2 Samwele 14 - Livulu lya Shukulu Kalunga

Yowave avwaesa ngila yakwilwisilamo Avisalome

¹ Yowave wazivukile ngeci Mwene Ndaviti washakele kumona Avisalome omo kuneti simbu yakama kamumwene,

² ngecivene, Yowave watumine munakazi wakunyanyama wakele mu Tekowa. Omo uje munakazi wetele, co Yowave wendekele kuli ikeye ngwendi, “Likwise ngwe ulinakulila, zala vuzalo vwove vwakulila, kesi usakule vin̄ambu vyove, co kesi ulikwite mazi. Linga ngwe munakazi uje nakala simbu yakama nakulila.

³ Ngecivene, ya kuli mwene ukamuleke evi njikuleka.” Asinoni Yowave wamulekele vyakwendeka.

⁴ Co uje munakazi waile kuli mwene, watsikamene asi, wakulamene nakalemeso, wendekele ngwendi, “Njikwaseni, shukulu!”

⁵ Co mwene wamwihwile ngwendi, “Vika ushaka?” Wamukumbulwile ngwendi, “Mwane, yange njifwile wakuyanda, munalume wange watsa.

⁶ Co shukulu, yange ngamba yove njakele na vana vange va vanalume vavali, litangwa limo valingile vimata ku mahya, kukwakele munu wakuvakanda, co umo watsiya mukwavo.

⁷ Co ololo, mwane vavushoko vwange voshe vananjitengulukila, vashaka njivaane munange, ngeci vamutsiye omwo ikeye natsiile shongo yendi. Nga vamutsiya, co njikasala livoko mu mukoshi njikajeneka mwana wakushwana lizina lya munalume wange.”

⁸ Co mwene wamukumbulwile ngwendi, “Iluka kwimbo, njikelula a n̄anda eyi.”

⁹ Co munakazi wendekele ngwendi, “Shukulu, vuvi vukale ali yange, na a naanga ya tate, oloni mwene na naanga yendi kesi vakale na mulonga.”

¹⁰ Co mwene wamukumbulwile ngwendi, “Nga munu akuyandesa, munene kuno kuli yange, co kakakuyandesa lalo embwe.”

¹¹ Co uje munakazi wendekele ngwendi, “Shukulu, shukulu, lombela kuli Shukulu Kalunga Njambi yove, ngeci kavushoko kange ou ashaka kulinga shambandinga a kutsa kwa munange, kesi alinge mulonga wakama lalo wakutsiya munange mukwavo nasalako.” Co Ndaviti wamukumbulwile ngwendi, “Njikukulaesa ali Shukulu Kalunga wakuyoya ngwange munove kakavulumuka lalo embwe.”

¹² Co munakazi wendekele ngwendi, “Shukulu, shukulu, njitave njendeke cuma cimolika.” Co mwene wamukumbulwile ngwendi, “Mwamuvwa endeka.”

¹³ Co uje munakazi wendekele kuli mwene ngwendi, “Omo vikajo unalingi vuvi vwa cifwa cangacije ku vanu va Njambi? Yove kuwatavele munove eluke kutunda ku vunzinda, co ololo walihisa yove vavenya nevi unendeka.

¹⁴ Yetu voshe tukatsa, tunapu ngwe mema akwitikila asi, aje kuvasa kuwakungiya lalo. Njambi ikeye kesi kwilwisila munu mwonyo wendi, oloni mwene asa kuwana ngila yakwilwisa munu ku vunzinda.

¹⁵ Co ololo, shukulu, cuma canjinena njendeke kuli yove eci, vanu valinakunjijujwisa, mukemwo njalyendekesele mu mbunge yange ngwange njikendeka kuli mwene mukukulaela ngeci asa kulinga eci njimulomba.

¹⁶ Njayongwele ngwange wasa kunjitolilila nakunjamena kuli ou ashaka kutsiya yange na munange kututundisa ku vushwana vwa Njambi vuje vwaanene kuli vanu vendi.

¹⁷ Co njalyendekesele mu mbunge yange ngwange cikulaeso cove shukulu, casa kunjamena, omwo mwene napu ngwe kangelo ka Njambi, asa kwangununa vyavivwa ku vyavivi. Shukulu Kalunga Njambi yove akale amo nove!”

