2 Vimyene 11 - Livulu lya Shukulu Kalunga

Vamwene Ataliya wa mu Yunda

¹ Omo Ataliya vaina ya Mwene Ahaziya wazivile a kutsa kwa munendi, co washikile ngeci vatsiye vanu voshe va ku naanga ya vumwene.

² Oloni Yowashe muna Ahaziya ikeye lika waputumukileo. Vashakele kumutsiya ngwe muvatsiile vakwavo, oloni vamwovwele kuli vaten̄azi yendi Njehoshemba, muna Mwene Njeholame, co lalo wapwile ndokazi ya Ahaziya. Wamutwalele amolika na ndezi yendi, kukavashweka ku mulili wa Njuvo ya Shukulu Kalunga kuvatewesa kuli Ataliya, ngecivene, kuvamutsiile.

³ Njehoshemba walelele uje mwanike myaka itanu na umo, wamushwekele nakumunyungila mu Njuvo ya Shukulu Kalunga, a simbu ije omo Ataliya wapwile vamwene.

⁴ Oloni mu mwaka wamucitanu na ivali Yehoyanda muka-kukombelela wasanene vantwama vaje vanyungile mwene na vaje vanyungile lipela, wavalekele ngeci vaije ku Njuvo ya Shukulu Kalunga, co walikumiiye cikumiiyo navo nakuvasingisa mu Njuvo ya Shukulu Kalunga a vije vyayongwele kulinga. Co wavamwesele Yowashe muna Mwene Ahaziya,

⁵ co wavashikile ngwendi, “Omo mwija ku vipangi a Litangwa Lyakuhwima, litambelo lyamucitatu lya vamo veni vanyunge lipela,

⁶ na litambelo likwavo lyamucitatu vemane nakunyunga ku cikolo ca Sule, co litambelo likwavo lyamucitatu vemane nakunyunga ku cikolo ca kunima ya vaka-kunyunga.

⁷ Co vije vimbunga vivali vya vaka-kunyunga vaje vaya nakuhwima a Litangwa Lyakuhwima vemane ku Njuvo ya Shukulu Kalunga nakunyunga mwene.

⁸ Munapande kunyunga Mwene Yowashe na mikwale yakushomwena cimweja, co mukale amo nendi kwoshe kuje kwaya. Woshe uje amishwenya munapande kumutsiya.”

⁹ Co vaje vamyata vononokele mashiko a Yehoyanda, vanenele vanu vavo kuli ikeye, vaje vaile nakuhwima a Litangwa Lyakuhwima na vaje vaile ku vipangi a litangwa lije vene.

¹⁰ Co waanene vaje vamyata makunga, na vintelo vije vyapwile vya Mwene Ndaviti vije vivanyungilile mu Njuvo ya Shukulu Kalunga,

¹¹ co waakele vaje vanalume vakele na mikwale mu mitambela yoshe kuzengeleka Njuvo ya Shukulu Kalunga, nakunyunga mwene.

¹² Yehoyanda watwalele Yowashe anja, wamuzikile cilongo ku mutwe wendi, co wamwanene livulu lya mashiko a vumwene. Asinoni vavwavesele Yowashe mazi nakumutumbula mwene. Co vanu vakandelelele nakutambeka ngwavo, “Mwene ayoye myaka yoshe!”

¹³ Co Vamwene Ataliya wazivile muyoyo uje valingile vaka-kunyunga na vanu, washatukilile ku Njuvo ya Shukulu Kalunga kuje kwakungulukilile mbunga ya vanu.

¹⁴ Co wamwene mwene wamuhwa nemana ku manda ku cikolo ca Njuvo ya Shukulu Kalunga, ngwe ku futisi yavo. Vamyata na vaka-kwimba malupembo vamuzengelekele, co vanu voshe vatambekele nakujolela nakwimba malupembo. Ataliya watavwile vuzalo vwendi mukuviilila, co watambekele ngwendi, “Vungungu! Vungungu!”

¹⁵ Yehoyanda kashakele ngeci Ataliya vamutsiile ku mwela wa Njuvo ya Shukulu Kalunga embwe, ngecivene, washikile vamyata va mashwalale ngwendi, “Mutwaleni anja oku mumwitisa mukati ka mikana ya vaka-kunyunga, co woshe amwamena mutsiyeni.”

¹⁶ Vamukwatele, co vamutwalele ku lipela, co vamutsiilile ku Cikolo ca Tuvalu.

Yehoyanda atengulula vyuma

¹⁷ Yehoyanda wakolesele cikumiiyo akati ka Shukulu Kalunga na mwene amo na vanu ngeci vapwe vanu va Shukulu Kalunga, co lalo walikumiiye cikumiiyo akati ka mwene na vanu.

¹⁸ Asinoni vanu vaile ku njuvo ya Mbale nakuyisiwula, vashandwele mitula, na tumponya, co vatsiilile Matane, muka-kukombelela wa Mbale, kulutwe lwa mitula. Co Yehoyanda waakele vaka-kunyunga ku Njuvo ya Shukulu Kalunga,

¹⁹ asinoni ikeye na vamyata na vaka-kunyunga mwene na vaka-kunyunga lipela, vasindikiiye mwene kutunda ku Njuvo ya Shukulu Kalunga kuya ku lipela, co vanu voshe vavakavele. Co Yowashe wakovelelele ku Cikolo ca Vaka-kunyunga, co watumbamene a litanda.

²⁰ Vanu voshe vavwaelelele, mu nganda mwolokele kuluu, omwo Ataliya vanamutsii laja mu lipela.

²¹ Yowashe wapwile mwene wa mu Yunda omo wakele na myaka itanu na ivali.