2 Samwele 6 - Livulu lya Shukulu Kalunga

Cikasa ca Cikumiiyo vacinena ku Yelusalema

¹ Ndaviti wakungulwile lalo mashwalale 30,000 vavaangwile mu Isalele,

² wavatwalele ku Mbala mu Yunda, vakashake Cikasa ca Cikumiiyo ca Njambi, cije vatumbwile mu lizina lya Shukulu Kalunga Muka-nzili yoshe, uje natumbama akamwa ya vakelumbi.

³ Vacitundisile ku njuvo ya Avinandave yakele a lilundu, vacakele a litemba lyaliha. Co Uza, na Ahiyo, vana va Avinandave vakele nakwendesa lije litemba,

⁴ Ahiyo watwamene kulutwe lwa Cikasa.

⁵ Ndaviti na vaIsalele voshe vakele nakukina nakwimba na nzili yavo yoshe nakusingimika Shukulu Kalunga. Vakele nakwimba tulyalya, na visanzi, na vingoma, na misambo, na vingenjo.

⁶ Omo vetele ku lijungwilo lya Nakone, vingombe vatanukile, co Uza wolwele livoko lyendi wakwatele ku Cikasa ca Cikumiiyo.

⁷ Aje vene Shukulu Kalunga Njambi waluvalele na Uza, co wamutsiile omwo wakwatele livoko lyendi ku Cikasa ca Cikumiiyo. Uza watsililile kuje ku Cikasa ca Cikumiiyo,

⁸ Ndaviti waluvalele manene omwo Shukulu Kalunga wanyanyamesele Uza, co mutambela uje vautumbwile ngwavo Peleze Uza na ku lelo lino.

⁹ Ngecivene, Ndaviti wakele na lyova lya Shukulu Kalunga, co wendekele ngwendi, “Vati njambata Cikasa ca Cikumiiyo?”

¹⁰ Ngecivene, Ndaviti wayongwele ngeci kesi aye naco ku Yelusalema, oloni, ikeye waangunukile mu ngila, co wacitwalele ku njuvo ya Ovende Endome, wa mu nganda ya Ngate.

¹¹ Cakele kuje vingonde vitatu, co Shukulu Kalunga wavezikisile Ovende Endome na naanga yendi.

¹² Mwene Ndaviti wazivile ngwavo, “Shukulu Kalunga navezikisa Ovende Endome na naanga yendi na vyoshe vije vyali navyo omwo ya Cikasa ca Cikumiiyo.” Ngecivene, Ndaviti waile wakashakele Cikasa ca Cikumiiyo ku njuvo ya Ovende Endome wacitwalele ku Yelusalema nakuvwaelela manene.

¹³ Omo vanu vaje vambatele Cikasa ca Cikumiiyo vendele manambo atanu na limo, Ndaviti wavalekele ngeci vemane akombelele kuli Shukulu Kalunga n̄ombelo ya ngombe na muna ngombe wakununa.

¹⁴ Ndaviti wazalele nanga ya linyu mu mbunda yendi, co wakinine na nzili yendi yoshe nakusingimika Shukulu Kalunga.

¹⁵ Ngecivene, Ndaviti na vaIsalele voshe vatwalele Cikasa ca Cikumiiyo ku Yelusalema, vatwile tuwelele twakuvwaelela nakwimba malupembo.

¹⁶ Omo Cikasa cakovelele mu nganda, Mikale, muna Saulu, wemanene mu njanena, co wamwene Mwene Ndaviti alinakukina nakujombozoka na kusingimika Shukulu Kalunga mukukina cakujela, co wamushendumwine mu mbunge yendi.

¹⁷ Asinoni vaakele Cikasa mu mwela waco mu Mbalaka ije yatungile Ndaviti. Ngecivene, Ndaviti wakombelelele vin̄ombelo vya kwenyeka, na milambu ya kulitombola kuli Shukulu Kalunga.

¹⁸ Omo wamanesele kukombelela vin̄ombelo vya kwenyeka, na vin̄ombelo vya kulitombola, wavezikisile vanu mu lizina lya Shukulu Kalunga Muka-nzili yoshe,

¹⁹ co waanene vanu voshe vyakulya. Waanene munu na munu, munalume na munakazi mu Isalele, mukasha wa likende, na cipuka ca situ yakwoca, na likasha-kasha lya vinyu vyakuma. Asinoni vanu voshe vaile ku membo avo.

²⁰ Omo vanamanesa, Ndaviti waile kwimbo nakwindwisa naanga yendi, co Mikale watuukile nakuliwana nendi, wendekele kuli ikeye ngwendi, “Mwene wa vaIsalele naliwanena lizina lyakama ku litangwa lya lelo! Nalipwisa ngwe cilema ku mesho a vangamba va vambanda va vamyata vendi!”

²¹ Co Ndaviti wamukumbulwile ngwendi, “Yange njakinine nakusingimika Shukulu Kalunga, uje wanjangwile kuhyana isho na naanga yendi nakunjipwisa ntwama ya vanu vendi va Isalele. Anga njicitwalao vene kumusingimika Shukulu Kalunga,

²² co njicilishaula vene kutuvakana akulivanga. Yove amo unjiyongola ngwove kesi nji munu, oloni vaje vambanda vakevoco vakanjiyongola nakunjisingimika manene.”

²³ Mikale, muna Saulu, kakele na mwana noo kutsa kwendi.