2 Tesalonika 2 - Livulu lya Shukulu Kalunga

Muka-vuvi

¹ Ngwe akwija kwa Mwene yetu Yesu Kilistu naakukunguluka kwetu amolika na ikeye, njilinakumilomba, vasamba vange ngwange,

² kesi mukale na citanga vwasi-vwasi mu viyongola vyeni nambe cishota-mbunge ngweni Litangwa lya Mwene linete. Amo vayongola ngeci twendekele eci omo twambulwile vuka-kwimanena nambe omo twambulwile lijwi, nambe amo twasonekele eci mu mukanda.

³ Kesi mutave umo amikwise mu ngila yeka lalo embwe. Omwo Litangwa lije kulikaija ngoco kuvanga noo Kutengulukila kwa mamaneselo kunaija na uje Muka-vuvi nasholoka, uje vemikila kuya ku Mbulu ya tuhya.

⁴ Ikeye akalwisa vyuma vyoshe vije vilitumbula ngwavyo vinjambi na cuma coshe-icoshe civakalemesa, akalyaka akamwa yavyo vyoshe. Co lalo akakovela nakutumbama mu Njuvo ya Shukulu Kalunga nakulitumbula ikeye vavenya ngwendi Njambi.

⁵ Kuma kumwasa kwanuka ndi? Njamilekele vyoshe evi omo njakele amo neni.

⁶ Oloni kucili cuma cimo cilinakuvindika evi vyuma ngeci kesi vilingiwe ololo, co yeni mwazivuka cinapu cuma cika. Ngecivene, omo simbu ikapwamo, co uje Muka-vuvi akasholoka.

⁷ Vuvi Vwakukomokesa manene vwakushwekesa vulinakulingiwa ololo, oloni vije vilinakulingiwa kuvikalingiwa kuvanga noo uje muka-kuvuvindika vanamutundisa.

⁸ Asinoni uje Muka-vuvi akasholoka, oloni omo Mwene Yesu akaija, akamutsiya na muku wakutunda mu kanwa kendi nakumunyongesa na vumpau vwendi.

⁹ Uje Muka-vuvi akaija na nzili ya Satana nakulinga vizivukiso na vikomokeso vya makuli vya miyati yoshe,

¹⁰ co akapangesa miyati yoshe ya kupenga-penga ya makuli ali vaje vakanyonga. Vakevo vakanyonga omwo kuvatambwile nakuzema vushunga ngeci vovoke.

¹¹ Ngecivene, Njambi natumu nzili yakuvasevwisa mukupanga muli vakevo ngeci vakulaele vije vinapu vya makuli,

¹² ngeci voshe vaje kuvakulaelele vushunga, oloni vanaungama lika mu vuvi, vakanyonga.

Vanamyangwila kukwamena

¹³ Tunapande kukandelela kuli Njambi simbu yoshe ali yeni, vakwetu, yeni vaje vaazema Mwene. Omwo Njambi wamyangwile kupwa vakulivanga kukwamena a nzili ya Munzinzime nakumipwisa vanu vendi vakujela, na akukulaela kweni mu vushunga.

¹⁴ Njambi wamisanene ngeci mulinge cuma eci a Vin̄anda Vyavivwa vije vitwambulwile kuli yeni, wamisanene ngeci mukafuke mutambela weni wa vumpau vwa Mwene yetu Yesu Kilistu.

¹⁵ Ngecivene, vakwetu, imaneni mbe nakukakateya ku vushunga vuje vutwamilongesele, mukwambulula kwetu na mu mukanda wetu.

¹⁶ Mwene yetu Yesu kilistu vavenya, na Njambi Tatetu, uje watuzemene na mu kutetela kwendi watwanene kutakama kuje kukwesi kutenguluka na cinyangavili cakukola,

¹⁷ amitakamesa nakumikolesa mukulinga nakwendeka vije vinapu vyavivwa simbu yoshe.