2 Petulu 1 - Livulu lya Shukulu Kalunga

¹ Mukanda wakutunda kuli yange Simoni Petulu, ngamba na muluwa wa Yesu Kilistu. Njilinakusoneka kuli vaje, a vushunga vwa Njambi yetu na Muyoyesi wetu Yesu Kilistu vanavana kukulaela kwa seo yakama manene ngwe yetu vene.

² Kutetela na kwoloka vikale amo neni akuzivuka Njambi na Yesu Mwene yetu.

Kwangula nakusana kwa Njambi

³ Nzili ya vuNjambi vwendi inatwana vyuma vyoshe vije tunajeneka mukuyoya kwakuvwa kwa vuNjambi akutuzivuka kuli uje natusana ngeci tulipangele vumpau na vuvwa vwendi.

⁴ Mu ngila eyi vene ikeye natwana vwana vwakama vwa seo vuje wakulaesele, ngeci a vwana ovu mwase kutunda ku lishungu lije linyongesa lije lili muno mu kaye, ngeci mwije mulipangele cifwa ca vuNjambi.

⁵ Omwo a cuma eci, lingeni na nzili kuwezelelako vuvwa kukukulaela kweni, ku vuvwa vweni wezeleleniko mana,

⁶ co ku mana eni wezeleleniko kulinyunga, co ku kulinyunga kweni wezeleleniko lukakateya, co ku lukakateya lweni wezeleleniko vuNjambi,

⁷ co ku vuNjambi vweni wezeleleniko cizemo ca vuka-Yesu, na ku cizemo ceni ca vuka-Yesu wezeleleniko cizemo.

⁸ Evi vikevyo vyuma munapande kukala navyo, co nga mulinavyo mu vungi, vikevyo vikamilingisa kupwa vaka-kupanga na vaka-kwima vushuka mu mana eni ali Mwene yetu Yesu Kilistu.

⁹ Oloni nga kumwesi navyo, munapu tupuputwa, kumwasa kumona, co munevala ngeci vanamijelesa ku vuvi vweni vwalaja.

¹⁰ Ngecivene, vasamba vange, esekeni manene na nzili kupwisa kusana nakwangula kweni ngwe vyuma vyeni vya myaka yoshe, omwo nga mulingamo, co kumukatundu kukukulaela kweni.

¹¹ Mu ngila eyi vene, vakamyana moko yakukovela mu Vumwene vwa Mwene yetu na Muyoyesi wetu Yesu Kilistu vuje vya myaka yoshe.

¹² Ngecivene, simbu yoshe njikamyanukisa vyuma evi, nambe yeni mwavizivuka laja, co munemana mbe mu vushunga vuje munatambula.

¹³ Njayongola lika ngwange mwamuvwa kuli yange kumyanukisa vyuma evi omo njicili nakuyoya.

¹⁴ Omwo njazivuka ngwange ololo njikashulula muvila uno wakuvola, ngwe mwanjilekele Mwene yetu Yesu Kilistu.

¹⁵ Co njikalinga na nzili kumyana ngila ngeci simbu yoshe omo yange njinatsi mwase kwanuka vyuma evi.

Vakaleo va vumpau vwa Kilistu

¹⁶ Omwo kutwakavele visimo vyakutunda ku mana a vanu mukumyambulwila vya kwija kwa Mwene yetu Yesu Kilistu mu nzili. Na mesho etu vavenya twamwene vukama vwendi.

¹⁷ Netu kutwakele omo vamwanene kasingimiko na vumpau kuli Ishe Njambi, omo lijwi lyezile kuli Ikeye lyakutunda kuli uje Mutwe wa Vumpau ngwalyo, “Ou ikeye Munange injazema, muli ikeye njilinakuvwaelela.”

¹⁸ Yetu vene twazivile lijwi eli lyatundile mwilu, omo twakele nendi a munkinda wakujela.

¹⁹ Ngecivene, twasimpile na muzimbu uje watundile mwilu uje uvambulwile vaka-kwimanena. Nga mutolilila ku muzimbu ou, co mulinga mwamuvwa, omwo unapu ngwe ndeya ilinakutwila ceke mu lisusulungu noo Litangwa linaki na ceke ca litota lya mutondo linatwila ceke mu vimbunge vyeni.

²⁰ Nameme ngoco, akamwa ya vyoshe evi, anukeni ngeci naumo wai wetu asa ikeye vavenya kunungulula a lijwi lya vuka-kwimanena mu Visoneka.

²¹ Omwo kukwesi lijwi lya vuka-kwimaneana lyezile kutunda ku cizango ca munu, oloni vanu vavatwamenenene kuli Munzinzime Wakujela omo vambulwile lijwi lije lyatundile kuli Njambi.