2 Samwele 7 - Livulu lya Shukulu Kalunga

Lijwi lya Natane kuli Ndaviti

¹ Mwene Ndaviti wakele mu lipela lyendi, co Shukulu Kalunga wamunyungile mwamuvwa ku vitozi vendi voshe.

² Co mwene wendekele kuli Natane muka-kwimanena ngwendi, “Kenga, ololo yange njili mu njuvo yakutunga na kendale, oloni Cikasa ca Cikumiiyo ca Njambi cili mu mbalaka!”

³ Co Natane wamukumbulwile ngwendi, “Linga vyoshe viwushaka kulinga, omwo Shukulu Kalunga ali amo nove.”

⁴ Oloni ku vutsiki vuje vene, Shukulu Kalunga wendekele kuli Natane ngwendi,

⁵ “Ya ukaleke ngamba yange Ndaviti ngwove, Shukulu Kalunga nendeka ngwendi, ‘Kesi yove ukanjitungila njuvo ngeci njikalemo embwe.

⁶ Kutunda a simbu ije omo njapatwile vanu va Isalele ku Ingito kweta na lelo lino, nalumo lwai njinakala mu njuvo, oloni njinakala lika mu mbalaka.

⁷ Mu mitambela mwoshe munjinende na vanu va Isalele nalumo lwai njehwile umo wa vantwama va miyati ya Isalele vaje njaangwile kunyunga vanu vange ngwange omwo vikajo kumwanjitungilile njuvo yakutunga na kendale.’

⁸ “Ngecivene, leka ngamba yange Ndaviti ngwove, yange, Kalunga Muka-nzili yoshe, njendeka kuli ikeye ngwange, ‘Njakutundisile mukulisa vimanga mu shwata, co njakupwisile muka-kushwana vanu vange va Isalele.

⁹ Njakele amo nove kwoshe kuje kuwaile, co njafungulwile vitozi vove voshe ngwe omo wakele nakuya kulutwe. Co njikakutsimanesa kupwa ngwe vantwama vakama va mu kaye.

¹⁰ Njinaangwila vanu vange Isalele mutambela, co njinavakamo, muje mukemwo muvakakala, naumo wai akavayandesa lalo.

¹¹ Anga vakovelelele mu lifuti lino, vanakala nakuvalwisa kuli vaka-muuka. Oloni eci kucikasholoka lalo. Njikukulaesa njikakunyunga mwamuvwa ku vitozi vove nakukwana vatekulwila.

¹² Omo ukatsa nakukutsinda na vakukulwila vove, co njikapwisa umo wa ali vana vove mwene, njikakolesa vumwene vwendi.

¹³ Ikeye akanjitungila njuvo, co njikakolesa litanda lya vumwene vwendi.

¹⁴ Co yange njikapwa nji ishe, na ikeye lalo akapwa munange. Omo akalinga mwamuvi, co njikamunyanyamesa ngwe ishe ya munu mwakanyanyamesa munendi.

¹⁵ Oloni kunjikatundisa livoko lyange kuli ikeye ngwe munjalingile kuli Saulu, uje injatundisile ngeci yove upwe mwene.

¹⁶ Simbu yoshe ukakala na vatekulwila, co vumwene vwove vukakala simbu yoshe. Co simbu yoshe litanda lyove likakola ngo!’ ”

¹⁷ Ngecivene, Natane walekele Ndaviti vyuma vyoshe vije Njambi wavijombolwele kuli ikeye.

Lilombelo lya Ndaviti lya cikandelela

¹⁸ Asinoni Mwene Ndaviti wakovelele mu Mbalaka Mwakuliwanena, watumbamene asi, co walombelele ngwendi, “Yange iyajo Shukulu Kalunga wa Akamwa ya Vyoshe, na naanga yange ikeyo ikajo, ngeci unjilingile vyoshe evi?

¹⁹ Nameme ngoco anga ucili nakuwezelelako lalo, Shukulu Kalunga wa Akamwa ya Vyoshe, unanjikulaesa cikulaeso ca vatekulwila vange ku myaka ya kulutwe. Co unatava munu ngeci amone evi, Shukulu Kalunga wa Akamwa ya Vyoshe!

²⁰ Vikajo lalo njendeka kuli yove? Omwo yove unjizivuka, yange ngamba yove.

²¹ Capwile cizango cove na vutumbe vwove kulinga evi, unalingi vyuma vyoshe evi vyakama ngeci unjilongese.

²² Ngecivene, vukama vwove, yove Shukulu Kalunga wa Akamwa ya Vyoshe, vwalifwa neyajo? Kukwesi weka wakufwa ngwe yove waiko, simbu yoshe twazivuka ngeci yove lika wapwa u Njambi.

²³ Kukwesi muyati weka lalo ano asi wakufwa ngwe Isalele, uje uwapatwile mu vunzinda nakuvapwisa vanu vove. Vyuma vije vyakama na vyakukomokesa vije viwalingile vinashandola lutsimo lwove mu kaye mwoshe. Yove washekele miyati yeka na vinjambi vavo omo vanu vove vakele nakuya kulutwe, vanu vaje wapatwile ku Ingito ngeci vapwe vove.

²⁴ Unalingisa vaIsalele kupwa vanu vove ku myaka yoshe, co yove Shukulu Kalunga, unapu Njambi yavo.

²⁵ “Co ololo, Shukulu Kalunga Njambi, simbu yoshe shulisa cikulaeso ciwunakulaesa yange ngamba yove na vatekulwila vange, linga vije viwatumbwile kulinga.

²⁶ Lizina lyove likapwa lyakama simbu yoshe, co vanu vakendeka ngwavo, ‘Shukulu Kalunga Muka-nzili yoshe ikeye Njambi ya Isalele.’ Co yove ukakolesa vushwana vwange simbu yoshe.

²⁷ Shukulu Kalunga Muka-nzili yoshe, Njambi ya Isalele! Njinasimpi akulombela lilombelo eli kuli yove, omwo unasholola vyoshe evi kuli yange ngamba yove, co wanjilekele ngeci ukapwisa vatekulwila vange vimyene.

²⁸ “Co ololo, Shukulu Kalunga wa Akamwa ya Vyoshe, yove unapu Njambi, wanyunga vikulaeso vyove simbu yoshe, unalingi cikulaeso cakukomokesa kuli yange.

²⁹ Ngecivene, njikulomba uvezikise vatekulwila va ngamba yove, ngeci vayoye simbu yoshe ku mesho ove. Yove Shukulu Kalunga, wa Akamwa ya Vyoshe, wakulaesele evi, co vivezikiso vyove vikakala ali vatekulwila vange simbu yoshe.”