2 Samwele 19 - Livulu lya Shukulu Kalunga

Yowave endekela Ndaviti

¹ Yowave vamulekele ngwavo Mwene Ndaviti alinakulila, co ali na vusiwa manene omwo Avisalome.

² Co a litangwa lije kujolela omwo kuhyana kwatengulukile vusiwa kuli mashwalale voshe va Ndaviti, omwo vazivile ngeci mwene alinakulila munendi.

³ Co velukile mu nganda volokele kuluu, ngwe mashwalale vaje vali na shwamwa omwo vanatewe ku nzita.

⁴ Mwene walifwikile ku cihanga cendi walilile manene ngwendi, “Kekange munange! Munange Avisalome! Avisalome munange!”

⁵ Co Yowave waile ku njuvo ya mwene wendekele kuli ikeye ngwendi, “Ku litangwa lya lelo unazivisa manene vanu vove shwamwa, vanu ava vanamena mwonyo wove na myonyo ya vana vove va vanalume na ava va vanakazi, na vanakazi vove, na mashano vove va mbanja.

⁶ Unashaula ava vakuzema nakusingimika ava vakuzinda! Eci cinasholoka ngeci vamyata vove, na vanu, vanapu vangoco kuli yove. Njinamono ngeci yove unesi kuvwaelela nga Avisalome kayoya ku litangwa lya lelo, co yetu voshe kutwatsa.

⁷ Ololo ya ukatakamese vanu vove. Njilisinga mu lizina lya Shukulu Kalunga ngeci nga kuulingimo, co imene mutondo-tondo naumo wai akakala nove. Co ovu vukapwa vukalu vwakama manene kutuvakana vuje vuunakala nakuyanda navwo mukuyoya kwove kwoshe.”

⁸ Co mwene wakatukile, waile wakatumbamene kuyehi na cikolo ca nganda. Co vanu vendi vazivile ngwavo ali kuje, co voshe vezile vakungulukile kuli ikeye. A simbu ije, vaIsalele voshe vatewele, munu na munu waile kwimbo lyendi.

Ndaviti eluka ku Yelusalema

⁹ Co vanu voshe va mu lifuti valijokotesele akati kavo. Valyendekesele umo na mukwavo ngwavo “Mwene Ndaviti watuyoyesele ku vitozi vetu. Ikeye watupatwile kuli vaFilisitiya, co ololo natewa kuli Avisalome naseza lifuti.

¹⁰ Twavwavesele mazi Avisalome nakumupwisa mwene, oloni vanamutsiila mu nzita. Ngecivene, omwo vikajo kukwesi munu elwise Mwene Ndaviti?”

¹¹ Co vin̄anda vije vakele nakwendeka vaIsalele vyetele kuli Mwene Ndaviti. Ngecivene, watumine Zandoke na Aviyatale vaka-kukombelela kukehula vantwama va ku Yunda ngwavo, “Omwo vikajo yeni munapu vakumanesela akukwasa kwilwisila mwene mu lipela lyendi?

¹² Yeni munapu vavushoko vwange, tunapu muvila umo na maninga amo, co omwo vikajo mupwa vakumaneselako kuya nakukanjishaka?”

¹³ Ndaviti wavalekele lalo vendekele kuli Amasa ngwavo, “Yove unapu kavushoko kange. Kutunda ku ololo njikakupwisa mukulunu wa mashwalale kwinga mu mwela wa Yowave. Nga kunjilisingimo, co Njambi anjihise njitse!”

¹⁴ Co majwi a Ndaviti akokele vimbunge vya vanu voshe va mu Yunda, co vamutuminine majwi ngeci eluke na vamyata vendi voshe.

¹⁵ Omo mwene welukile, vamusheshele vanu voshe va mu Yunda ku Ndonga ya Yondau, vaje vatundile ku Ngilingale kwija nakumujavwisa ndonga.

¹⁶ A simbu ije vene, Shimei kaMbenjemani muna Ngela wa ku Mbahulime wazambwilile ku Yondau nakushesha Mwene Ndaviti.

¹⁷ Wezile na vanalume 1,000 va ku muyati wa Mbenjemani. Na Ziva, ngamba ya vaka-naanga ya Saulu lalo, wezile na vana vendi likumi na vatanu, na vangamba makumi avali, vakevo valivangele kweta omo mwene kanda acete.

¹⁸ Co vajavukilile a myava nakujavwisa vanu va mwene nakulinga vyoshe vije vyashakele mwene. Omo mwene walivwaeselele ngeci ajavuke, co Shimei watsikamene asi ku mesho a mwene,

Ndaviti azivila ngozi Shimei

¹⁹ wendekele ngwendi, “Shukulu kalombo, njisambese ku vuvi vuje vunjalingile a litangwa lije watundile mu Yelusalema. Kesi ukale na likiti-kiti nange nambe kuvuyongola lalo.

²⁰ Njazivuka, shukulu, ngwange njaviisa, mukemwo njinapu wakulivanga kutunda ku miyati ya ku kunto kwija nakukushesha yove Shukulu ku litangwa lya lelo.”

²¹ Avishai muna Zeluya wendekele ngwendi, “Shimei napande kutsa omwo ikeye wasingile uje yaangwile Shukulu Kalunga kupwa mwene.”

