2 Samwele 15 - Livulu lya Shukulu Kalunga

Avisalome ayongola kutengulukila ishe Ndaviti

¹ Munima yevi, Avisalome walivwaeselele litemba na tuvalu, na vanalume makumi atanu vakumutwamenena.

² Ikeye wendukile mutondo waile nakwimana kumukulo wa ngila ya ku cikolo ca nganda. Co oshe aje ezila munu uje ali na n̄anda ngeci mwene aisompe, omo eta kuje, co Avisalome amusana amwihula oku kwatunda. Co nga uje munalume amuleka muyati kuje kwanatundu,

³ co Avisalome endeka ngwendi, “Kenga, n̄anda yove inavwaa, co lalo inashungama, oloni kukwesi muka-kwimanena mwene ngeci azive n̄anda yove.”

⁴ Co lalo wendekele ngwendi, “Nga njapwile muka-kusompa! Munu na munu woshe ali na mulonga nambe n̄anda nga aija kuli yange, co njikamuvatwila n̄anda yendi kujeneka civembulu.”

⁵ Omo munu ashwenya kuli Avisalome, co akulama nakukandelela, co Avisalome amushwenya, olola livoko lyendi amukwata, co amutsemba.

⁶ Avisalome walingile eci kuli vaIsalele voshe vaje vezile kuli mwene nakuvasompa, akulinga ngacije wakokweyeye vimbunge vyavo.

⁷ Omo kuneti myaka iwana Avisalome wendekele kuli Mwene Ndaviti ngwendi, “Shukulu, njitave njiye ku Hevelone njikashulise cikulaeso cinjalingile kuli Shukulu Kalunga.

⁸ Omo njakele mu Ngeshule mu Silya, njakulaesele Shukulu Kalunga ngwange nga akanjiilwisila ku Yelusalema, co njikamukombelela n̄ombelo ku Hevelone.”

⁹ Co mwene wendekele ngwendi, “Ya mu kwoloka.” Co Avisalome waile ku Hevelone.

¹⁰ Oloni Avisalome watumine miluwa ku miyati yoshe ya Isalele nakwendeka ngwendi, “Omo mukaziva kwoya kwa malupembo, co mukolumwina vingunda ngweni, ‘Avisalome ololo napu mwene ku Hevelone!’ ”

¹¹ Co kwakele vanalume 200 valanyele Avisalome kuya amolika nendi ku Hevelone, co vakevo kuvazivukile cuma cimo a vutumbe ovu, voshe vaile na mbunge imo.

¹² Co omo wakombelelele vin̄ombelo, Avisalome watumine lalo vanu ku nganda ya Ngilo nakusana Ahitofele, uje wapwile umo wa vaka-kunangula Mwene Ndaviti. Co vutumbe vwakulwisa mwene vwakolele, vanu vakavangeyeye Avisalome vapwile vavangi.

Ndaviti atewa kutunda mu Yelusalema

¹³ Co umo muluwa wanenele vukaleo kuli Ndaviti ngwendi, “VaIsalele vanatengulukila kuli Avisalome.”

¹⁴ Ngecivene, Ndaviti wendekele kuli vamyata vendi voshe vaje vakele amo nendi mu Yelusalema ngwendi, “Tuyeni vwasi nga tushaka kuputumuka kuli Avisalome! Zambuleniko! Amo ololo aija kuno nakutufungulula nakutsiya vanu voshe muno mu nganda!”

¹⁵ Co vamukumbulwile ngwavo, “Eyo, shukulu, twalivwaesela cimweja kulinga vyoshe viwendeka.”

¹⁶ Ngecivene, mwene waile, na naanga yendi, na vamyata vendi voshe vamukavele, kuvanga mashano va mbanja likumi, vakevo vasezele vanyunge lipela.

¹⁷ Omo mwene na vanu vendi voshe vatundile mu nganda, vemanene ku njuvo ya mamaneselelo.

¹⁸ Co vamyata vendi voshe vemanene kuyehi nendi omo vaka-kunyunga mwene vetile kulutwe lwendi. Mashwalale 600 va ku Ngate vaje vamukavele navo lalo vetile,

¹⁹ co mwene wendekele kuli ntwama yavo Itai ngwendi, “Omo vika ulinakuya amo netu? Iluka ngeci ukatumbame na mwene wamuhwa. Yove u muka-kwija, weja nakuliita kutunda ku lifuti lyove.

