2 Vimyene 13 - Livulu lya Shukulu Kalunga

Mwene Njehoahaze wa mu Isalele

¹ Mu mwaka wamumakumi avali na itatu wakushwana kwa Yowashe muna Ahaziya kupwa mwene wa mu Yunda, Njehoahaze muna Yehu wapwile mwene wa mu Isalele, co washwanene mu Samaliya myaka likumi na itanu na ivali.

² Ngwe mwalingile Mwene Yelovowame uje washwanene akulivanga, na ikeye lalo walingile vuvi ku mesho a Shukulu Kalunga, co watwamenenene Isalele mu vuvi, kecelele vingila vyendi vyavivi.

³ Ngecivene, Shukulu Kalunga waluvalele na Isalele, co watavele Mwene Hazayele wa ku Silya na munendi Mbenehandande kufungulula Isalele simbu ku simbu.

⁴ Asinoni Njehoahaze walombelele kuli Shukulu Kalunga, co Shukulu Kalunga, omwo wamwene vukalu vwa mwene wa ku Silya omo wakele nakuyandesa vaIsalele, co wakumbulwile lilombelo lyendi.

⁵ Shukulu Kalunga watuminine Isalele ntwama uje wavapatwile kuli vaSilya, co vaIsalele vakele mu kwoloka, ngwe muje muvakele myaka ya kunima.

⁶ Oloni nameme ngoco kuvecelele vuvi vuje Mwene Yelovowame watwamenenene navwo Isalele, oloni vatwaleleo kulinga vuvi, na kamponya ka Ashela njambi wa munakazi kasalele mu Samaliya.

⁷ Njehoahaze kakele na mashwalale vasaleleo kuvanga lika vaka-kulonda a tuvalu makumi atanu, na matemba likumi, na vanalume 10,000 vaka-kwenda a mendi, omwo mwene wa Silya wanyongesele vakwavo voshe, wavalyatangelele ngwe likungu.

⁸ Vyuma vyeka vije vyalingile Njehoahaze na vilinga vyendi vyakunyanyama vavisoneka mu Livulu lya Mizimbu ya Vimyene va mu Isalele.

⁹ Ikeye watsile, co vamutsindile mu Samaliya, co munendi Yehowashe wamushwanene kupwa mwene.

Mwene Yehowashe wa mu Isalele

¹⁰ Mu mwaka wamumakumi atatu na itanu na ivali wakushwana kwa Mwene Yowashe wa mu Yunda, Yehowashe muna Njehoahaze wapwile mwene wa mu Isalele, co washwanene mu Samaliya myaka likumi na itanu na umo.

¹¹ Na ikeye lalo walingile vuvi ku mesho a Shukulu Kalunga, wakavele cimweso cacivi ca Mwene Yelovowame, uje watwamenenene Isalele nakuvakovelesa mu vuvi.

¹² Vyuma vyeka vije vyalingile Yehowashe, amo na vilinga vyendi vyakusimpa mu nzita yakulwisa Mwene Amaziya wa mu Yunda, vavisoneka mu Livulu lya Mizimbu ya Vimyene va mu Isalele.

¹³ Yehowashe watsile, co vamutsindile mu vimbumbo vya vumwene mu Samaliya, munendi Yelovowame Wamucivali wamushwanene kupwa mwene.

Kutsa kwa Elisha

¹⁴ Elisha muka-kwimanena wavinjile mushongo wakama, co omo wakele kuyehi na kutsa, Mwene Yehowashe wa mu Isalele wezile nakumumona. Walilile ngwendi, “Tate, tate! Yove wapwile muka-kwimanena wa nzili kutuvakana mashwalale voshe va Isalele!”

¹⁵ Elisha wamushikile ngwendi, “Ambata vuta vwa lusipa na mikili.” Yehowashe wavinonele,

¹⁶ co Elisha wamulekele kwasha mukili. Co mwene walingile ngacije, Elisha wakambekele mavoko endi a mavoko a mwene.

¹⁷ Co Elisha wendekele ngwendi, “Shokolola njanena ije inakenge ku Silya,” co mwene washokolwele njanena ije yakengele ku Silya. Elisha washikile ngwendi, “Asha mukili.” Aje vene mwene washele mukili, co muka-kwimanena wendekele ngwendi, “Yove vene unapu mukili wa Shukulu Kalunga wakuhyana nawo Silya. Ukalwisa vaSilya ku Afeke noo unavafungulula.”

¹⁸ Asinoni Elisha walekele mwene kwambata mikili ikwavo nakuyashanga mu livu. Co mwene wayashangele mu livu visimbu vitatu, co walikelele.

¹⁹ Eci caluvalesele Elisha, co wendekele kuli mwene ngwendi, “Nga washele mikili mu livu visimbu vitanu nambe vitanu na imo, nga unahyana vaSilya, oloni ololo ukavahyana lika visimbu vitatu.”

²⁰ Elisha watsile, co vamutsindile. Co a mwaka na mwaka vimbunga vya vaMowavi vakele nakwija mukulwisa Isalele.

²¹ A simbu imo omo vanu vaile nakutsinda mutsi, co vamwene mbunga imo ya vaMowavi, co vaje vanu vombilile cije mu mbumbo ya Elisha, co vatewele. Vwasi-vwasi cije civimbi omo cakambolele ku vitsiya vya Elisha, co uje munalume wendukile nakwimana.

Nzita akati ka Isalele na Silya

²² Mwene Hazayele wa Silya wayandesele manene vaIsalele a simbu yoshe yakushwana kwa Njehoahaze,

²³ oloni Shukulu Kalunga wakele na ngozi na mema ku mbunge ali vakevo. Ikeye kavecelele ngeci vavanyongese embwe, oloni wavakwasele omwo ya cikumiiyo cendi kuli Avilahama na Isake na Yakomba. Ikeye kevalele vanu vendi embwe.

²⁴ A kutsa kwa Mwene Hazayele wa Silya, munendi Mbenehandande wamushwanene kupwa mwene.

²⁵ Mwene Yehowashe wa mu Isalele wafungulwile Mbenehandande visimbu vitatu, co watambwile lalo vinganda vije vyatambwile Mbenehandande a simbu yakushwana kwa Njehoahaze, ishe ya Yehowashe.