2 Samwele 13 - Livulu lya Shukulu Kalunga

Aminone na Tamale

¹ Avisalome muna Ndaviti, wakele na ndokazi yendi wamuvwa wa muzike lizina lyendi Tamale. Co Aminone muna Ndaviti wamuzemene manene.

² Wamushungwiiye manene ngeci watundisileo nakuvinja, capwile cacikalu kuli Aminone kuwana Tamale, omwo ikeye wapwile mumbanda uje kanda alimone na munalume, kuvamutavesele kuliwana na vanalume.

³ Oloni Aminone wakele na musamba wendi walikeelela lizina lyendi Yonandave, muna Shamema ndolome ya Ndaviti.

⁴ Co Yonandave wendekele kuli Aminone ngwendi, “Yove unapu u muna mwene, oloni omwo vikajo a litangwa na litangwa njikakumono unazeye?” Aminone wamukumbulwile ngwendi, “Njizema Tamale, ndokazi ya shongo yange Avisalome wa mu limo lyeka.”

⁵ Co Yonandave wendekele kuli ikeye ngwendi, “Likwise kuvinja, ya ku vulili ukalale. Omo isho aija nakukumona, co endeka kuli ikeye ngwove, ‘Shukulu, njilekeleniko ndokazi yange Tamale aije akunjaneko vyakulya. Njimushaka akunjipangeleko vyakulya kuyehi nange kuje njasa kumumona, co anjanevyo!’ ”

⁶ Ngecivene, Aminone walikwisile kuvinja, co waile ku vulili nakulala. Co Mwene Ndaviti waileko nakumumona, Aminone wendekele kuli ikeye ngwendi, “Shukulu, njilekeleniko ndokazi yange Tamale aije kuno akunjilingileko makende amandondo akutovala kuyehi nange kuje njasa kumumona, co akunjanewo.”

⁷ Ngecivene, Ndaviti watumine lijwi kuli Tamale mu lipela ngwendi, “Ya ku njuvo ya ndolome yove Aminone ukamulingileko vyakulya.”

⁸ Co waileko, wamuwanene nalala a vulili. Tamale wanonele vunga, wavutikile, walingile makende akutovala kuyehi na Aminone ngeci amumone. Asinoni wocele mashama-shama a kuhima,

⁹ co waokwele wawatundisile a cikango ngeci Aminone alye, oloni Aminone wavyanene. Co wendekele ngwendi, “Leka vanu voshe vatuuke.” Co vanu voshe vatuukile.

¹⁰ Asinoni wendekele kuli ikeye ngwendi, “Nena owo mashama-shama a kuhima kuno ku vulili ngeci unjilisewo.” Co Tamale wanonele aje mashama-shama a kuhima wawatwalele kuli ikeye.

¹¹ Oloni omo wamwanenewo, co Aminone wamukwatele wendekele ngwendi, “Ija ku vulili vwange!”

¹² Co Tamale wamukumbulwile ngwendi, “Embwe ndolome yange. Kesi unjisindiye kulinga cuma ca shwamwa ngacije! Capwa cuma cacivi!

¹³ Nga njilinga ngacije, co vatijo njasa kukenga vanu? Nove ukapwa ngwe cilema umo wa mu Isalele. Ngecivene, njakulombo endeka kuli mwene, co akatava ngeci unjambate.”

¹⁴ Oloni Aminone katolililile kuli Tamale, co Tamale kakele na nzili yakutuvakana Aminone, ngeci Aminone wakwatele Tamale wamuwisile, co walingile nendi vuvi.

¹⁵ Aminone wazindile manene Tamale, co cizindo cendi catuvakanene cizemo cije camuzemene akulivanga. Co wendekele kuli ikeye ngwendi, “Tuuka anja!”

¹⁶ Oloni Tamale wakumbulwile ngwendi, “Embwe, kunjisheka ngacije cinapu mulonga wakama manene kutuvakana eci unalingi!” Oloni Aminone kamutolililile,

¹⁷ wasanene ngamba yendi wendekele kuli ikeye ngwendi, “Tundisa ou mumbanda ku mesho ange! Munakwile anja, pata ku cikolo!”

¹⁸ Co uje ngamba wanakwilile Tamale anja, co wapatele ku cikolo. Tamale wazalele cikoveyo cacilaja mavoko, vuzalo vuvakele nakuzala vana va vimyene va vanakazi va kushomboka a matangwa aje.

¹⁹ Walishuwilile lito ku mutwe wendi, co watavwile cikoveyo cendi, walikwatele mbimbi-mutwe oku aya nakulila.

