2 Samwele 3 - Livulu lya Shukulu Kalunga

¹ Nzita ya akati ka mashwalale vemanenene naanga ya Saulu na mashwalale vaje vemanenene naanga ya Ndaviti yakele simbu yakama. Co nzili ya mashwalale va naanga ya Ndaviti yapwile yakama manene, oloni nzili ya mashwalale va naanga ya Saulu yakele nakuzeya.

Vana va Ndaviti

² Ava vakevo vana va Ndaviti va vanalume vaje vasemukilile ku Hevelone, munendi wa ntwatwa wapwile Aminone, vaina Ahinowame, wa ku Njezelele,

³ wamucivali Kilyave, vaina Avingaile, fwile ya Navale, wa ku Kalemele, wamucitatu Avisalome, vaina Maka, muna Talemai mwene wa ku Ngeshule,

⁴ wamuciwana Andoniya, vaina Hangite, wamucitanu Shefatiya, vaina Avitale,

⁵ wamucitanu na umo Iteleame, vaina Engela. Vana voshe ava vasemukilile mu Hevelone.

Avinele alipandakana na Ndaviti

⁶ Nzita anga yakele akati ka mashwalale va Ndaviti na mashwalale vaje vapwile va kulongwa ku naanga ya Saulu, co Avinele wakele nakulwa na nzili manene akati ka mashwalale va Saulu.

⁷ Saulu wakele na lishano lya mbanja, lizina lyendi Lizepa, muna Aiya, co Ishemboshete wendekele kuli Avinele ngwendi, “Omwo vikajo unalalela na lishano lya tate lya mbanja?”

⁸ Co Avinele waluvalele manene a majwi a Ishemboshete, wendekele ngwendi, “Kuma yove wayongola ngwove yange njenda Saulu vungungu ndi? Kutunda a litangwa lyakulivanga njapwile wa kulongwa kuli isho Saulu, na kuli vishongo vendi, na kuli vasamba vendi, oloni njamikwasele ngeci Ndaviti kesi amifungulule, co ku litangwa lya lelo unjiwanene mulonga wa munakazi!

⁹ Njambi alinge eci kuli Avinele, nambe kutuvakana eci lalo, nga kunjilingilako Ndaviti vije vyalisingile Shukulu Kalunga kuli ikeye,

¹⁰ Shukulu Kalunga wakulaesele Ndaviti ngeci akatundisa vumwene ku njuvo ya Saulu na vatekulwila vendi, co akapwisa Ndaviti mwene wa Isalele na Yunda, kutunda ku Ndani kweta na ku Mbeleshemba.”

¹¹ Co Ishemboshete wazivile lyova ali Avinele, ngeci kasele lalo kumukumbulula lijwi limo.

¹² Avinele watumine miluwa kuli Ndaviti, a simbu ije Ndaviti wakele ku Hevelone, vendekele ngwavo, “Iyajo akashwana eli lifuti? Linga cikumiiyo nange, co njikakukwasa ngeci ufungulule Isalele yoshe ikale ku mutambela wove.”

¹³ Co Ndaviti wamukumbulwile ngwendi, “Mwamuvwa! Njikalinga cikumiiyo nove, oloni cuma cimo cinjishaka kuli yove eci, kuukamono cihanga cange kuvanga unaija na Mikale muna Saulu omo wija nakunjimona.”

¹⁴ Co lalo Ndaviti watumine vanu kuli Ishemboshete wendekele ngwendi, “Njiilwisile munakazi wange Mikale. Njondele vikonde 100 vya vaFilisitiya ngeci njamwambatele.”

¹⁵ Ngecivene, Ishemboshete wamutundisile kuli munalume wendi Palatiyele muna Laishe.

¹⁶ Co Palatiyele wamukavele nakulila ngila yoshe noo wetele ku nganda ya Mbahulime. Oloni omo Avinele wendekele ngwendi, “Iluka kwimbo,” co welukile.

¹⁷ Avinele waile kuli vantwama va Isalele wendekele navo ngwendi, “Simbu yakama manene mwashakele Ndaviti ngeci apwe mwene yeni.

¹⁸ Co eyi ikeyo simbu yeni. Anukeni ngeci Shukulu Kalunga wendekele ngwendi, ‘Njikapangesa ngamba yange Ndaviti akapatule vanu vange vaIsalele kuli vaFilisitiya na kuli vitozi vavo voshe.’ ”

¹⁹ Co Avinele wendekele lalo kuli vanu va muyati wa Mbenjemani, asinoni waile kuli Ndaviti ku Hevelone nakumuleka vije vivalitavelele kulinga vanu va muyati wa Mbenjemani na Isalele.

