2 Timateo 3 - Livulu lya Shukulu Kalunga

Matangwa akukotoka

¹ Anuka ngwove kukakala kukaluwa a simbu ya matangwa akukotoka.

² Omwo vanu vakapwa vaka-kulizema vakevo vavenya, vaka-kuzema vimbongo, vaka-kulishasha, vaka-kulijundula vakevo vavenya, vakapwa vaka-kushaula, vaka-kujeneka kwononoka kuli visemi vyavo, vaka-kujeneka kukandelela, vaka-kujeneka kukulaela,

³ vakapwa vaka-kukenyuka, vaka-kujeneka kutetela vakwavo, vaka-vukaleo vwa makuli, vaka-muuka, vaka-vukalu, vaka-kuzinda vyavivwa,

⁴ vakapwa vaka-kuluwanganya, vakakulupozoka kwendeka, vaka-kushula na kulyalesa, vakakuzema manene senga kutuvakana kuzema Njambi,

⁵ vakakakateya vyuma vya cifwa cakulemesa Njambi, oloni vakavyana nzili yavyo. Litenge ku vanu va cifwa cangacije.

⁶ Omwo amo vavo vakai nakukovela mu vinjuvo vya vanu nakwononwesa vanakazi vakuzeya vaje vanalemuwa na milonga ya vuvi vuje vunavatwala ku miyati yoshe ya mashungu,

⁷ vanakazi vaje valinakweseka simbu yoshe kulilongesa, oloni kuvasa kuzivuka vushunga.

⁸ Ngwe Njane na Njambele valwisile Mosesa, ngecivene, na vanu ava lalo valinakulwisa vushunga, vanu vaje mana avo kuwesi nakupanga, co vanapu vaka-kwonwa mukukulaela.

⁹ Oloni kuvasa kuya kulutwe, omwo vulema vwavo vukasholoka ku vanu voshe. Muje mukemwo mucafwile kuli Njane na Njambele.

Vilongesa vyakumanesela

¹⁰ Oloni yove unakavangeya kulongesa kwange na futisi yange na vutumbe vwakuyoya kwange, unanongonona kukulaela kwange na kusimpa kwange na lukakateya lwange,

¹¹ na mapakeso ange na tuyando twange. Wavizivuka vyuma vyoshe vije vyalingiwile kuli yange mu Antyoke na mu Ikoniyame na mu Lisitala, mapakeso akukomokesa aje anjatambwile! Oloni Mwene wanjovwele ku vyoshe evi.

¹² Woshe uje ashaka kuyoya vuyoye vwa vu Njambi vuje vuli muli Kilistu Yesu akamona mapakeso,

¹³ co vanu vaka-vuvi na vaka-manseno vakatwalelelao kulinga vuvi manene, nakukwisa vakwavo nakulikwisa vakevo vavenya.

¹⁴ Oloni yove, kakateya mu vushunga vuje vuvakulongesele, co unemanao mbe mukukulaela. Wazivuka veya vaje vapwile valongisi vove,

¹⁵ co wazivuka ngwove tunde ku vwanike vwove, unazivuka Visoneka Vyakujela, vije vyasa kukwana mana mukukutwamenena kukwovoka kwakukulaela muli Kilistu Yesu.

¹⁶ Omwo Visoneka vyoshe Njambi wahwiminininemo ngeci vili na seo mukulongesa vushunga, na mukwendekela, na mukushungamesa, namukwana vilongesa akuyoya kwakuvwa,

¹⁷ ngeci munu uje apangela Njambi apwe wamutunu nakushula kwakuvwa mukupanga vipangi vyoshe vyavivwa.