²⁰ Omo ndolome yendi Avisalome wamumwene, wamwihwile ngwendi, “Aminone nakulingi mwamuvi ndi? Kesi ulinyenge embwe. Ikeye napu ndolome yove wa mu limo lyeka, ngecivene, kesi ulekeko munu cuma eci cinalingiwa.” Ngecivene, Tamale wakele mu njuvo ya Avisalome wombwele.

²¹ Omwo Mwene Ndaviti wazivile vije vyalingiwile, waluvalele manene.

²² Co Avisalome wazindile manene Aminone omwo wawisile ndokazi yendi Tamale nakulinga nendi vuvi, co kendekele nendi lalo.

Avisalome alinga shambandinga Aminone

²³ Omo kwetile myaka ivali, Avisalome watewile vimanga vendi ku Mbale Hazole, kuyehi na limbo lya Efalime, co walanyeleko vana va mwene voshe.

²⁴ Co waile kuli Mwene Ndaviti nakwendeka ngwendi, “Shukulu, yange njikateula vimanga vange. Citava yove na vamyata vove kwija nakukala ku ciwano eci ndi?”

²⁵ Mwene wamukumbulwile ngwendi, “Embwe, munange. Cikapwa cacikalu manene kuli yove nga yetu voshe twijako.” Co Avisalome wasindiiye mwene, oloni mwene anga vene katavele, oloni wavezikisile Avisalome.

²⁶ Oloni Avisalome wendekele ngwendi, “Mwamuvwa, kuma kucitava shongo yange Aminone aye amo netu ndi?” Co mwene wamwihwile ngwendi, “Omwo vikajo ushaka kuya nendi?”

²⁷ Oloni Avisalome wakele nakumusindiya noo mwene watavele Aminone na vana vendi voshe kuya amo na Avisalome. Avisalome wavwaesele vyakulya vyafwila mwene,

²⁸ co Avisalome washikile vangamba vendi ngwendi, “Kengeseseni mwamuvwa Aminone omo nanu manene, co njimishika ngwange mutsiyeni, kesi mukale na lyova embwe. Yange njinamishiki. Pweni vaka-kusimpa kesi muzive lyova!”

²⁹ Ngecivene, vangamba vakavele mashiko a Avisalome, vatsiile Aminone. Co voshe vana va Ndaviti vasaleleo valondele a vimulu vavo vatewele.

³⁰ Omo simbu vakele mu ngila yakwiluka kwimbo lyavo, valekele Ndaviti ngwavo, “Avisalome natsii vana vove voshe, naumo wai nasalao!”

³¹ Co mwene wakatukile, watavwile vuzalo vwendi mukuviilila, co walalele asi. Co vangamba vaje vakele kuje amo nendi navo lalo vatavwile vuzalo vwavo.

³² Oloni Yonandave, muna Shamema mukulunu wa Ndaviti, wendekele ngwendi, “Shukulu, kuvatsiile vana vove voshe embwe, kuvanga Aminone lika ikeye ivanatsii. Avisalome ikeye nashiki cuma eci ngeci cilingiwe, omwo mbunge yendi inakala nakuvavala kutunda a simbu ije Aminone wawisile ndokazi yendi Tamale nakulinga nendi vuvi.

³³ Ngecivene, kesi ukulaele muzimbu ou ngwavo vana vove voshe vanatsi embwe, Aminone lika ikeye natsi.”

³⁴ A simbu ije Avisalome watewele. Co aje vene uje lishwalale muka-kunyunga wandwile mesho, co wamwene mbunga yakama ilinakushelumuka ku lilundu ku ngila yakutundilila ku Holonaime. Co waile kuli mwene nakwambulula vije namono.

³⁵ Co Yonandave wendekele kuli Ndaviti ngwendi, “Vana va mwene valinakwija, ngwe muje mwanendekele ngamba yove.”

³⁶ Acimanese vene kwendeka ngacije, vana va Ndaviti vezile, vashangumukile kulila, Ndaviti na vamyata vendi lalo valilile manene.

³⁷ Oloni Avisalome watewele, waile kuli Talemai muna Amihunde, mwene wa ku Ngeshule. Co Ndaviti walilile munendi Aminone simbu yakama.

³⁸ Avisalome wakakele kuje ku Ngeshule myaka itatu.

³⁹ Oloni omo Ndaviti wamanesele kulila Aminone, wakele nakushungwiya kumona munendi Avisalome.