²⁰ Omo Avinele waile kuli Ndaviti ku Hevelone na vanalume makumi avali, co Ndaviti wavalingilile ciwano.

²¹ Co Avinele wendekele kuli Ndaviti ngwendi, “Ololo oni njikafungulula Isalele yoshe ngeci ikale ku mutambela wove shukulu yange. Vakakutambula kupwa mwene, co ukambata vyoshe viwushaka, co ukashwana lifuti lyoshe.” Ngecivene, Ndaviti washuwile Avinele, co waile mwamuvwa.

Avinele vamutsiya

²² Munima yevi, Yowave na vamyata vakwavo va Ndaviti vatundile ku nzita, vezile na vyuma vyavingi vivakapukwile. Oloni Avinele kakele amo na Ndaviti ku Hevelone, omwo Ndaviti wamushuwile ngeci aye mwamuvwa.

²³ Omo Yowave na vanu vendi vetele, vamulekele ngwavo, “Avinele na vanu vendi vanezile kuli Mwene Ndaviti, co namushuula nai mwamuvwa.”

²⁴ Ngecivene, Yowave waile kuli mwene wendekele ngwendi, “Vika unalingi? Kenga, Avinele nezile kuli yove, omwo vikajo unamwecelela aye ngacije?

²⁵ Wazivuka ngeci ikeye nezile kuno nakukukwisa, ngeci azivuke vyuma vije viwulinakulinga kwoshe kuje kuuli nakuya. Mwa vushunga vene unazivuka ngacije!”

²⁶ Omo Yowave watundile kuli Ndaviti, watumine miluwa vakashake Avinele, co vakamuwanene ku lisima lya Sila, oloni Ndaviti kazivukile.

²⁷ Omo Avinele wetele ku Hevelone, co Yowave wamutwalele kwavo lika ku cikolo, ngwe ashaka kumuleka vyakushweka, kuje vene wamutivile mu lifu. Co watsile omwo ikeye watsiile Ashahele ndolome ya Yowave.

²⁸ Omo Ndaviti wazivile muzimbu ou, co wendekele ngwendi, “Yange na vumwene vwange kutwesi na mulonga ku mesho a Shukulu Kalunga ku myaka yoshe a kutsa kwa Avinele.

²⁹ Mulonga wa kutsa kwa Avinele ukale ali Yowave na naanga yendi yoshe! Co mu cisemwa cendi coshe mukakale munalume umo mu naanga yendi muka-kususula, na muka-mbumba, na cilema, na muka-kutsila mu nzita, na muka-kujeneka vyakulya!”

³⁰ Ngecivene, Yowave na ndolome yendi Avishai valingile shambandinga ali Avinele omwo watsiile ndolome yavo Ashahele mu nzita ku Ngimbiyone.

Avinele vamutsinda

³¹ Asinoni Ndaviti washikile Yowave na vanu vendi kutavula vuzalo vwavo, vazale vikeleya, ngeci valile Avinele. Co akuya ku vimbumbo Mwene Ndaviti wakavele vwango vwa mutsi,

³² co vatsindile Avinele mu Hevelone, mwene walilile nakukangoka ku mbumbo ya Avinele, co na vanu voshe valilile.

³³ Asinoni Ndaviti wembile mwaso wakulila Avinele ngwendi, “Omwo vikajo Avinele natsi ngwe cilema?

³⁴ Mavoko endi kuvaakutile, nambe mendi endi kuvaakele mu tukunju, watsile ngwe munu wakutsiya ku mapwepwe!” Co vanu vamulilile lalo.

³⁵ Litangwa lije lyoshe vanu vesekele kusindiya Ndaviti ngeci alyeko cuma cimo, oloni walisingile ngwendi, “Njambi anjitsiye nga njilya cuma cimo omo litangwa kanda litoke!”

³⁶ Co vanu voshe vanangukile a vije, co vavwaelelele. Mwa vushunga vene, vyuma vyoshe vyalingile mwene vyavwaelelesele vanu.

³⁷ Ngecivene, vanu voshe va Ndaviti, na vanu voshe va mu Isalele vazivukile a litangwa lije ngwavo mwene kakele na cizango cakutsiya Avinele.

³⁸ Ngecivene, mwene wendekele kuli vamyata vendi ngwendi, “Kuma yeni kumwazivukile ngweni ku litangwa lya lelo ntwama wakama wa mu Isalele natsi ndi?

³⁹ Nameme njapwa nji mwene yanaangula Njambi, oloni litangwa lya lelo njazeye. Vana va Zeluya ava vanapu vaka-kunjilwisa. Shukulu Kalunga ahise mapwepwe ava ngwe muvanalingi vakevo.”