2 Samwele 4 - Livulu lya Shukulu Kalunga

Ishemboshete vamutsiya

¹ Omo Ishemboshete muna Saulu wazivile ngeci Avinele vanamutsii ku Hevelone, co wakele na lyova, co vanu va Isalele voshe valikomokelele.

² Ishemboshete wakele na vamyata vavali vakevo vapwile vantwama va vimunga vya vaka-kupukula, mazina avo, Mbana, na Lekave, vana va Limone, vakutunda kuli Mbelote wa ku muyati wa Mbenjemani. (Omwo Mbelote nayo vailavela ku mutambela wa Mbenjemani.

³ Vanu vatungile muje akulivanga vatewelele ku Ngitaime, kukekwo kuvakala na lelo lino.)

⁴ Yonatana, muna Saulu, wakele na munendi wa munalume lizina lyendi Mefimboshete, wakele na myaka itanu omo Saulu na Yonatana vatsile. Omo nzimbu ya kutsa kwavo yetele kutunda ku nganda ya Njezelele, ndezi ya Mefimboshete wamukakwile nakumutewesa, oloni wazambwile manene, co wamuwisile, ngecivene, Mefimboshete wapwile cilema.

⁵ Lekave na Mbana vakatukile vaile ku njuvo ya Ishemboshete vetele kuje litangwa kuyehi na akati ka mutwe, Ishemboshete wakele nakuhwima a simbu ije vene.

⁶ Co uje munakazi wakele ku cikolo wanengukile omwo wakele nakupepa tiliku, co waile mu tulo, ngecivene, Lekave na Mbana vakovelele mu njuvo.

⁷ Co omo vali mukati, vaile ku mulili wa Ishemboshete, vamuwanene ali mu tulo twalalele mbuli mutenga, co vamutsiile. Ngecivene, vavatwile mutwe wendi, vawambatele, vendele vutsiki vwoshe mu Cana ca Yondau.

⁸ Co vatwalele mutwe wa Ishemboshete kuli Mwene Ndaviti ku Hevelone, vendekele kuli ikeye ngwavo, “Mutwe ou wa Ishemboshete, muna citozi cove Saulu, uje washakele kukutsiya. Co litangwa lya lelo Shukulu Kalunga natava yove shukulu yetu kulinga shambandinga ali Saulu na vatekulwila vendi.”

⁹ Ndaviti wavakumbulwile ngwendi, “Njilisinga ali Shukulu Kalunga wakuyoya, uje wanjamenene mu vushonde!

¹⁰ Omo uje munu wezile kuli yange ku Zikelange nakunjileka nzimbu ya kutsa kwa Saulu ikeye wayongwele ngwendi alinakunena muzimbu wauvwa. Co njamukwatele nakumutsiya. Cije cikeco capwile cikandelela cendi cinjamwanene a muzimbu wendi wauvwa!

¹¹ Co vatijo cikafwa ali vanu vavavi vaje vatsiya munu wakujeneka mulonga uje nalilalela mu njuvo yendi! Ololo njikalinga shambandinga ali yeni akumutsiya, co njikamitundisa ano asi!”

¹² Ngecivene, Ndaviti washikile mashwalale vendi, co vatsiile Lekave, na Mbana, vavatetele mavoko na mendi avo, co vavashukikile ku ngenge ya lishali lya Hevelone. Vanonele mutwe wa Ishemboshete, vautsindile mu mbumbo ya Avinele ku Hevelone.