²⁰ Yove unakala muno simbu yaindondo lika, co omwo vikajo njikwendanganesela? Yange kunjizivuka noku njilinakuya. Iluka na vavushoko vwove, co ngozi ya Shukulu Kalunga na kulongwa kwendi vikale amo nove.”

²¹ Oloni Itai wamukumbulwile ngwendi, “Shukulu, njilisinga kuli yove mu lizina lya Shukulu Kalunga ngeci simbu yoshe njikaya amo nove kwoshe kuuyila, nameme kutsa, nameme kuyoya, ngamba yove nalivwaesa kuya amo nove.”

²² Co Ndaviti wamukumbulwile ngwendi, “Mwamuvwa, tuye.” Ngecivene, Itai waile amo na vanu vendi voshe na vaje vakundamene kuli ikeye.

²³ Vanu valilile manene omo vanu va Ndaviti vakatukile. Co mwene wajavukile muna ndonga Kindelone, oku vanu vendi valinakumukava, vaile amolika na ku ngila yakuya mu mambo.

²⁴ Zandoke muka-kukombelela wakele kuje, co na vaLevi vakele amo nendi, vambatele Cikasa ca Cikumiiyo cakujela. Vacitumbikile asi, co kuvacikakwile noo vanu voshe vatundile mu nganda. Aviyatale muka-kukombelela nendi kwakele.

²⁵ Asinoni mwene wendekele kuli Zandoke ngwendi, “Ilwiseni Cikasa ca Cikumiiyo ku nganda. Nga Shukulu Kalunga alinakuvwaelela nange, co litangwa limo akanjitava kwija nakucimona, nakumona lalo mutambela kuje cili.

²⁶ Oloni nga kavwaelela nange, co mwamuvwa ikeye alinge mwoshe mwashaka kulinga kuli yange.”

²⁷ Co mwene wendekele lalo kuli Zandoke ngwendi, “Kenga, ambata munove Ahimaza, na Yonatana muna Aviyatale mwiluke ku nganda mwende mu kwoloka.

²⁸ A simbu ije, njikavandamena ku myava yakujavukila mu mambo noo njikatambula majwi kuli yove.”

²⁹ Ngecivene, Zandoke, na Aviyatale velwisile Cikasa ca Cikumiiyo ku Yelusalema, co vakele kuje.

³⁰ Ndaviti walamatele ku Munkinda wa Olive nakulila, kazalele vin̄aku ku mendi endi, co wafwikile ku mutwe wendi kupwa cimweso ca vusiwa. Ngecivene, na voshe vaje vamukavele valifwikile ku mitwe yavo, co lalo valilile.

³¹ Omo Ndaviti vamulekele ngwavo Ahitofele nalipandakana na Avisalome mukumutengulukila, co Ndaviti walombelele ngwendi, “Shukulu Kalunga, pwisa kunangula kwa Ahitofele kupwe kwangoco!”

³² Omo Ndaviti wetele akamwa ya lilundu, kuje wakele nakulemesela, co musamba wendi wa a mbunge Hushai kaAleki wamusheshele wazalele vuzalo vwendi vwakutavozoka, co walishuwilile livu a mutwe wendi.

³³ Ndaviti wendekele kuli ikeye ngwendi, “Kuunjikwasa nga yove uya amo nange,

³⁴ oloni ukanjikwasa nga wiluka ku nganda nakuleka Avisalome ngwove, ‘Yange njikupangela na kulongwa ngwe munjapangelele isho.’ Co ukalinga mwoshe muunasela kupopolola kunangula kwa Ahitofele.

³⁵ Zandoke na Aviyatale vaka-kukombelela, navo kuvakakala, valeke vyuma vyoshe viwuzivuka mu lipela lya mwene.

³⁶ Vakevo vali na vana vavo va vanalume, Ahimaza muna Zandoke, na Yonatana muna Aviyatale, co yove wasa kuvatuma kuli yange nakunjileka majwi oshe awuziva.”

³⁷ Ngecivene, Hushai, musamba wa Ndaviti, welukile ku nganda a simbu ije yetele Avisalome nayo mu Yelusalema.