2 Vimyene 1 - Livulu lya Shukulu Kalunga

Elinja na Mwene Ahaziya

¹ Omo Ahave mwene wa mu Isalele watsile, lifuti lya Mowavi vatengulukilile Isalele.

² Mwene Ahaziya wa mu Isalele wawililile asi kutunda mu njanena ya njuvo yendi ya akamwa ya lipela mu Samaliya, co wavulumukile manene. Ngecivene, watumine miluwa vakehule Mbalezevuve, njambi wa Ekelone nganda ya Filisitiya, ngeci azivuke nga enduka nambe kenduka kukuvulumuka kwendi.

³ Oloni kangelo ka Shukulu Kalunga washikile Elinja, muka-kwimanena wa ku Tisheve, kuya nakuliwana na miluwa va Mwene Ahaziya nakuvehula ngwendi, “Omwo vikajo mukehwila Mbalezevuve njambi wa Ekelone? Yeni mwayongola ngweni mu Isalele kumwesi Njambi ndi?

⁴ Lekeni mwene ngweni Shukulu Kalunga nendeka ngwendi, ‘Kuukenduka kukuvulumuka kwove embwe, oloni ukatsa!’ ” Ngecivene, Elinja walingile ngwe muje mwamushikile Shukulu Kalunga,

⁵ omo vaje miluwa velukile kuli Mwene Ahaziya, co wavehwile ngwendi, “Omwo vikajo munelukila vwasi-vwasi?”

⁶ Co vamukumbulwile ngwavo, “Twaliwanene na munu uje watulekele twilukemo twakukuleke ngeci Shukulu Kalunga nendeka kuli yove ngwendi, ‘Omwo vikajo utumina miluwa kuli Mbalezevuve njambi wa Ekelone nakumwihula? Yove wayongola ngwove mu Isalele kumwesi Njambi ndi? Kuukenduka kukuvulumuka kwove embwe, oloni ukatsa!’ ”

⁷ Mwene wavehwile ngwendi, “Owo munu wakufwa vati?”

⁸ Co vamukumbulwile ngwavo, “Nazalele cikoveyo ca vilambu, wacikutile mu mbunda na mwiva wa cilambu.” Co mwene wendekele ngwendi, “Ikeye Elinja!”

⁹ Ngecivene, mwene watumine mwata umo na vanu makumi atanu kukashaka Elinja. Co uje mwata wawanene Elinja natumbama a lilundu, wendekele kuli ikeye ngwendi, “Ove munu wa Njambi, mwene alinakukusana ngeci uye kuli ikeye.”

¹⁰ Elinja wamukumbulwile ngwendi, “Nga yange njinapu nji munu wa Njambi, mwilu mutunde tuhya twakwenyeke yove na vanu vove!” Aje vene tuhya twatundile mwilu twenyekele uje mwata na vanu vendi.

¹¹ Mwene lalo watumine mwata mukwavo na vanu makumi atanu, co waile kuli Elinja nakwendeka ngwendi, “Ove munu wa Njambi, mwene alinakukusana ololo vene uye kuli ikeye!”

¹² Elinja wamukumbulwile ngwendi, “Nga yange njinapu nji munu wa Njambi, mwilu mutunde tuhya twakwenyeke yove na vanu vove!” Co aje vene tuhya twa Njambi twatundile mwilu twenyekele uje mwata na vanu vendi.

¹³ Co simbu ikwavo lalo mwene watumine mwata umo na vanu makumi atanu. Co ikeye walamatele a lilundu, watsikamene a mavuli ku mesho a Elinja, co wamulambelelele ngwendi, “Ove munu wa Njambi, njizivileko mema ku mbunge yange na vanu vange. Twamene!

¹⁴ Vaje vamyata vavali na vanu vavo venyele na tuhya twakutunda mwilu, oloni shukulu njizivileko mema ku mbunge!”

¹⁵ Co kangelo ka Shukulu Kalunga wendekele kuli Elinja ngwendi, “Shelumuka uye amo nendi, co kesi uzive lyova embwe.” Ngecivene, Elinja waile na uje mwata kuli mwene,

¹⁶ co wakendekele kuli ikeye ngwendi, “Omu mukemwo mwanendeka Shukulu Kalunga ngwendi, ‘Yove watumine miluwa kuli Mbalezevuve, njambi wa Ekelone nakumwihula, ngwe mu Isalele kumwesi Njambi wakwihula, co kuukenduka kukuvulumuka kwove, oloni ukatsa!’ ”

¹⁷ Co Ahaziya watsile, ngwe muje mwendekele Shukulu Kalunga ali Elinja. Oloni Ahaziya kakele na vana va vanalume, ngecivene, ndolome yendi Njolame wamushwanene kupwa mwene. Vacilingile mu mwaka wamucivali omo Njeholame muna Njosefati wapwile mwene wa mu Yunda.

¹⁸ Vyuma vyoshe vije vyalingile Mwene Ahaziya vavisoneka mu Livulu lya Mizimbu ya Vimyene va mu Isalele.