2 Samwele 22 - Livulu lya Shukulu Kalunga

Mwaso wa Ndaviti wakuhyana

¹ Omo Shukulu Kalunga waamenene Ndaviti kuli Saulu na vitozi vendi voshe, Ndaviti wembilile mwaso ou Shukulu Kalunga ngwendi,

² Shukulu Kalunga ikeye muka-kunjinyunga, ikeye wapwa cimpaka cange cakukola.

³ Njambi yange ikeye wapwa cishwamo cange, muli ikeye mukemwo munjitewela. Ikeye wapwa ntelo yange, muka-kunjamena nakunjinyunga mwamuvwa. Ikeye muyoyesi wange, ikeye muka-kunjinyunga nakunjamena, ku vukalu vwoshe.

⁴ Njitambeka kuli Shukulu Kalunga, co ikeye anjamena ku vitozi vange. Shangazaleni Shukulu Kalunga!

⁵ Kutsa kwanjizengelekele ngwe linimbwa, mankimba akunjinyongesa anjifwikile.

⁶ Kutsa kwanjizengelekele ngwe linimbwa, co vinganjo vya mbumbo vyanjishwikile.

⁷ Mu simbu yange ya tuyando, njatambekele kuli Shukulu Kalunga, njatambekele kuli Njambi yange ngeci anjikwase. Mu Njuvo yendi wazivile lijwi lyange, ikeye watolililile ku mutambi wange wa akukwasa.

⁸ Omo Njambi waluvalele, asi aningangele nakujaja, na maluvula a minkinda alinikile nakushengenya.

⁹ Co vwisi vwatuukile mu majulu endi, mulangi wakunyongesa, na manungu a tuhya vyatundile mu kanwa kendi.

¹⁰ Watavwile lilu nakulisholola, wezile ano asi, co lishelwa lyakuzivala vwii lyakele mwisi ya mendi endi.

¹¹ Wapulwile a kelumbi, wendelele a mambava a lihunzi.

¹² Wavandele mulisusulungu, mashelwa a kuhima a nyonzi amufwikile.

¹³ Ceke catwile kulutwe lwendi, kwashukumine manungu a tuhya.

¹⁴ Asinoni Shukulu Kalunga walumine mwilu, co lijwi lya Njambi Muka-nzili yoshe valizivile.

¹⁵ Co ikeye washele mikili yendi, nakushandola vitozi vendi, nakuhyahyata kwa mihyato wavashekele.

¹⁶ A masima a mema a kalunga asholokele, luvula lwa asi lwasholokele, omo Shukulu Kalunga waluvalelele vitozi vendi, co wavaluvalesele na vukalu.

¹⁷ Shukulu Kalunga wolwele livoko lyendi oku ali mwilu nakunjikwata, wanjijavulwile mu mema akulova.

¹⁸ Wanjamenene ku vitozi vange va nzili, na kuli voshe vaje vanjizinda omwo vanjihyanene nzili.

¹⁹ Omo njakele mu tuyando vanjilwisile, oloni Shukulu Kalunga wanjinyungile.

²⁰ Wanjikwasele nakunjitundisa mu vushonde, wanjamenene omwo wavwaelelele nange.

²¹ Shukulu Kalunga anjana cikandelela omwo nji muka-kulinga mwamuvwa, ikeye anjivezikisa omwo kunjesi na mulonga.

²² Njinononoka lishiko lya Shukulu Kalunga, co kunjakengesele nima Njambi yange.

²³ Njinanyungu mashiko endi oshe, kunjavyanene kwononoka mashiko endi embwe,

²⁴ nazivuka ngeci kunjesi na mulonga, co njalinyunga ku vuvi.

²⁵ Ngecivene, anjana cikandelela omwo njikalingi vyavivwa, omwo azivuka ngeci kunjesi na mulonga.

²⁶ Shukulu Kalunga, yove wapwa wa kulongwa, kuli vaje va kulongwa kuli yove, co wapwa wamuvwa kuli vaje vavavwa.

²⁷ Yove wapwa wakujela kuli vaje vakujela, oloni ukamwesa vukalu kuli vaka-vuvi.

²⁸ Yove ukamena vaje vaka-kulikeesa, oloni ukakeesa vaje vaka-kulyalesa.

²⁹ Yove Shukulu Kalunga wapwa ceke cange, tundisa lisusulungu lyange.

³⁰ Unjana nzili yakulwisa vitozi vange, na nzili yakufungulula vimpaka vyavo.

³¹ Ou Njambi vilinga vyendi vyapwa vyakulumbunuka, na majwi endi apwa akulitulao! Ikeye wapwa ntelo ya voshe vaje vatewela muli ikeye.

³² Shukulu Kalunga endi lika ikeye Njambi. Njambi endi lika ikeye cimpaka cetu.

³³ Ikeye Njambi muka-kunjana nzili, ikeye atwamenena muka-vushunga mu ngila yendi.

³⁴ Ikeye ashatukisa mendi ange ngwe shonge, anjinyunga mwamuvwa a minkinda.

³⁵ Ikeye anjilongesa kulwa vinzita, ngeci njase kunana vuta vwa lusipa vwakukola.

³⁶ Yove Shukulu Kalunga, u muka-kunjinyunga nakunjamena, kunyunga kwove kunanjitsimanesa.

³⁷ Yove unanjinyungu kutewa vanjifungulula, co nalumo lwai njinau.

³⁸ Njisheka vitozi vange nakuvafungulula, kunjilikela noo njinavanyongesa.

³⁹ Njivawisila asi, co kuvasa lalo kwindukao, valala ku myanja yange omo njinavafungulula.

⁴⁰ Unjana nzili yakulwa nzita nakufungulula vitozi vange.

⁴¹ Yove usheka vitozi vange ngeci vatunde kuli yange, co njinyongesa vaje vanjizinda.

⁴² Vatambeka ngeci vavakwase, oloni naumo wai avamena. Vatambeka kuli Shukulu Kalunga, oloni kavakumbulula.

⁴³ Njavatsenene tsenu-tsenu, vafwile ngwe likungu, njavalyatangelele ngwe lindova lya mu vingila.

⁴⁴ Wanjamenene kuli vanu vange vaje vanjitengulukilile, nakunjipwisa muka-kushwana miyati, vanu vaje kunjazivukile, ololo vanjipangela.

⁴⁵ Vaka-kwija vatsikama kuli yange, omo vaziva lijwi lyange, co vanjononoka.

⁴⁶ Kusimpa kwavo kulinakuhwa, valinakwija nakujaja kutunda mu vimpaka vyavo.

⁴⁷ Shukulu Kalunga wayoya! Shangazaleni muka-kunjilwila! Shangazaleni vukama vwa nzili ya Njambi muka-kunjamena.

⁴⁸ Ikeye anjihyanesa ku vitozi vange, nanjifungulwila miyati yoshe,

⁴⁹ nakunjamena ku vitozi vange. Yove Shukulu Kalunga, unanjihyanesa ku vitozi vange nakunjinyunga ku vanu vavakalu.

⁵⁰ Ngecivene, njikakushangazala akati ka miyati, njikakwimbila myaso yakukushangazala.

⁵¹ Njambi akana kuhyana kwakama, kuli mwene uje yalyangwilile, ikeye amwesa cizemo cije kucesi kutenguluka kuli uje yanaangula, kuli Ndaviti na vatekulwila vendi ku myaka yoshe.