2 Samwele 12 - Livulu lya Shukulu Kalunga

Lijwi lya Natane nakulitavela kwa Ndaviti

¹ Shukulu Kalunga watumine Natane muka-kwimanena kuli Ndaviti. Natane waile kuli ikeye wendekele ngwendi, “Kwakele vanalume vavali vakele mu limbo limolika, umo wapwile muka-kufuka, mukwavo wapwile kautu.

² Co muka-kufuka wakele na vingombe, na vimanga vavangi manene,

³ oloni uje kautu wakele lika na manga umolika yalandele. Wamunyungile mwamuvwa, co wakolelele mu njuvo yendi amolika na vana va uje kautu. Wamulisile vyakulya vyendi, wanwililile mu nganja yendi, nakulala a mendi endi, uje manga wafwile ngwe mwana wa munakazi kuli uje kautu.

⁴ Litangwa limo kwezile mungenzi ku njuvo ya muka-kufuka. Co uje muka-kufuka kashakele kutsiya cimuna cendi ngeci ajumbule uje mungenzi, oloni wambatele manga ya uje kautu, wajumbwile uje mungenzi wendi.”

⁵ Co Ndaviti waluvalele manene ali uje muka-kufuka, wendekele ngwendi, “Njilisinga ali Shukulu Kalunga wakuyoya ngeci ou munalume nalingi eci napande kutsa!

⁶ Omwo nalingi cuma ca muuka, napande kwingisamo vimanga vawana kutuvakana uje yanambatele.”

⁷ Co Natane wendekele kuli Ndaviti ngwendi,“Uje munalume wakufwa ngacije ni, napu yove vene. Omu mukemwo mwanendeka Shukulu Kalunga Njambi ya Isalele ngwendi, ‘Njakupwisile mwene wa mu Isalele nakukwamena kuli Saulu.

⁸ Co njakwanene vumwene vwendi na munakazi wendi, njakupwisile mwene kushwana Isalele na Yunda. Nga evi vyapwile vyavindondo, nga njakuwezelelako luvali ku evi ulinavyo.

⁹ Ngecivene, omwo vikajo kuwononokele kushika kwange? Omwo vikajo unalingi vuvi vwangacije? Yove unatsiisa Uliya mu nzita, unatava vaAmoni vamutsiye, ngeci unambata munakazi wendi!

¹⁰ Co ololo, mu cisemwa na cisemwa ca vatekulwila vove vamo vakatsa ku monde omwo kuwanjononokele, co lalo unambata munakazi wa Uliya.

¹¹ Njalisingi ngeci njikalingisa umo wa ku naanga yove kunena vukalu ali yove. Ukacimona omo njikakutambula vanakazi vove nakuvana kuli munalume weka, co ikeye akalala navo mutanya mwelu.

¹² Yove wacilingile mu vushweke, oloni yange njikacilinga mutanya mwelu ngeci Isalele yoshe vakacimone.’ ”

¹³ Ndaviti wendekele ngwendi, “Njinalingi vuvi kuli Shukulu Kalunga.” Co Natane wamulekele ngwendi, “Shukulu Kalunga nakusambesa ku vuvi vwove, kuukatsi embwe.

¹⁴ Oloni omwo unamwesa kashaundu kangacije kuli Shukulu Kalunga akulinga evi, munove akatsa.”

¹⁵ Asinoni Natane waile kwimbo lyendi. Co Shukulu Kalunga watumine mushongo kuli uje muna Ndaviti wasemukile kuli munakazi wa Uliya, wavinjile manene.

Kutsa kwa muna Ndaviti

¹⁶ Co Ndaviti walombelele kuli Njambi ngeci mwanike enduke. Co Ndaviti wavyanene kulya cuma cimo, vutsiki na vutsiki wakovelele ku mulili wendi, nakulala asi.

¹⁷ Vamyata vendi va mu mbanja vaile kuli ikeye vesekele kumwindula, oloni wavyanene, co lalo kalile vyakulya amo navo.

¹⁸ Co omo kuneti matangwa atanu na avali mwanike watsile, vamyata va Ndaviti vakele na lyova lyakumuleka kutsa kwa mwana. Vendekele ngwavo, “Omo mwanike wakele nakuyoya, Ndaviti kasele kutukumbulula omo twendekele nendi. Co vatijo twasa kumuleka ngwetu munove natsi? Amo alivulumuna ikeye vavenya!”

¹⁹ Omo Ndaviti wavamwene valinakuliyevetela, wanangukile ngeci mwanike natsi. Ngecivene, wavehwile ngwendi, “Mwanike natsi ndi?” Vamukumbulwile ngwavo, “Eyo, natsi.”

²⁰ Co Ndaviti wendukile asi, wajwelele, nakusakula vin̄ambu vyendi, wazalele vuzalo vweka. Asinoni waile nakulemesa mu Njuvo ya Shukulu Kalunga. Omo welukile ku lipela, walombele vyakulya, co vamunenelelevyo, walile.

²¹ Co vamyata vendi vendekele ngwavo, “Kutwazivisisile mwamuvwa a evi, omo mwanike nakele na mwonyo, wamulilile nakulikela kulya, oloni omo natsi, unatumbama nakulya!”

²² Co Ndaviti wavakumbulwile ngwendi, “Eyo, njalikelele kulya, njalilile omo mwanike wakele na mwonyo. Njayongwele ngwange amo Shukulu Kalunga anjizivilako mema ku mbunge, munange enduka katsi.

²³ Oloni muje mwanatsi, co vikajo njilikelela kulya lalo? Kuma yange njasa kwilwisila mwanike mwonyo ndi? Yange njikaya kuje kwanai, oloni ikeye kakeluka lalo kuli yange embwe.”

Kusemuka kwa Solomoni

²⁴ Asinoni Ndaviti wazembelekele munakazi wendi Mbateshemba. Walimwene nendi, co wakitile mwana wa munalume, uje yalukile lizina lya Solomoni. Shukulu Kalunga wazemene mwanike ou,

²⁵ co washikile Natane muka-kwimanena aluke mwanike lizina lya Njendindiya, omwo Shukulu Kalunga wamuzemene.

Ndaviti afungulula Lamba

²⁶ A simbu ije vene Yowave walwisile Lamba, nganda yakama ya vaAmoni, nakuyifungulula.

²⁷ Co watumine miluwa kuli Ndaviti wamulekele ngwendi. “Njinalu na Lamba, co njinafungulula mitambela ivakatekwila mema.

²⁸ Co ololo kungulula mashwalale vove vaje vasalao, mwije mwakulwise eyi nganda ngeci wakuyitambule. Kutewa nga yange njiifungulula, co ikatsimanena lizina lyange.”

²⁹ Ngecivene, Ndaviti wakungulwile mashwalale vendi, waile ku Lamba, nakuyilwisa, co waifungulwile.

³⁰ Ngecivene, Ndaviti wambatele cilongo ca ngolinde cakele ku mutwe wa kamponya Moleki njambi ya vaAmoni. Cilongo cije vacipeselesele makilo akupwa 35, co cakele na limanya lya seo yakama lije vatungilile kumo na cilongo. Co Ndaviti wambatele cije cilongo, wacakele ku mutwe wendi. Co lalo wambatele vije vyapukwile muje mu nganda,

³¹ co Ndaviti waakele vanu vamo ku vipangi vyakuselala mavaya, vamo ku matemo, vakwavo ku vinjaviti, co vamo wavapangesele ku vindopi. Walingile cuma eci kuli vanu voshe va mu vinganda vyeka vya vaAmoni. Asinoni ikeye na vanu vendi velukile ku Yelusalema.