2 Petulu 2 - Livulu lya Shukulu Kalunga

Valongisi va makuli

¹ Oloni ku san̄ulu kwasholokele vaka-kwimanena va makuli akati ka vanu, co mu cifwa eci vene, valongisi va makuli vakasholoka lalo akati keni. Vakevo vakanena vilongesa vyavivi vyakunyongesa vyakujeneka vushunga, nakuvyana Shukulu yavo uje wavovwele, co vakalinenela vakevo vavenya kunyonga kwa vwasi-vwasi.

² Nameme ngoco, vavangi vakakavangeya vingila vyavo vya vuvi, co omwo a vije vanalingi, vanu vamo vakendeka vyavivi a Ngila ya vushunga.

³ Co mu cipululu cavo, ava valongisi va makuli vakawana nganyo akumileka tusimilili. Omwo a simbu yakama ololo Lyaako wavo nalivwaesela cimweja, co Muka-kunyongesa wavo ali laja mu mesho!

⁴ Omwo Njambi katetelele tungelo vaje valingile vuvi, oloni wavombilile mu mbulu ya tuhya muje vanavakutiiya mu malyenge mu lisusulungu, nakuvandamena Litangwa Lyakusompa.

⁵ Njambi katetelele kaye ka ku san̄ulu, oloni watumine livazi a kaye ka vanu vaka-vuvi, oloni wovwele lika Nowa, uje wambulwile vushunga, co na vanu veka lalo vatanu na vavali.

⁶ Njambi wahisile vinganda vya Sondoma na Ngomola, wavinyongesele na tuhya, co wavipwisile cimweso ali vije vikalingiwa kuli vaka-vuvi.

⁷ Ikeye wovwele Lote, muka-vushunga, uje wayandele omwo futisi yaivi ya vanu vakujeneka mashiko.

⁸ Omwo munu uje muka-vushunga wayoyele akati kavo, co a litangwa na litangwa ikeye wayandele nakukemanga omwo wamwene nakuziva vilinga vyavo vyavivi.

⁹ Ngecivene, Mwene azivuka vati amena vanu vaka-vushunga kutunda ku vyeseko vyavo, co lalo vati anyunga vaka-vuvi akuvanyanyamesa a Litangwa Lyakusompa,

¹⁰ vunene kuli vaje valinakukavangeya mashungu amavi a muvila nakushaula moko ya Njambi. Ava valongisi va makuli vapwa vakwamuka nakujeneka lyova, kuvesi kusholola kasingimiko kuli vaka-vumpau vaje vali akamwa, oloni vakevo valinakuvashaula.

¹¹ Nameme tungelo, vaje vali na nzili yakama manene kutuvakana ava valongisi va makuli, kuvesi kuvavangela na kashaundu ku mesho a Mwene.

¹² Oloni vanu ava valinakupanga na mana ngwe a tusitu, vasemukilile mu shwata nakuvakwata na mukuvatsiya, vakevo valinakulwisa na kashaundu vyuma vije kuvazivisisa. Vakavanyongesa ngwe tusitu,

¹³ vakatambula fweto ya n̄avava omwo a n̄avava ije vanenelele vakwavo. Kuvwaelela kwavo kukekwo kulinga cuma cimo mutanya mwelu ngeci vakutise mashungu a mivila yavo, vakevo vakaziva shwamwa nakuviilila omo valipandakana neni akulya, okuco kuvwaelela kwavo kunapu kwa makuli!

¹⁴ Vakevo kuvashaka kukenga a cuma ceka kuvanga akulinga vupangala, lilaku-laku lyavo lya vuvi kulyesi kujauka. Vakatwamenena vanu vakakuzeya ngeci vatse mu mweto. Vimbunge vyavo vyalilongesa kukala na cipululu. Vakevo vali mwisi ya cisingo ca Njambi!

¹⁵ Vanaseza ngila yakushungama, co vanazimbalesa ngila yavo, vanakavangeya ngila yakavele Mbalame muna Mbeole, uje wazemene vimbongo vije vyakawana a vilinga vyavivi,

¹⁶ oloni vamukandele a vuvi vwendi. Cimulu wendekele ngwe munu nakuvindika vilinga vya kuzaluka vya muka-kwimanena.

¹⁷ Vanu ava vanapu ngwe masima atuvwelu-vwelu akuma, ngwe mashelwa akupekumuka na lihunzi lyakama, Njambi navavwaesela mwela mu lisusulungu lyakuzivala vwii.

¹⁸ Vakevo vakendeka na kulyalesa na majwi a vulema, co vakapangesa mashungu amavi a muvila mukukwata vaje vashaka kuputumuka akati ka vanu vaje valinakuyoya mwamuvi.

¹⁹ Vavakulaesa kupatuka, oloni vanapu vindungo va futisi yakunyonga, omwo tunapu tu vindungo va cuma coshe cije cinatushwana.

²⁰ Omwo nga vanu vanaputumuka ku vinzili vyakuviya vya kaye a mana avo ali Mwene yetu na Muyoyesi wetu Yesu Kilistu, co lalo vakwatiwa ku vikevyo nakuvafungulula, vanu va cifwa cangacije kuviya kwavo kwakukotoka kukatuvakana manene kuje kwakulivanga.

²¹ Omwo nga capwile cacivwa kuli vakevo kujeneka kuzivuka ngila ya vushunga kutuvakana kuyizivuka, co vatengulukila kweka nakutunda ku lishiko lije lyakujela lije livavaanene.

²² Vije vyalingiwile kuli vakevo visholola ngeci kuma visimo vinapu vya vushunga ngwavo, “Katali elukila vije vyanashanja,” co “Ngulu uje ivanajwelesa aya nakulilomba mu mandova.”