2 Samwele 10 - Livulu lya Shukulu Kalunga

Ndaviti afungulula vaAmoni na vaSilya

¹ Omo kuneti simbu, Mwene Nahashe wa vaAmoni watsile, co munendi Hanune washwanene a vumwene.

² Co Mwene Ndaviti wendekele ngwendi, “Njinapande kusholola cizemo cacivwa kuli Hanune, ngwe muje mwalingile ishe Nahashe kuli yange.” Ngecivene, Ndaviti watumine miluwa nakumulilisa ku kutsa kwa ishe. Co omo vaje miluwa vetele mu Amoni,

³ vantwama va vaAmoni vendekele kuli mwene ngwavo, “Kuma wayongola ngwove cinapu kasingimiko kuli isho omo Ndaviti natumu vanu vendi kuli yove nakukulilisa ndi? Kesi ngoco embwe! Navatumu kuno nakunenga nakwilula nganda, ngeci akatufungulule!”

⁴ Ngecivene, Hanune wakwatele vaje miluwa va Ndaviti, wavatewile minjezi yavo mutambela umolika, co watetangele vuzalo vwavo kuvupwisa a vinyonga, co wavashekele.

⁵ Vakele na shwamwa manene yakwiluka kwimbo. Omo Ndaviti wazivile vije vyalingiwile, co wavatuminine majwi akuvavindika ngeci vakale ku Yeliko kesi veluke noo minjezi yavo inamene lalo.

⁶ Omo vaAmoni vanangukile ngeci Ndaviti napu citozi cavo, co vakumwine mashwalale va vaSilya 22,000 va ku Mbetelehove, na Zova, amo na vanalume 12,000 va ku Tove, co mwene wa ku Maka wezile na vanu vendi 1,000.

⁷ Omo Ndaviti wazivile vije vyalingiwile, watumineko Yowave na mashwalale voshe nakuvalwisa.

⁸ VaAmoni vatuukile nakulikwalaleka ku vukovelelo vwa Lamba, nganda yavo yakama, co vaSilya na vanalume vaje vatundile ku Tove na ku Maka, valikwalalekele mushandangala yangoco.

⁹ Omo Yowave wamwene ngeci vitozi vakamulwisila kulutwe na kunima, co waangwile mashwalale va nzili mu Isalele, wavakwalalekele ngeci valikenge na vaSilya.

¹⁰ Co wakundikile mashwalale voshe vaje vasaleleo mu mavoko a ndolome yendi Avishai, ikeye wavakwalalekele ngeci valikenge na vaAmoni.

¹¹ Co Yowave wendekele kuli Avishai ngwendi, “Nga umona vaSilya valinakunjihyana, co ija wakunjikwase, oloni nga njimona vaAmoni valinakukuhyana, co njiija njakukukwase.

¹² Kala na nzili nakusimpa! Tulwileni na nzili vanu vetu na vinganda vya Njambi yetu. Co cizango ca Shukulu Kalunga cilingiwe!”

¹³ Ngecivene, Yowave na vanu vendi vaile nakulwa, co vaSilya vatewele.

¹⁴ Omo vaAmoni vamwene vaSilya valinakutewa, co navo lalo vatewele kutunda kuli Avishai nakwiluka mu nganda. Asinoni Yowave walikelele kulwisa vaAmoni, welukile ku Yelusalema.

¹⁵ Omo vaSilya vamwene ngeci vanavafungulula kuli vaIsalele, vakungulwile mashwalale vavo amolika.

¹⁶ Mwene Handandezele wasanene vaSilya vaje vakele mu kangombe ka yambi ku mutambela wa Ndonga ya Yufuleti, vezile ku Helame akushika kwa Shovake, muka-kushika nzita ya Mwene Handandezele wa ku Zova.

¹⁷ Omo Ndaviti wazivileko, wakungulwile mashwalale va Isalele, vajavukile Ndonga ya Yondau, vaile ku Helame, co vaSilya valikwalalekele nakulikenga nendi. Co vashangumukile kulwa,

¹⁸ co vaIsalele vashekele mbunga ya mashwalale va vaSilya. Co Ndaviti na vanu vendi vatsiile vanu 7,000 vaka-kwendesa matemba a vaSilya, na vanu 40,000 vaka-kwendela a tuvalu, co vavetwesele Shovake, muka-kushika mashwalale, watsililile kuje vakele nakulwila.

¹⁹ Omo vaje vimyene vapwile vindungo va Handandezele vamwene ngeci vanavafungulula kuli vaIsalele, valiitile kuli Ndaviti ngeci vapwe vinzinda vendi. Co vaSilya vakele na lyova lyakukwasa vaAmoni lalo.