2 Samwele 9 - Livulu lya Shukulu Kalunga

Ndaviti na Mefimboshete

¹ Litangwa limo Ndaviti wehwile ngwendi, “Kuma kukwesi umo nasalako ku naanga ya Saulu ndi? Nga kwali, njishaka kumuzivila ngozi omwo ya Yonatana.”

² Co kwakele ngamba wa naanga ya Saulu lizina lyendi Ziva, vamulekele ngwavo aye kuli Ndaviti. Co mwene wamwihwile ngwendi, “Yove Ziva ndi?” Co ikeye wakumbulwile ngwendi, “Eyo shukulu, yange vene ndungo yove.”

³ Co mwene wamwihwile ngwendi, “Kuma kukwesi umo nasalao ku naanga ya Saulu, uje njasa kuzivila ngozi, ngwe munjakulaesele Njambi ngwange njikalingamo ndi?” Co Ziva wakumbulwile ngwendi, “Kwali umolika muna Yonatana. Oloni ikeye cilema, watenguka mendi.”

⁴ Co mwene wehwile ngwendi, “ali kuli?” Co Ziva wakumbulwile ngwendi, “Ali ku njuvo ya Makile muna Amiyele mu Londembale.”

⁵ Ngecivene, Mwene Ndaviti watumine vanu kukamushaka.

⁶ Omo Mefimboshete, muna Yonatana mutekulu wa Saulu, wetele, watsikamene asi nakulemesa Ndaviti. Co Ndaviti wamwihwile ngwendi, “Yove Mefimboshete ndi.” Co ikeye wamukumbulwile ngwendi, “Eyo shukulu.”

⁷ Co Ndaviti wendekele ngwendi, “Kesi uzive lyova embwe. Njikakuzivila ngozi omwo ya isho Yonatana. Njikakwilwisila lifuti lyoshe lije lyapwile lya kuku yove Saulu, co simbu yoshe ukalya nange ku mesa.”

⁸ Co Mefimboshete walemesele lalo nakwendeka ngwendi, “Shukulu, yange kunjakundamene ku vunu, nameme katali wa kutsa ali na seo! Omo vikajo ulinakunjizivila ngozi yangacije?”

⁹ Co mwene wasanene Ziva, ngamba ya Saulu, wendekele ngwendi, “Njilinakwana Mefimboshete, mutekulu wa shukulu yove Saulu, vyuma vyoshe vije vyapwile vyendi na naanga yendi.

¹⁰ Ngecivene, yove, na vana vove, na vangamba vove vakalima livu lya naanga ya shukulu yove Saulu, co mukateja vimbuto ngeci mukavawanene vyakulya. Oloni Mefimboshete ikeye akalila ku mesa yange simbu yoshe!” (Ziva wakele na vana va vanalume likumi na vatanu, na vangamba makumi avali.)

¹¹ Ziva wakumbulwile ngwendi, “Njikalinga vyuma vyoshe vije vyanashiki shukulu yange.” Ngecivene, Mefimboshete wakele nakulyalyalya ku mesa ya mwene, ngwe umo wa vana va vimyene.

¹² Mefimboshete wakele na munendi wa mukwenje lizina lyendi Mika. Co vanu voshe va naanga ya Ziva vapwile vangamba va Mefimboshete.

¹³ Ngecivene, Mefimboshete, wapwile cilema watengukile mendi, wakele mu Yelusalema, co wakele nakulila vyakulya vyendi vyoshe ku mesa ya mwene.