²² Oloni Ndaviti wendekele kuli Avishai na ndolome yendi Yowave ngwendi, “Iyajo nehula viyongola vyeni? Kuma yeni mushaka kunjaka mu vukalu ndi? Ololo yange njinapu mwene wa vaIsalele, co kukwesi lalo kaIsalele ivakatsiya ku litangwa lya lelo wai.”

²³ Co Ndaviti wendekele kuli Shimei ngwendi, “Njendeka nakukukulaesa ngwange kuukatsi.”

Ndaviti azivila ngozi Mefimboshete

²⁴ Asinoni Mefimboshete, mutekulu wa Saulu, wezile nakushesha mwene. Ikeye kajwelele ku mendi endi, nambe kuteula munjezi wendi, nambe kukusha vuzalo vwendi kutunda a simbu ije mwene watundile mu Yelusalema noo welukile nakushwana.

²⁵ Omo Mefimboshete watundile ku Yelusalema kwija nakushesha mwene, co mwene wendekele kuli ikeye ngwendi, “Mefimboshete, omwo vika kuwaile nange?”

²⁶ Mefimboshete wamukumbulwile ngwendi, “Shukulu, ngwe muuzivukila, yange njapwa nji cilema. Njalekele ngamba yange ngwange anjivwaesele cimulu cange ngeci njilondeo njiye nove, oloni ikeye wanjikwisile.

²⁷ Ikeye wanjikutiiye vya makuli kuli yove shukulu, oloni yove wafwa ngwe kangelo ka Njambi, ngecivene, linga vyoshe vije vinapu vyavivwa kuli yove.

²⁸ Voshe va ka naanga ya tate vapandele kuvatsiya kuli yove shukulu, oloni yange wanjitavesele kulya ku mesa yove. Co ololo kunjesi na nzili yakulomba lalo vuvwa kuli yove shukulu.”

²⁹ Mwene wamukumbulwile ngwendi, “Kesi wendeke lalo vyavingi. Njavwaesa laja ngeci yove na Ziva mulipangele vufuko vwa Saulu.”

³⁰ Mefimboshete wamukumbulwile ngwendi, “Taveni ngeci vyoshe vipwe vya Ziva. Yange njapwisamo omo shukulu neluka mwamuvwa mu nganda.”

Ndaviti azivila ngozi Mbazilai

³¹ Mbazilai, kaNgilyande, nendi wezile kutunda ku Longelime nakujavwisa mwene Ndonga Yondau.

³² Mbazilai wapwile kakulukazi, wa myaka makumi atanu na atatu. Ikeye wafukile manene, co wakwasele mwene vyakulya omo mwene wakele ku Mahanaime.

³³ Mwene wendekele kuli ikeye ngwendi, “Tuye amo nange ku Yelusalema, co njikakunyunga.”

³⁴ Oloni Mbazilai wamukumbulwile ngwendi, “Kunjiyoyo lalo simbu yakama, omwo vikajo njiila na shukulu ku Yelusalema?

³⁵ Yange lajoko njili na myaka makumi atanu na atatu, co kunjesi lalo na senga. Kunjasa kuziva vyakulya indi vitovala nambe vyakunwa, co kunjasa kuziva majwi a vaka-kwimba. Njikakuyandesa ngoco shukulu.

³⁶ Yange kunjishaka cikandelela cangacije embwe. Ngecivene, njikakusindikiyako lika kamandondo musambwa ya Yondau.

³⁷ Co ukanjitava njiiluke kwimbo njikatsile kuyehi na vimbumbo vya visemi vange. Munange Cimehame ou, ikeye akakupangela, ya nendi, shukulu, ngeci akakukwase ngwe ku viyongola vyove.”

³⁸ Mwene wamukumbulwile ngwendi, “Njikaya nendi njikamulingila vyoshe viwushaka. Co njikakulingila cuma coshe ciwulomba.”

³⁹ Asinoni Ndaviti na vanu vendi voshe vajavukile Ndonga ya Yondau. Co watsembele Mbazilai wamuvezikisile, asinoni Mbazilai welukile kwimbo lyavo.

Yunda na Isalele valizungila mwene

⁴⁰ Omo mwene najavuka laja, vanalume va mu Yunda voshe na litambelo lya vanalume va mu Isalele vamusindikiiye, waile ku Ngilingale, co Cimehame waile amo nendi.

⁴¹ VaIsalele voshe vaile kuli mwene nakwendeka kuli ikeye ngwavo, “Shukulu, omwo vikajo vandolome vetu, vanu va ku Yunda, vakwambatele nakukujavwisa Yondau, na naanga yove, na vanu vove?”

⁴² Co vanalume va ku Yunda vakumbulwile ngwavo, “Tunalingi eci omwo mwene wapwa kavushoko ketu wa a mbunge. Cooni cuma mukajo camiluvalesa? Yetu kutwalile vyakulya vya mwene, nambe mwene katwanene cuma cimo embwe.”

⁴³ Co vaIsalele vakumbulwile vanalume va ku Yunda ngwavo, “Tuli na mitambela likumi muli mwene kutuvakana yeni, omwo vikajo munatushawila ngeci? Kesi yetu vakulivanga kusimutwiya vyakwiluka kwa mwene ndi?” Oloni vanalume va ku Yunda vapangesele majwi a vukalu manene kutuvakana majwi a vanalume va Isalele.