2 Timateo 1 - Livulu lya Shukulu Kalunga

¹ Mukanda wakutunda kuli yange Paulu, muluwa wa Kilistu Yesu ku cizango ca Njambi, uje wanjitumine mukwambulula mwonyo wa cikulaeso uje tulinawo muli Kilistu Yesu.

² Kuli Timateo, munange injazema. Njambi Tate na Kilistu Yesu Mwene yetu vakwane kutetele na mema ku mbunge na kwoloka.

Kukandelela nakutakamesa

³ Njikandelela kuli Njambi, uje njilinakupangela na citaku-taku cakutungukwa ngwe muvalingile vakukulwila vange. Njikamukandelela omo njikakwanuka simbu yoshe mu malombelo ange vutsiki na mutanya.

⁴ Njilinakwanuka misozi yove, co njishaka manene kukumona, ngeci njakujolele manene.

⁵ Njilinakwanuka kukulaela kwove kwa vushunga, kukulaela kwa kuje kuku yove Loisi na vanyako Yunisi vakele nakwo. Njakulaela ngwange nove lalo ulinakwo.

⁶ Ngecivene, njilinakukwanukisa ngeci uwezeleleko lalo ku vwana vuje vwakwanene Njambi omo njakukambekele mavoko.

⁷ Omwo Njambi katwanene munzinzime wa lyova, oloni Munzinzime wendi natushulisa na nzili na cizemo nakulinyunga.

⁸ Ngecivene, kesi uzive shwamwa yakwambulula vukaleo vwa Mwene yetu, nambe kesi ukale na shwamwa ali yange, cinzinda omwo ali Kilistu. Oloni ambatako mutambela mukuyandela Vin̄anda Vyavivwa, ngwe omo Njambi akwana nzili yakuvilinga.

⁹ Ikeye watwovwele, co watusanene ngeci tupwe vanu vendi, kesi omwo a vilinga vyetu embwe, oloni omwo a vutumbe na a kutetela kwendi. Watwanene kutetela oku muli Kilistu Yesu ku simbu ya ku san̄ulu,

¹⁰ oloni ololo vanacisholola kuli yetu akwija kwa Muyoyesi wetu, Kilistu Yesu. Ikeye namanesa nzili ya kutsa, co a muzimbu nasholola mwonyo uje kuwesi kutsa.

¹¹ Njambi nanjangula kupwa muluwa na mulongisi mukwambulula Vin̄anda Vyavivwa,

¹² eci cikeco cilinakunjilingisa ngeci njiyande. Oloni kunjesi na shwamwa embwe, omwo njinazivuka uje njinakulaela, co njazivuka mwa vushunga ngwange ikeye asa kunyunga mwamuvwa vije vyananjikundika noo ku Litangwa lije.

¹³ Kakateya mbe ku majwi a vushunga aje njakulongesele, apwe cimweso kuli yove mukuwakava, co unapande kukala mukukulaela na cizemo vije vinapu vyetu muli Kilistu Yesu.

¹⁴ Nyunga vyuma vyavivwa vije vivanakukundika a nzili ya Munzinzime Wakujela uje alinakuyoya muli yetu.

¹⁵ Unazivuka ngwove vanu voshe mu lifuti lya Asiya vananjikengesa nima, Fingelyase na Helemengenese navo lalo vananjiseza.

¹⁶ Mwene amimwesa mema ku mbunge ku naanga ya Onesifolase, omwo ikeye visimbu vyavingi wanjivwaelelesele. Kazivile shwamwa omo yange njili mu kamenga,

¹⁷ oloni vwasi-vwasi omo wetele mu Loma, washangumukile kunjishakezeka noo wanjiwanene.

¹⁸ Mwene akamwane kutetela kwendi a Litangwa lije! Wazivuka mwamuvwa kukwasa kwendi muje njakele mu Efeso.