2 Vimyene 10 - Livulu lya Shukulu Kalunga

Vatekulwila va Ahave vavatsiya

¹ Ahave wakele na vatekulwila makumi atanu na avali vakele mu nganda ya Samaliya. Yehu wasonekele mikanda, waitumine ku Samaliya kuli vaka-kushwana va mu Njezelele, na kuli vakulunu na kuli vaje valelele vatekulwila va Ahave. Co ije mikanda waisonekele ngwendi,

² “Kuli yeni mulinakunyunga vatekulwila va mwene, amolika na matemba na tuvalu na vitwa na vinganda vya vimpaka. Ngecivene, omo mutambula eyi mikanda,

³ anguleni mutekulwila mwana umo wa munalume uje wamuvwa wa kulongwa, mupwiseni mwene, co mulwileni nakumwimanena.”

⁴ Oloni vaka-kushwana va mu Samaliya vazivile lyova manene, co vendekele ngwavo, “Vatijo twasa kwimana kuli Yehu? Inonwa Mwene Njolame na Mwene Ahaziya kuvasele kwimana nendi, co yetu twasa kwimana nendi ndi?”

⁵ Ngecivene, mwata wa ku lipela na mwata wa mu nganda na vakulunu na vaje valelele vatekulwila va mwene vatumine majwi awa kuli Yehu ngwavo, “Yetu tunapu tu vangamba vove, tukalinga vyuma vyoshe viwendeka. Oloni yetu kutwasa kwangula mwene embwe, linga mwoshe muunayongwela.”

⁶ Co Yehu wavasonekelele mukanda ukwavo ngwendi, “Nga munemana amo nange, co munononoka mashiko ange, neneni mitwe ya vatekulwila va Mwene Ahave kuli yange kuno ku Njezelele a simbu ino vene imene.” Co vatekulwila va Mwene Ahave vapwile makumi atanu na avali, vavanyungile kuli vakulunu va mu Samaliya, vakevo vavalelele.

⁷ Omo vatambwile mukanda wa Yehu, co vakulunu va mu Samaliya vatsiile vatekulwila voshe va Ahave makumi atanu na avali, vaakele mitwe yavo mu mitonga, co vaitumine ku Njezelele kuli Yehu.

⁸ Muluwa wezile walekele Yehu ngwendi, “Mitwe ya vatekulwila va Ahave vanainena,” co wavashikile ngeci vayake mu mitumbo ivali ku cikolo ca nganda, vaiseze kuje noo imene mutondo.

⁹ Co alikaki mutondo, Yehu waile ku cikolo ca nganda wendekele kuli vanu vaje vakele kuje ngwendi, “Yange vene njatumbile vutumbe vwakulwisa Mwene Njolame nakumutsiya, yeni kumwesi na mulonga wai. Oloni iyajo natsii vanu voshe ava?

¹⁰ Eci cinalumbunuka ngeci vyuma vyoshe vije vyendekele Shukulu Kalunga a vatekulwila va Ahave vipwe vya vushunga. Omwo Shukulu Kalunga nalingi vije vyendekele muli Elinja muka-kwimanena.”

¹¹ Asinoni Yehu watsiile vavushoko voshe va Ahave vaje vakele mu Njezelele na vamyata vendi voshe na vasamba vendi va a mbunge na vaka-kukombelela vendi, naumo wai wasaleleo na mwonyo.

Vavushoko vwa Mwene Ahaziya vavatsiya

¹² Yehu watundile ku Njezelele waile ku Samaliya. Co a ngila ku mutambela uvatumbula ngwavo, “Cilombo ca Tunyungi,”

¹³ waliwanene na vavushoko vwa Mwene Ahaziya wa mu Yunda, wavehwile ngwendi, “Yeni veyajo?” Vamukumbulwile ngwavo, “Tu vavushoko vwa Ahaziya. Tulinakuya ku Njezelele nakushunga vana va Vamwene Njezevele na naanga ya mwene yoshe.”

¹⁴ Co Yehu washikile vanu vendi ngwendi, “Vakwateni oku vayoya.” Co vavakwatele oku vayoya, co wavatsiilile kuyehi na mbulu yakele kuje. Co voshe vapwile makumi awana na vavali, co naumo wai wa ali vakevo wasaleleo na mwonyo.

Vavushoko vwa Ahave voshe vaje vasaleleo vavatsiya

¹⁵ Yehu watundile kuje lalo, co a ngila waliwanene na Yonandave muna Lekave. Yehu wamukandelelele, co wendekele nendi ngwendi, “Nove nange twalikulaela, wasa kunjikwasa ndi?” Yonandave wamukumbulwile ngwendi, “Eyo, njasa.” Co Yehu wamukumbulwile ngwendi, “Njikwate mu livoko.” Ngecivene, valikwatele mu mavoko, co Yehu walondesele Yonandave mu litemba,

¹⁶ co wendekele ngwendi, “Tuye tuvavoshe ngeci ukamone munjalilambula kuli Shukulu Kalunga.” Co vaile amolika mu litemba ku Samaliya.

