2 Samwele 24 - Livulu lya Shukulu Kalunga

Ndaviti alava vanu

¹ Shukulu Kalunga waluvalele na Isalele lalo, co walingisile Ndaviti kunena vukalu ali vakevo. Co Shukulu Kalunga wendekele kuli ikeye ngwendi, “Ya ukalave vanu va Isalele na Yunda.”

² Ngecivene, Ndaviti waanene mashiko kuli Yowave, muka-kushika vinzita vyendi ngwendi, “Ya na vamyata vove ku miyati yoshe ya Isalele kutunda ku shongo imo ya lifuti nakweta ku shongo ikwavo, co laveni vanu. Njishaka kuzivuka vungi vwavo muvanapu.”

³ Oloni Yowave wakumbulwile mwene ngwendi, “Shukulu, Shukulu Kalunga Njambi yove atumise vanu va Isalele visimbu 100 kutuvakana muvanapu ololo, ngeci yove uyoye nakumona omo avatumisa. Oloni omwo vikajo shukulu ushaka kulinga eci?”

⁴ Oloni mwene washikile Yowave na vamyata vendi kwononoka lishiko lyendi, co vakatukile vaile nakulava vanu va Isalele.

⁵ Vajavukile Yondau, co vatungile cilombo cavo ku mbwela ya Aloele, nganda yakele mukati ka cana, mu lifuti lya Ngande. Co kutunda kuje vaile ku kunto ya Njazele,

⁶ vaile lalo na ku Ngilyande nakweta na ku Kandeshe, mu lifuti lya vaHivi. Asinoni vaile ku Ndani, co kutunda ku Ndani vaile ku Sindone mu kangombe ka yambi.

⁷ Asinoni vaile ku mbwela ku nganda ya cimpaka ca Tile, vaile lalo na ku vinganda vyoshe vya, vaHiti na vaKanana, akukotoka vaile ku Mbeleshemba, ku mutambela wa mu mbwela ya lifuti lya Yunda.

⁸ Ngecivene, omo vendanganene mu lifuti mwoshe, velukile ku Yelusalema omo kuneti vingonde vitanu na viwana na matangwa makumi avali.

⁹ Vambulwile kuli mwene vungi vwa vanalume voshe vaje vapandele kupwa mashwalale mu Isalele, vapwile 800,000, co mu Yunda vapwile 500,000.

¹⁰ Oloni omo Ndaviti wamanesele kulava vanu, citaku-taku camuyandesele manene, co wendekele kuli Shukulu Kalunga ngwendi, “Njinavulumuna manene akulinga cuma eci! Shukulu njisambese. Njinalingi mwavulema.”

¹¹ Omo Ndaviti wendukile mutondo, co lijwi lya Shukulu Kalunga lyezile kuli Ngande muka-kwimanena wa Ndaviti ngwalyo, “Ya ukaleke Ndaviti ngwove,

¹² ‘Shukulu Kalunga nendeka ngwendi akwana vyuma vitatu angulao cimo ngeci njicilinge kuli yove.’ ”

¹³ Co Ngande waile kuli Ndaviti, nakumuleka vije vyendekele Shukulu Kalunga, co wamwihwile ngwendi, “Waangulao cuma cika? Myaka itatu ya njala mu lifuti lyove, nambe vingonde vitatu utunde mu lifuti kutewa vitozi vove, nambe matangwa atatu a mushongo wakulitambwisa mu lifuti lyove? Co ololo yongolao mwamuvwa, unjileke muukumbulwilao njiilwise kuli Shukulu Kalunga.”

¹⁴ Ndaviti wakumbulwile ngwendi, “Njili mu vukalu! Oloni mwamuvwa tuwile mu livoko lya Shukulu Kalunga, omwo ikeye muka-mema ku mbunge, oloni kesi tuwile mu livoko lya munu embwe.”

¹⁵ Ngecivene, Shukulu Kalunga watumine mushongo wakulitambwisa ali Isalele, kutunda ku mutondo nakweta ku simbu ije yemikile. Kutunda ku shongo imo ya lifuti nakweta ku shongo ikwavo kwatsile vaIsalele vakupwa 70,000.

¹⁶ Omo kangelo ka Shukulu Kalunga washakele ngeci anyongese Yelusalema, Shukulu Kalunga watengulwile viyongola vyendi vyakuhisa vanu, co wendekele kuli kangelo uje wakele nakuvatsiya ngwendi, “Likele! Wapwisamo!” Kangelo wakele ku mutambela wa lijungwilo lya Alauna, kaNjevushi.

¹⁷ Ndaviti wamwene kangelo uje wakele nakutsiya vanu, co wendekele kuli Shukulu Kalunga ngwendi, “Yange vene njili na mulonga. Yange njalingile mwamuvi. Indi ava vanu vayanda vanalingi vikajo? Yove unapande kuhisa yange na naanga yange.”

¹⁸ A litangwa lije vene, Ngande waile kuli Ndaviti wamulekele ngwendi, “Ya ku lijungwilo lya Alauna ukatungile Shukulu Kalunga mutula.”

¹⁹ Co Ndaviti wononokele lishiko lya Shukulu Kalunga, waile ngwe muje mwamulekele Ngande.

²⁰ Alauna omo wakengele, wamwene mwene na vamyata vendi valinakwija kuli ikeye. Co watsikamene asi kulutwe lwa Ndaviti,

²¹ co wehwile ngwendi, “Shukulu, omwo vikajo munezila kuno?” Co wamukumbulwile ngwendi, “Njinaija nakulanda lijungwilo lyove njitungileo Shukulu Kalunga mutula, ngeci njimanese ou mushongo wakulitambwisa.”

²² Co Alauna wamukumbulwile ngwendi, “Wambate ngano shukulu, ngeci wane kuli Shukulu Kalunga vyoshe viwushaka. Co lalo vingombe vakwenyekela a mutula kupwa n̄ombelo, na vimandauluwa vyavo evi amolika na mavaya akujungwila ngeci vipwe vitale.”

²³ Alauna waanene vyoshe vije kuli mwene, co wendekele kuli ikeye ngwendi, “Shukulu Kalunga Njambi yove atambule n̄ombelo yove.”

²⁴ Oloni mwene wamukumbulwile ngwendi, “Embwe, njikufweta vene ndando yaivwa. Kunjasa kukombelela kuli Shukulu Kalunga Njambi vin̄ombelo vya kulanda embwe.” Co walandele lije lijungwilo na vingombe, na mavundungulu a siliva makumi atanu.

²⁵ Asinoni watungile mutula wa Shukulu Kalunga nakukombelela vin̄ombelo vya kwenyeka, na milambu ya kulitombola. Shukulu Kalunga wakumbulwile lilombelo lyendi, co mushongo wakulitambwisa wahwile mu Isalele.