2 Samwele 1 - Livulu lya Shukulu Kalunga

Ndaviti aziva kutsa kwa Saulu

¹ Munima ya kutsa kwa Saulu, Ndaviti welukile kuje waile nakufungulula vaAmaleke, co wakele mu Zikelange matangwa avali.

² Co alikaki, kwezile mukwenje watundile ku cilombo ca Saulu. Wakele na vusiwa, watavwile vuzalo vwendi, walishuwilile livu ku mutwe wendi. Co waile kuli Ndaviti watsikamene asi mukumusingimika.

³ Co Ndaviti wamwihwile ngwendi, “Utunda kuli?” Co ikeye wamukumbulwile ngwendi, “Njapituka ku cilombo ca vaIsalele.”

⁴ Co Ndaviti wendekele kuli ikeye ngwendi, “Njileke, vika vinalingiwako?” Co wamukumbulwile ngwendi, “Mashwalale vetu vanatewa ku nzita, co vanu vetu vavangi vanavatsii. Co lalo Saulu na munendi Yonatana vanavatsii.”

⁵ Co Ndaviti wamwihwile ngwendi, “Wazivuka vati ngeci Saulu na Yonatana vanatsi?”

⁶ Co mukwenje wendekele ngwendi, “Mukwenda cintulu njetele a Munkinda wa Ngilembowa, co njamwene Saulu najendamena ku likunga lyendi, matemba na mashwalale va tuvalu twa vitozi vakele nakushwenya kuli ikeye.

⁷ Co omo wakenukile kunima, wanjimwene, ngecivene, wanjisanene. Co njatavele ngwange, ‘Yange uno shukulu!’

⁸ Co wanjihwile ngwendi, ‘Yove iya?’ Njamulekele ngwange, ‘Yange nji kaAmaleke.’

⁹ Asinoni wendekele ngwendi, ‘Ija kuno unjitsule njavetwa mwamuvi manene, njili kuyehi na kutsa.’

¹⁰ Ngecivene, njaile nakumutsula, omwo njazivukile ngwange kasa kuyoya omwo nau laja. Asinoni njatundisile cilongo ku mutwe wendi na mushele ku livoko lyendi, ngeci njavinene kuli yove, shukulu yange.”

¹¹ Ndaviti watavwile vuzalo vwendi mukuviilila, co vanu vendi lalo voshe vatavozwele vuzalo vwavo.

¹² Valinyengele manene nakulila, valikelele kulya noo cingwezi omwo Saulu, na Yonatana, na vaIsalele, vanu va Shukulu Kalunga, omwo vavangi manene vatsile mu nzita.

¹³ Ndaviti wehwile uje mukwenje wanenele nzimbu ngwendi, “Yove watundu kuli?” Mukwenje wamukumbulwile ngwendi, “Yange nji kaAmaleke, oloni njakala muno mu lifuti lyove.”

¹⁴ Co Ndaviti wamwihwile ngwendi, “Omwo vikajo kuwakele na lyova lyakutsiya mwene uje yaangwile Shukulu Kalunga?”

¹⁵ Co Ndaviti wasanene munalume umo wa akati ka vanu vendi, co wamulekele ngwendi, “Mutsiye!” Co uje munalume wamupupile, co watsile,

¹⁶ co Ndaviti wendekele ku civimbi ca uje kaAmaleke ngwendi, “Maninga ove akale a mutwe wove vavenya. Yove vavenya walihisa omo walitavela ngwove yove watsiile mwene uje yaangwile Shukulu Kalunga.”

Ndaviti alila Saulu na Yonatana

¹⁷ Ndaviti wembile mwaso ou wakulila Saulu na munendi Yonatana,

¹⁸ co washikile ngeci vaulongese kuli vanu va mu Yunda. (Vausoneka mu Livulu lya Njashale.)

¹⁹ “Vantwama vetu vanatsila a malundu a Isalele! Mashwalale vetu vakusimpa vanau!

²⁰ Kesi muvyambulule mu Ngate, nambe mu vitapalo vya Ashekelone. Kutewa vambanda va vaFilisitiya vavwaelela, kutewa vambanda va vaje vaka-kujeneka kukulaela vavwaelela.

²¹ “Nyonzi nambe lime kesi viwile a malundu a Ngilembowa, mahya ao kesi akale na vyakulya simbu yoshe. Omwo vintelo vya vaka-kusimpa vyapokokelele aje vene na shwamwa, ntelo ya Saulu kuvakaikwiti mufwitilo na mazi lalo.

²² Vuta vwa lusipa vwa Yonatana vwapwile vwavukalu, mukwale wa Saulu kuwatetelele, wakele nakuwisa vaka-nzili, nakutsiya vitozi.

²³ “Saulu na Yonatana, vapwile vaka-cizemo cakukomokesa manene, mu mwonyo na mu kutsa kuvalyangunukile, ku lumbisi vahyanene vingonga, co ku nzili vahyanene vindumba.

²⁴ “Eni vanakazi vaIsalele, lileni Saulu! Ikeye washoveyeye vuzalo vweni na mamanya a seo yakama a ngolinde.

²⁵ “Vatijo mashwalale vakusimpa vanau nakuvatsiila mu nzita! Yonatana nalala ngumbanga mu malundu, natsi.

²⁶ “Njikulila yove ndolome yange Yonatana, njakuzemene manene! Cizemo cove kuli yange capwile cakukomokesa manene, capwile cakama manene kutuvakana cizemo ca vanakazi.

²⁷ “Vatijo mashwalale vakusimpa vanau, na vitwa vyavo vya nzita kuvyesi na seo lalo.”