwene Amaziya wa mu Yunda

¹⁷ Mwene Amaziya wa mu Yunda wayoyele myaka likumi na itanu omo Mwene Yehowashe wa mu Isalele natsi laja.

¹⁸ Vyuma vyoshe vije vyalingile Amaziya vavisoneka mu Livulu lya Mizimbu ya Vimyene va mu Yunda.

¹⁹ Co mu Yelusalema mwakele vutumbe vwakutsiya Amaziya, ngecivene, watewelele ku nganda ya Lakishe, oloni vitozi vendi vamukavele, co vamutsiilile kuje vene.

²⁰ Ngecivene, muvila wendi vawilwisile ku Yelusalema a kavalu, vamutsindile mu vimbumbo vya vumwene mu Nganda ya Ndaviti.

²¹ Co vanu va mu Yunda vashwanesele munendi Uziya kupwa mwene, ikeye wakele na myaka likumi na itanu na umo.

²² Co Uziya walwisile Elate nakuyitungulula omo ishe watsile.

Mwene Yelovowame Wamucivali wa mu Isalele

²³ Mu mwaka wamulikumi na itanu omo Amaziya muna Yowashe wapwile mwene wa mu Yunda, co Yelovowame muna Yehowashe wapwile mwene wa mu Isalele, washwanene mu Samaliya myaka makumi awana na mwaka umo.

²⁴ Ikeye walingile vuvi ku mesho a Shukulu Kalunga, co wakavangeyeye vilinga vyavivi vya Mwene Yelovowame muna Nembate uje yashwanene, uje watwamenenene Isalele mu vuvi.

²⁵ Ikeye welwisile mitambela yoshe ije yapwile ya Isalele, kutunda ku Ngila ya Hamate ku kunto kweta na ku Lishali lya Mema a kutsa ku mbwela. Evi vikevyo vyakulaesele Shukulu Kalunga, Njambi ya Isalele, ali ngamba yendi Yona muka-kwimanena muna Amitai wa ku Ngate Hefele.

²⁶ Shukulu Kalunga wamwene tuyando twakukomokesa twa vaIsalele, co kukwakele lalo weka wakuvakwasa.

²⁷ Oloni kucapwile cizango ca Shukulu Kalunga kunyongesa Isalele ku myaka yoshe embwe, ngecivene, wavapatwile ali Mwene Yelovowame Wamucivali.

²⁸ Vyuma vyoshe vije vyalingile Yelovowame Wamucivali, amo na vilinga vyendi vyakusimpa mu vinzita, na muje mwelwisilile Ndamasiku na Hamate ku Yunda, vyoshe vavisoneka mu Livulu lya Mizimbu ya Vimyene va mu Isalele.

²⁹ Yelovowame watsile, co vamutsindile mu vimbumbo vya vumwene, co munendi Zekaliya wamushwanene kupwa mwene.