2 Tesalonika 3 - Livulu lya Shukulu Kalunga

Tulombeleleni

¹ Akukotoka, vakwetu, netu tulombeleleniko lalo ngeci lijwi lya Mwene liye kulutwe nakushandoka vwasi-vwasi ngeci valitambule na kalemeso, ngwe mumwalitambwile akati keni.

² Tulombeleleni lalo ngeci Njambi atwamene ku vanu va kupenga-penga vaka-vuvi, omwo kesi ngwe vanu voshe vanapu vaka-kukulaela ku lijwi embwe.

³ Oloni Mwene ikeye wa kulongwa, co akamitakamesa nakuminyunga kuli uje Muka-vuvi.

⁴ Co Mwene natwana kukulaela muli yeni, mwa vushunga vene tunakulaela ngwetu mulinakupanga, co mutwalao kupanga vije vitwamilekele.

⁵ Mwene atwamenene vimbunge vyeni mukuzivisisa cizemo ca Njambi na lukakateya luje lwanamyana Kilistu.

Catupande kupanga vipangi

⁶ Mu lizina lya Mwene Yesu Kilistu tulinakumishika, vakwetu, ngwetu, litengeni kuli voshe vanu vaje valinakuyoya ayoyesi ya vulwa, vaje kuvesi nakukavangeya vilongesa vitwamilongesele.

⁷ Yeni vavenya mwazivuka mwamuvwa ngweni munapande kupanga ngwe muje mutwapangele yetu. Kutwakele na vulwa omo twakele amo neni.

⁸ Kutwatambwile vukwaso vumo kuli munu umo kwakujeneka kumwilwisila lalo vyeka. Oloni twapangele nakuundangana, mutanya na vutsiki twatwaleleo nakupanga ngeci kesi tumitwike citele cimo.

⁹ Twalingile eci, kesi ngwe omwo kutwakele na moko yakuyoyela a vyuma vya vukwaso embwe, oloni twacilingile mukumimwesa ngila ngeci muyikave.

¹⁰ A simbu ije omo twakele amo neni, twamilekele ngwetu, “Woshe avyana kupanga kesi vamutavese kulya.”

¹¹ Tunendeka eci omwo twazivi ngwavo akati keni kuli vamo vanu valinakuyoya mu ngila ya vulwa, vaje kuvesi nakupanga nacimo cai kuvanga kukundama lika mu vipangi vya vakwavo veka.

¹² Mu lizina lya Mwene Yesu Kilistu tulinakushika ava vanu nakuvanangula ngeci vanapande kuyoya mwamuvwa nakupanga vipangi vyakuvayoyesa mukuyoya kwavo vavenya.

¹³ Oloni yeni, vakwetu, kumwapandele kujuka kulinga mwamuvwa.

¹⁴ Amo kuli umo uje kashaka kwononoka lijwi lyetu lije twatumu kuli yeni mu mukanda ou. Nga ngoconi, mukengeni, co mushondolokeni, ngeci shwamwa imukole.

¹⁵ Kesi mumupangese ngwe napu citozi embwe, oloni munanguleni lika ngwe musamba.

Majwi akumanesela

¹⁶ Mwene vavenya, uje wapwa nsina ya kwoloka kwetu, amyane kwoloka a simbu yoshe na mu vingila vyoshe. Mwene akale neni muvavoshe.

¹⁷ Na livoko lyange vavenya njasoneka ngwange, “Ciindu cakutunda kuli yange Paulu.” Eyi ikeyo ngila ya cimweso ca mikanda yange yoshe, omu mukemwo njikasoneka.

¹⁸ Kutetela kwa Mwene yetu Yesu Kilistu kukale neni voshe.