2 Timateo 4 - Livulu lya Shukulu Kalunga

¹ Ku mesho a Njambi na Kilistu Yesu, uje akasompa vaka-kuyoya na vatsi, co omwo alinakwija mukushwana kupwa Mwene, njikushika ngwange

² ambulula lijwi, kakateya akwendeka nambe a simbu yaivwa nambe kesi a simbu yaivwa, vayesa, endekela na mukutakamesa, longesa na lukakateya lwoshe.

³ Omwo simbu ikaija omo vanu kuvakatolilila ku kulongesa kwa vushunga, oloni vakakavangeya mashungu avo, co vakalikungulwila valongisi vavangi vangi vaje vakavaleka vije vashaka kuziva.

⁴ Kuvakatolilila ku vyuma vya vushunga, co vakatwala mana avo ku visimo vyangoco.

⁵ Oloni yove unapande kulinyunga mu vyuma vyoshe, kakakateya mu tuyando, linga vipangi vya muka-kwambulula Vin̄anda Vyavivwa, co panga vipangi vyove ngwe ngamba ya Njambi.

⁶ Oloni ngeci mwange, simbu inete yakunjikombelela, simbu inete kuli yange yakuseza mwonyo ou njilinawo.

⁷ Njinalu nzita yaivwa, co njinashatuka nakwetesa seteko yange, co njinanyungu kukulaela.

⁸ Co ololo cilongo ca vushunga cinanjitumbamena, cije Mwene, ikeye lyaako wa vushunga, akanjanaco a Litangwa lije, co kesi kuli yange lika embwe, oloni akacana lalo kuli voshe vaje vamuvandamena na cizemo ngeci asholoke.

Majwi eka

⁹ Zambula wije kuli yange ololo.

¹⁰ Omwo Ndemase nawila mu cizemo ca vyuma vya ano a kaye, co nanjiseza nai ku Tesalonika. Na Kelesenese nai ku Ngalatiya, na Tito nai ku Ndalematiya.

¹¹ Kuvanga Luka lika njili nendi kuno. Co ija amo na Mako ngeci akunjikwaseko vipangi kuno.

¹² Co Taikikase njamutumu ku Efeso.

¹³ Omo wija kuno, njitiike kazaku kange kaje njasezele ku Tolowase kuli Kapasi, ija lalo na mavulu, co cakama manene ije mikanda yange ya vilambu.

¹⁴ Elekizanda uje muka-kufula nanjilingi mwamuvi manene, Mwene akamwana fweto yendi kupwisa ngwe ku vipangi vyendi vyanalingi.

¹⁵ Nove lalo unapande kumutewa, omwo ikeye walwisile muzimbu wetu na muuka.

¹⁶ Akulivanga naumo wai wanjikundamene akulyamena kwange, voshe vanjitewele. Oloni Njambi kesi avalaveleco ngwe vuvi embwe!

¹⁷ Oloni Mwene wakele amo nange nakunjitakamesa ngeci njasele kwambulula lijwi lyamutunu kuli vaje kesi vaYunda voshe ngeci vazive, co nange lalo vanjiputumwisile ku kutsa.

¹⁸ Mwene akanjamene ku vipangi vyoshe vyavivi, co akanjambata mu kwoloka kunjitwala ku Vumwene vwendi vwa Mwilu. Kuli ikeye kukale vumpau ku myaka na myaka! Ewa.

Viindu vyakumanesela

¹⁹ Njilinakutuma viindu kuli Pilisila na Akwila na kuli vaka-naanga ya Onesifolase.

²⁰ Elasitase wasalele ku Kolinte, co njasezele Tolofimase mu Miletase, omwo ikeye wavinjile.

²¹ Livange kwija omo cisika kanda cete. Eumbulase na Pundenisi na Linase na Kalaundia vanatumu viindu kuli yeni, co lalo vaka-Yesu voshe vanatundu viindu vyavo.

²² Mwene akale amo na munzinzime wove. Kutetela kwa Njambi kukale amo neni voshe.