2 Samwele 17 - Livulu lya Shukulu Kalunga

Hushai atanganesa Avisalome

¹ Kukwetile simbu yakama, omo Ahitofele wendekele kuli Avisalome ngwendi, “Njitave njangule vanalume 12,000, vutsiki vuno njikavangeye Ndaviti.

² Njikamulwise simbu najuka, co njikamujujwisa na lyova, vanu vendi voshe vakatewa. Co njikatsiya lika mwene,

³ asinoni njikelwisa vanu vendi voshe kuli yove, ngwe shombolwa eluka kuli munalume wendi. Yove ushaka kutsiya lika munu umo, co voshe vakasalao vakakala mwamuvwa.”

⁴ Kunangula oku kwasholokele kwakuvwa manene kuli Avisalome na kuli vantwama va Isalele voshe.

⁵ Co Avisalome wendekele ngwendi, “Ololo saneni Hushai, co tuzive omo endeka.”

⁶ Omo Hushai wetele, Avisalome wendekele kuli ikeye ngwendi, “Ahitofele natunangula mu ngila eyi, co twasa kukavamo ndi? Nga kesi mukemwo, co tuleke vati tulinga.”

⁷ Ngecivene, Hushai wamukumbulwile ngwendi, “Kunangula oku kwanaminangula Ahitofele kesi kwakuvwa embwe.

⁸ Yove wazivuka ngeci isho Ndaviti na vanu vendi vapwa vaka-kulwa va nzili, co lalo vakevo vatewesa manene ngwe mbeya uvanevila vana vendi mu civulili. Isho wapwa lishwalale wamukalu, vutsiki kesi kukala amo na vanu vendi.

⁹ A simbu ino vene amo navanda mu linzenzengoma nambe ku mutambela ukwavo. Omo Ndaviti alwisa vanu vove, co woshe akazivako akendeka ngwendi vanu vove vanavafungulula.

¹⁰ Co nameme vanalume vakusimpa, vaje kuvesi na lyova ngwe vindumba, vakakala na lyova omwo munu woshe mu Isalele nazivuka ngeci isho wapwa lishwalale wamukalu, na vanu vendi vaka-kulwa manene.

¹¹ Kunangula kwange kunapu oku, kungulula vaIsalele voshe uvake amo kutunda ku shongo imo ya lifuti, kweta ku shongo ikwavo, vapwe vavangi ngwe lishen̄avu lya ku ngenge ya mema a kalunga, co yove vavenya vene uvatwamenene mu nzita.

¹² Co tukawana Ndaviti kwoshe kuje kwali, co tukamulwisa simbu kanda azivuke vika vilingiwa. Naumo wai akasalao nambe ikeye nambe vanu vendi.

¹³ Nga ikeye akatewela mu nganda, co vanu vetu voshe vakanena mikole, co tukamukokela mu cana. Co kukukasala lalo limanya limo akamwa ya lilundu.”

¹⁴ Avisalome na vaIsalele voshe vendekele ngwavo, “Kunangula kwa Hushai kunapu kwakuvwa manene kutuvakana kunangula kwa Ahitofele.” Shukulu Kalunga wavwaesele ngeci kunangula kwakuvwa kwa Ahitofele kesi vacikave, ngeci vukalu vukaije ali Avisalome.

Ndaviti ananguka, co atewa

¹⁵ Ngecivene, Hushai walekele Zandoke na Aviyatale vaka-kukombelela, kunangula kuje kwanangwile Avisalome na vantwama va Isalele, co nakunangula kuje kwanangwile Ahitofele.

¹⁶ Co Hushai wendekele lalo ngwendi, “Zambulako ololo! Tuma munu kuli Ndaviti ngeci kesi akalale lalo vutsiki a myava ya mu mambo embwe, oloni akajavuke vwasi Yondau, ngeci ikeye na vanu vendi voshe kesi vakavakwate nakuvatsiya.”

¹⁷ Yonatana muna Aviyatale na Ahimaza muna Zandoke vavandamenene ku lisima lya kavwelu-vwelu lya Enelongele, anja ya Yelusalema, co ngamba wa munakazi wakele nakuyako nakuvanangula vije vilinakulingiwa, ngeci vakevo vaye nakulekako Mwene Ndaviti omwo kuvapandele kuvamona vakovela mu nganda.

¹⁸ Oloni nameme ngoco mukwenje umo wavamwene, walekele Avisalome, ngecivene, Yonatana na Ahimaza vazambwile kukavanda mu njuvo ya munalume umo wa ku Mbahulime. Ikeye wakele na lisima kuyehi na njuvo yendi, co vakovelelemo.

¹⁹ Co munakazi wa uje munalume wanonele cifwiko, nakufwika ku lisima, washandeleo vimbuto, co naumo wai wazivukile cuma cimo.

²⁰ Vamyata va Avisalome vezile ku njuvo nakwihula uje munakazi ngwavo, “Ahimaza na Yonatana vali kuli?” Co wavakumbulwile ngwendi, “Vanajavuka laja ndonga.” Co vaje vanu vavashakezekele oloni kuvavawanene, ngeci velukile ku Yelusalema.

²¹ Co omo vanai laja, co Ahimaza na Yonatana vatuukile mu lisima, vaile nakwambulula kuli Mwene Ndaviti. Vamulekele vutumbe vwa Ahitofele vwakumulwisa, vendekele ngwavo, “Zambula ujavuke ndonga.”

²² Ngecivene, Ndaviti na vanu vendi vashangumukile kujavuka Yondau, omo litangwa lyatuukile, lajoko vanajavuka.

²³ Omo Ahitofele wamwene ngeci kuvakavele kunangula kwendi, walondele a cimulu cendi welukile kwimbo lyendi. Omo wamanesele kuvwaesa vyendi vyoshe, walishukikile ikeye vavenya. Vamutsindile mu mbumbo ya naanga yendi.

²⁴ Ndaviti wetele ku nganda ya Mahanaime, a simbu ije Avisalome na vaIsalele vanajavuka laja Yondau.

²⁵ (Avisalome wengisile Amasa mu mwela wa Yowave kupwa muka-kushika nzita. Amasa wapwile muna Njetela kaIshimela. Vaina Avingaile, muna Nahashe ndokazi ya Zeluya vaina ya Yowave.)

²⁶ Avisalome na vanu vendi vatungile cilombo cavo mu lifuti lya Ngilyande.

²⁷ Omo Ndaviti wetele ku Mahanaime, waliwanene na Shovi muna Nahashe, wa ku nganda ya Lamba mu Amoni, na Makile muna Amiyele, wa ku Londembale, na Mbazilai, wa ku Longelime mu Ngilyande.

²⁸ Vanenele malonga, na vindeo vya vuma, na tumbilititi, na tiliku, na mbale ya maumwa, na vunga, na makasha-kasha a vimbuto, na makunde, na vyelu vyakasheke,

²⁹ na vuki, na mavele, na vimanga, na mavele akutunda ku vingombe. Vavinenele kuli Ndaviti na vanu vendi ngeci valye, omwo vayongwele ngwavo, “Vanu vanajuka vali na njala na lihwila mu mambo.”