¹⁸ Co mwene wamukumbulwile ngwendi, “Njikwihula cihula, co unapande unjileke vushunga.” Co munakazi wamukumbulwile ngwendi, “Njihule coshe ciwunjihula, shukulu.”

¹⁹ Ndaviti wamwihwile ngwendi, “Yowave ikeye nakutumu ngeci wakwendeke evi vyoshe ndi?” Co munakazi wamukumbulwile ngwendi, “Mukemwo vene shukulu, njilisinga na vyoshe vije vyakujela, mwa vushunga vene ngamba yove Yowave ikeye nanjilekele mwakulinga nomu mwakwendeka.

²⁰ Oloni ikeye nalingi evi ngeci vyuma vyoshe vishungame. Omwo yove shukulu wakala na mana ngwe mana a kangelo ka Njambi nakuzivuka vyuma vyoshe vije vilingiwa.”

²¹ Munima yevi, mwene wendekele kuli Yowave ngwendi, “Njayongola kulinga ngwe muunashaka. Ya ukashake mukwenje Avisalome ngeci umunene kuno.”

²² Yowave watsikamene asi, co wakulamene ku mesho a Ndaviti nakalemeso, wendekele ngwendi, “Njambi akuvezikise, shukulu! Ololo njazivuka ngeci ulinakuvwaelela nange, omwo unatava cihula cange.”

²³ Asinoni wakatukile waile ku Ngeshule nakukashaka Avisalome kumunena ku Yelusalema.

²⁴ Nameme ngoco, mwene washikile ngwendi Avisalome kapandele lalo kukala mu lipela embwe. Mwene wendekele ngwendi, “Kunjishaka kumumona.” Ngecivene, Avisalome wakele mu njuvo yendi, co kakele nakusholoka ku mesho a mwene.

Ndaviti alyamba na Avisalome

²⁵ Mu Isalele mwoshe kumwakele wakutsimana manene na vuvwa ngwe Avisalome, ikeye kakele nakapenga nakamo kai kutunda ku mutwe kweta na ku mendi.

²⁶ Ikeye wakele na vin̄ambu vyavingi, co wakele nakuviteula lumo a mwaka, omo vinakolo manene nakulema. Vyakele na vulemu vwakutuvakana makilo avali kupwisa ku vulemu vuje vushakiwa.

²⁷ Avisalome wakele na vana vatatu va vanalume na mwana wa munakazi umolika lizina lyendi Tamale, wapwile munakazi wamuvwa manene.

²⁸ Co Avisalome wakele mu Yelusalema myaka ivali kamwene mwene.

²⁹ Asinoni wasanene Yowave, wamulombele ngeci amutume kuli mwene, oloni Yowave kezileko. Co Avisalome lalo wamusanene, co Yowave wavyanene kuyako.

³⁰ Ngecivene, Avisalome wendekele kuli vangamba vendi ngwendi, “Kengeni, lihya lya Yowave lili kuyehi na lihya lyange, co mukemwo munamene mbale ya maumwa. Yeni mukenyekemo.” Ngecivene, vaile nakwenyeka lije lihya.

³¹ Co Yowave waile ku njuvo ya Avisalome wamwihwile ngwendi, “Omwo vikajo vangamba vove vanenyeka lihya lyange?”

³² Avisalome wamukumbulwile ngwendi, “Yove wavyanene kwija omo njakusanene. Njashakele ngeci njikutume kuli mwene ukamwihule ngwove, ‘Omwo vikajo njatundilile ku Ngeshule nakwija kuno? Kuma capwile cacivwa kuli yange nga njatumbamene kuje vene.’ ” Co Avisalome wendekele ngwendi, “Ngecivene, njishaka unjitave ngeci njikalimone na mwene, co nga yange njili na mulonga, mwamuvwa anjitsiye.”

³³ Ngecivene, Yowave waile kuli Mwene Ndaviti wamulekele vije vyendekele Avisalome. Asinoni mwene wasanene Avisalome, co Avisalome waile kuli ikeye, wakulamene asi ku mesho a mwene. Co mwene wamukandelelele nakumutsemba.