¹⁷ Omo vaketele kuje, co Yehu watsiile vavushoko voshe va Ahave, naumo wai wasaleleo. Evi vikevyo Shukulu Kalunga walekele Elinja ngeci vikalingiwa.

Vaka-kulemesa Mbale vavatsiya

¹⁸ Yehu wasanene vanu voshe va mu Samaliya, co wendekele ngwendi, “Mwene Ahave wapangelele njambi Mbale kamandondo lika, oloni yange ni njikamupangela manene.

¹⁹ Saneni voshe vaka-kwimanena va Mbale na vaka-kumulemesa voshe na vaka-kukombelela vendi voshe. Naumo wai akalyole malambi, omwo njikakombelela n̄ombelo yakama kuli Mbale, co woshe uje kakakalako vakamutsiya.” (Eci capwile lika kulipeka kwa Yehu ngeci anyongese voshe vaka-kulemesa Mbale.)

²⁰ Yehu washikile ngwendi, “Imikeni litangwa lyakulemesa mukusingimika Mbale!” Co vemikile litangwa,

²¹ Yehu watumine lijwi mu lifuti lyoshe lya Isalele. Voshe vaje valemesele Mbale vezile, naumo wai walikelele. Voshe vakovelele mu njuvo yakulemesela Mbale, co yashulile mbe kutunda ku shongo imo nakweta ku shongo ikwavo.

²² Asinoni Yehu washikile muka-kukombelela uje wanyungile vuzalo vwa vulaja vwakujela avunene avupangezele kuli vaka-kulemesa Mbale.

²³ Munima yevi, Yehu wakovelele mu njuvo ya Mbale amo na Yonandave muna Lekave, co wendekele kuli vanu vakele muje ngwendi, “Mwapande kumona ngeci vaka-kulemesa Mbale vakevo lika vakovela muno kesi vaka-kulemesa Shukulu Kalunga embwe.”

²⁴ Asinoni ikeye na Yonandave vakovelelemo nakukombelela vin̄ombelo na vin̄ombelo vya kwenyeka kuli Mbale. Co waakele vanu makumi atanu na atatu anja ku njuvo yakulemesela Mbale nakuvashika ngwendi, “Munapande kutsiya vanu voshe ava, co nga munu aputwisao umo, co woshe uje amuputwisa ikeye akatsa kwinga muli ikeye!”

²⁵ Co omo Yehu wamanesele kukombelela vin̄ombelo, wendekele kuli vaka-kunyunga na kuli vamyata ngwendi, “Kovelenimo muvatsiye voshe, kesi muputwiseo umo embwe!” Co vakovelelemo na mikwale yakushomwena cimweja, vavatsiile voshe, vakokelele mivila yavo anja. Co vakovelele mu njuvo ya Mbale yakujela ya mukati,

²⁶ vatundisilemo manda yakujela ije yakele muje, vayenyekele.

²⁷ Ngecivene, vanyongesele ije manda yakujela na njuvo ya kulemesela Mbale, co vatengulwile ije njuvo yakulemesela Mbale kuyipwisa mbushu kweta na ku litangwa lya lelo.

²⁸ Omu mukemwo Yehu mwamaneselele kulemesa Mbale mu Isalele.

²⁹ Oloni watembunwinine vuvi vwa Mwene Yelovowame, uje watwamenenene Isalele nakuvakovelesa mu vuvi vwakulemesa tumponya twa ngolinde twa vana va vingombe tuje vashimbikile mu Mbetele na mu Ndani.

³⁰ Shukulu Kalunga wendekele kuli Yehu ngwendi, “Unalingi ku naanga ya Ahave vyuma vyoshe vije njashakele ngeci uvilinge. Ngecivene, njikukulaesa ngwange vatekulwila vove vakapwa vimyene va mu Isalele, kweta ku cisemwa camuciwana.”

³¹ Nameme ngoco, Yehu kononokele na mbunge yendi yoshe mashiko a Shukulu Kalunga, Njambi ya Isalele, oloni wakavangeyeye vilinga vyavivi vya Yelovowame, uje watwamenenene Isalele mu vuvi.

Kutsa kwa Yehu

³² A simbu ije Shukulu Kalunga washangumukile kutepulula lifuti lya Isalele. Co Mwene Hazayele wa ku Silya wafungulwile mitambela yoshe ya vaIsalele

³³ kutunda mu ngangela ya Yondau kweta na ku mbwela ku nganda ya Aloele ku Ndonga ya Alenone, amo na mitambela ya Ngilyande na Mbashane, kuje kwakala miyati ya Ngande na Luvena na Manase wa mu kangombe ka yambi.

³⁴ Vyuma vyoshe vije vyalingile Yehu, amo na vilinga vyendi vyakusimpa, vavisoneka mu Livulu lya Mizimbu ya Vimyene va mu Isalele.

³⁵ Yehu watsile, vamutsindile mu Samaliya, co munendi Yehohaze wamushwanene kupwa mwene.

³⁶ Yehu washwanene mu Samaliya kupwa mwene wa mu Isalele myaka makumi avali na itanu na itatu.