2 Timateo 2 - Livulu lya Shukulu Kalunga

Lishwalale wamuvwa wa Kilistu Yesu

¹ Ngeci mwove munange, kolesa mu kutetela kuje kuli muli Kilistu Yesu.

² Tambula vilongesa vije wazivile kuli yange omo njambulwile ku mesho a vakaleo vavangi, co vikundike ku vanu vavavwa, vaje vasa kulongesa vakwavo veka lalo.

³ Ngecivene, kakateya mu n̄avava, ngwe lishwalale wamuvwa wa Kilistu Yesu.

⁴ Lishwalale naumo wai asa kulinga nevi nevi mu vipangi vyendi vya vushwalale, omwo viyongola vyendi vinapu kushaka kuvwaelelesa uje ntwama yendi.

⁵ Muka-kushatuka kasa kutambula vwana kuvanga ononoke mashiko.

⁶ Na ndimi lalo uje naundangana manene mu vipangi napande kuteja vimbuto vyavivwa vyakulivanga

⁷ Yongola a vyuma evi njilinakwendeka, omwo Mwene akakwana kuzivisisa kwa vyuma vyoshe.

⁸ Anuka vya Yesu Kilistu, uje ivasangwile ku vatsi, uje wapwile mutekulwila wa Ndaviti, ngwe muvanalongesa mu Vin̄anda Vyavivwa vije njilinakwambulula.

⁹ Omwo njilinakwambulula Vin̄anda Vyavivwa, njilinakuyanda nakunjikuta mu malyenge ngwe nji lipwepwe. Oloni lijwi lya Njambi kuvalyakele mu malyenge.

¹⁰ Ngecivene, njilinakuyanda mu vyuma vyoshe omwo ali vanu va Njambi vakwangula, ngeci na vakevo lalo vatambule kwovoka kwa muli Kilistu Yesu amo na vumpau vuje vwa myaka yoshe.

¹¹ Evi vikevyo vyendeka vya vushunga, “Nga tunatsi amo nendi, co tukayoya lalo amo nendi.

¹² Nga tutwalao na lukakateya, co tukashwana lalo amo nendi. Nga tumuvyana, co na ikeye lalo akatuvyana.

¹³ Nga kutupu va kulongwa, Ikeye anga wapwa wa kulongwa, omwo kasa kulivyana ikeye vavenya.”

Muka-vipangi wamuvwa

¹⁴ Anukisa vanu vove a vyuma evi, vendekele nakuvanangula ku mesho a Njambi ngeci kesi valilwise a majwi. Kucikwasa, oloni civiisa lika vanu vaje vazivilila.

¹⁵ Panga mwamuvwa ngeci utambule vukaleo vwavuvwa ku mesho a Njambi, ngwe muka-vipangi uje kesi na shwamwa ku vipangi vyendi, uje akalongesa mwamuvwa lijwi lya vushunga lya Njambi.

¹⁶ Linyunge ku vimata vyakushaula, na vyendeka vya vulema, vije vitwala lika vanu kulyala na Njambi.

¹⁷ Vilongesa vya cifwa eci vinapu ngwe mbandu ya mukongo ije inyongesa situ. Valongisi vavali vaje vanalongesa vyuma evi vanapu Haimenease na Filetase.

¹⁸ Vanaseza ngila ya vushunga, co valinakutanganesa kukulaela kwa vamo akwendeka ngwavo kusanguka kwetu ku vatsi cineti laja.

¹⁹ Oloni luvula lwakukola luje lwanajala laja Njambi kuvasa kuluningangesa, co alukelwo vanasonekao majwi awa ngwavo, “Mwene azivuka vaje vanapu vendi” co “Voshe vaje valitumbula ngwavo vanakundama kuli Mwene vanapande kutenguluka kutunda kukulinga vyavivi.”

²⁰ Mu njuvo yakama mwakala vimbasiya na malonga a miyati yoshe, vimo vavipanga na siliva na ngolinde, vikwavo na viti na vuma, vimo vyakupangesa ku vutumbe vwavuvwa, vikwavo vyakupangesa a simbu yoshe-iyoshe.

²¹ Voshe vaje valijelesa vakevo vavenya ku vyuma vyoshe vije vyavivi, vakavapangesa ku vutumbe vwavuvwa, omwo vanalikundika kuli Shukulu yavo kuvapangesa, co vanalivwaesela cimweja kuvapangesa ku vipangi vyavivwa.

²² Tewa ku mashungu a vukwenje, pangela lika vushunga nakukulaela na cizemo na kwoloka, amolika na vaje vatambeka kuli mwene na vimbunge vyakujela.

²³ Oloni litenge ku vimata vya vulema na vunzimba, wazivuka ngwove kukotoka kwavyo kunapu vimata lika.

²⁴ Ngwe ngamba ya Mwene, kuwapandele kupwa muka-vimata. Unapande kupwa muka-ngozi kuli voshe, mulongisi wamuvwa wa lukakateya,

²⁵ walyovwa-ovwa omo ashungamesa vaka-kumulwisa, amo Njambi akavana simbu yakutenguluka ngeci vazivuke vushunga.

²⁶ Co asinoni vakatenguluka ku mana avo ngeci vatewe ku mweto wa Liyavola, uje navakwata nakuvapwisa vaka-kwononoka cizango cendi.