2 Samwele 16 - Livulu lya Shukulu Kalunga

Ndaviti na Ziva

¹ Omo Ndaviti washelumukile kamandondo kutunda akamwa ya lilundu, waliwanene na Ziva, ngamba ya Mefimboshete, wakele na vimulu vavali vambatele mikasha ya makende 200, na makasha-kasha 100 a vushuka vwakutonola, na makasha-kasha 100 a vushuka vwakuma, na njeke ya cilambu ya vinyu.

² Mwene Ndaviti wamwihwile ngwendi, “Evi vyoshe unanene vyakulingisa vika?” Ziva wamukumbulwile ngwendi, “Vimulu vakulonda naanga ya mwene, makende na vushuka vikevyo vyakulya vanu, co vinyu vanwe vaje vanu vajuka kwenda mu mambo.”

³ Mwene wamwihwile ngwendi, “Mefimboshete, mutekulu wa shukulu yove Saulu ali kuli?” Co Ziva wakumbulwile ngwendi, “Ali mu Yelusalema, ikeye nendeka ngeci vaIsalele vakamwilwisila vumwene vwa kuku yendi Saulu.”

⁴ Co mwene wendekele kuli Ziva ngwendi, “Vyuma vyoshe vije vyapwile vya Mefimboshete ololo vinapu vyove.” Co Ziva wamukumbulwile ngwendi, “Njakandelelako, yange ngamba yove shukulu, njiwane kutetela ku mesho ove, shukulu mwene!”

Ndaviti na Shimei

⁵ Omo Mwene Ndaviti wetele ku Mbahulime, co umo wa vavushoko vwa Saulu, Shimei muna Ngela, wezile nakumushesha, oku alinakumusinga.

⁶ Shimei washangumukile kwasha mamanya Ndaviti na vamyata vendi, nameme Ndaviti vamwakele mukati vanu vendi na vaka-kunyunga.

⁷ Co Shimei wasingile Ndaviti nakwendeka ngwendi, “Ya! Ya! Muka-kutsiya! Ove ciyambangani!

⁸ Yove watambula vumwene vwa Saulu, co ololo Shukulu Kalunga alinakukuhisa omwo unatsii va ka naanga ya Saulu vavangi. Ololo Shukulu Kalunga naana Avisalome vumwene, co yove uli mu vukalu, yove muka-kutsiya!”

⁹ Avishai muna Zeluya, wendekele kuli mwene ngwendi, “Shukulu, omwo vikajo unecelela ou katali ngeci akusinge? Njitave njiye njikamuvatule mutwe!”

¹⁰ Co mwene wendekele kuli Avishai na kuli ndolome yendi Yowave ngwendi, “Evi kuvyamikundamene embwe. Nga ikeye alinakunjisinga omwo Shukulu Kalunga ikeye namuleke kulingamo, co iyajo ali na moko yakumwihula omwo vika alinakulingamo?”

¹¹ Ngecivene, Ndaviti wendekele kuli Avishai na kuli vamyata vendi voshe ngwendi, “Munange vene ikeye alinakushaka kunjitsiya, ngecivene, omwo vikajo mulinakukomoka ou kaMbenjemani? Shukulu Kalunga ikeye namuleke kunjisinga, ngecivene, mweceleni acilinge.

¹² Amo Shukulu Kalunga akamona tuyando twange, co akanjana vivezikiso kwingisa mu cisingo cendi.”

¹³ Asinoni Ndaviti na vanu vendi vaile vungenzi vwavo mu ngila. Co Shimei wavakavele, wetile kumukulo wa lilundu, oku alinakuvasinga nakuvasha mamanya nakuvashawila livu.

¹⁴ Mwene na vanu vendi vajukile manene omo vetele ku Yondau, co vahwimine kuje.

Avisalome mu Yelusalema

¹⁵ Avisalome na vaIsalele voshe vaile navo vakovelele mu Yelusalema, na Ahitofele wakele amo navo.

¹⁶ Co Hushai, musamba wa Ndaviti wa a mbunge, washeshele Avisalome nakutambeka ngwendi, “Mwene ayoye myaka yoshe! Mwene ayoye myaka yoshe!”

¹⁷ Avisalome wamwihwile ngwendi, “Vikajo vinalingiwa ku vumwene vwove kuli musamba wove Ndaviti? Omwo vikajo kuwaile nendi?”

¹⁸ Co Hushai wamukumbulwile ngwendi, “Vatijo njinesi kuya? Yange njili ku mutambela wa munu uje yanaangula Shukulu Kalunga, na vanu ava, na vaIsalele voshe. Yange njikakala amo nove.

¹⁹ A vyuma vyoshe evi iya injinapande kupangela, kuma kesi muna shukulu yange ndi? Muje munjapangelele isho, mukemwo munjikakupangela lalo nove.”

²⁰ Co Avisalome watengulukilile kuli Ahitofele wendekele ngwendi, “Ololo tuli kuno, vika utuleka ngeci tuvilinge?”

²¹ Co Ahitofele wamukumbulwile ngwendi, “Ya ukalale na mashano va mbanja va isho vaje vanaseza kunyunga lipela. Ngecivene, munu woshe mu Isalele akazivuke ngeci kuma isho napu citozi cove, co vanu vove vakapwa vakusimpa.”

²² Ngecivene, vashimbikilile Avisalome mbalaka akamwa ya ciluli cakusivama ca lipela, co ku mesho a vanu voshe Avisalome wakovelele, walalele na mashano va mbanja va ishe.

²³ Kunangula kwanangwile Ahitofele a matangwa aje, kwapwile vene ngwe lijwi lya Njambi, mukemwo mukwapwile kunangula kwa Ahitofele kuli Ndaviti na kuli Avisalome.