2 Mizimbu 9 - Livulu lya Shukulu Kalunga

Vungenzi vwa vamwene wa ku Shemba

¹ Omo vamwene wa ku Shemba wazivile lutsimo lwa Solomoni, co waile ku Yelusalema mukumweseka na vihula vyakukaluwa. Waile na vanu vavangi manene, na tumelo vambatele n̄undu, na mamanya a seo yakama, na ngolinde yaingi manene. Omo waliwanene na Solomoni, wamwihwile vihula vyoshe vije vyakele mu mbunge yendi.

² Co Solomoni wavikumbulwile vyoshe, kukwakele cuma cacikalu conwene kulumbununa.

³ Co vamwene wa ku Shemba wazivile mana a Solomoni, co wamwene lipela lije lyatungile.

⁴ Co wamwene vyakulya vije vivamunenelele ku mesa yendi, na vinjuvo vya vamyata vendi, nakulivwaesela kwa vanu va mu lipela lyendi, na vuzalo vwakulifwa vuje vazalele vanu vendi, na vyakuzala vya vangamba vaje vamuvandamenene ku viwano, na vin̄ombelo vyakombelelele mu Njuvo ya Shukulu Kalunga. Co vyoshe evi vyamukomokesele manene.

⁵ Co wendekele kuli mwene ngwendi, “Evi vinjazivile mu lifuti lyange ali yove na a mana ove vinapu vya vushunga!

⁶ Oloni kunjakulaelele vije vivanjilekele vanu kuvanga omo njinaija mukulimwena yange vavenya na mesho ange. Nameme vivanjilekele a mana ove vyapwile vyavindondo lika oloni mwa vushunga vene u muka-mana kutuvakana muje vanjilekelelemo.

⁷ Vanu valinakukupangela vanavezika manene, vanu ava simbu yoshe vali ku mesho ove nakuziva vyendeka vyove vya mana!

⁸ Wakushangazala Shukulu Kalunga Njambi yove! Ikeye namwesa kuvwaelela kwendi akukupwisa mwene ushwane mu lizina lyendi. Omwo ikeye wazema vanu vendi va Isalele, co ashaka kuvanyunga ku myaka yoshe, ikeye nakupwisa mwene yavo ngeci unyunge mashiko na vushunga.”

⁹ Co vamwene wa ku Shemba waanene vwana vwezile navwo kuli Mwene Solomoni. Makilo akutuvakana 4,000 a ngolinde, na n̄undu yaingi manene na mamanya a seo yakama. Co n̄undu yamwanene vamwene wa ku Shemba yatuminine manene ije kanda ayitambuleo nambe simbu ya kunima.

¹⁰ (Co vanu va Mwene Hilame na vanu va Mwene Solomoni vaje vanenele ngolinde ya ku Ofila vanenele lalo viti vya njunipa na mamanya a seo yakama.

¹¹ Solomoni wapangesele viti vije kupwa vindendelo vyakulondela mu Njuvo ya Shukulu Kalunga na mu lipela lyendi, co lalo wavishongele tulyalya, na visanzi vya vaka-kwimba. Vyapwile viti vyavivwa manene vya njunipa vije kanda vacivinene lalo mu lifuti lya Yunda.)

¹² Mwene Solomoni waanene vamwene wa ku Shemba vyuma vyoshe vije vyalombele. Vije vyapwile vyakukumbasanako ku vije Solomoni waanene vamwene ku vwana vuje vamwene vaanene Solomoni vwakujeneka kulomba. Ngecivene, ikeye na vangamba vendi velukile ku lifuti lya Shemba.

Vufuko vwa Mwene Solomoni

¹³ A mwaka na mwaka Mwene Solomoni wakele nakutambula ngolinde yakweta ku makilo 23,000,

¹⁴ amo na lisimu vakele nakufweta vaka-kulanda nakulandulula. Vimyene va ku Alambiya na vanguvulu va mu mitambela ya Isalele vamunenelele lalo siliva na ngolinde.

¹⁵ Solomoni wafulile vintelo vyakama vyakupwa 200, co ntelo imo na imo vaifwikile na ngolinde ya makilo atanu na avali,

¹⁶ co lalo wafulile vintelo vyavindondo vyakupwa 300, na vikevyo lalo vavifwikile na ngolinde ya makilo atatu. Co vintelo vyoshe vije wavitulikilile mu Njuvo ya ku Shwata ya Lembanone.

¹⁷ Mwene Solomoni washongele lalo litanda lyakama. Mutambela walyo wapwile wakufwika na mayo a vinjamba. Co mitambela ikwavo vaifwikile na ngolinde yaivwa.

¹⁸ Lije litanda lyakele na vindendelo vitanu na imo, na vulyatelo vwa mendi vwakufwika na ngolinde. Ku mutambela umo na umo wa litanda kwakele vyakukambeka mavoko, co ku mutambela umo na umo wa litanda kwakele cimweso ca ndumba.

¹⁹ Ku shongo ya vindendelo kwakele vimweso likumi na vivali vya vindumba umo na umo ku shongo ya ndendelo imo. Co kukwakele litanda lyakulifwa na lije mu vumwene vweka lalo.

²⁰ Vinganja vyoshe vyanwililile Mwene Solomoni vyapwile vya ngolinde, na vivala vyoshe vya mu Njuvo ya ku Shwata ya Lembanone na vikevyo lalo vyapwile vya ngolinde yaivwa manene. Kuvapangesele lalo siliva, omwo kuyakele na seo a matangwa a Mwene Solomoni.

²¹ Mwene Solomoni wakele na mato amangi manene aje akele nakuya amo na mato a Mwene Hilame. Omo kuneti myaka itatu, mato endi akele nakunena ngolinde, na siliva, na mayo a vinjamba, na vanamaundu, na vin̄ima.

²² Mwene Solomoni watuvakanene vimyene voshe va mu kaye ku vufuko na mana.

²³ Co vanu voshe vakele nakwija kuli ikeye nakutolilila ku mana endi aje amwanene Njambi.

²⁴ Munu na munu wanenele vwana, vivala vya siliva na ngolinde, na vuzalo vwa vulaja, na vitwa, na n̄undu, na tuvalu, na vimulu. Eci calingiwile a mwaka na mwaka.

²⁵ Co Mwene Solomoni wakele lalo na macakana akupwa 4,000 mwakwaka matemba endi, na tuvalu vakupwa 12,000. Vamo vakele mu Yelusalema, co vaje vasaleleo wavaakele mu vinganda vyakuliseza-seza.

²⁶ Ikeye wapwile mwene wakama kutuvakana vimyene voshe va mu lifuti kutunda ku Ndonga ya Yufuleti kweta ku Filisitiya na ku nginga ya Ingito.

²⁷ A simbu yakushwana kwendi, siliva yapwile yaingi mu Yelusalema ngwe mamanya angoco, na miti ya kendale yatumine manene ngwe miti ya mikuyu mu lifuti lya ku vushelumukilo vwa malundu lya mu Yunda.

²⁸ Solomoni walandele tuvalu ku Ingito na ku mitambela yeka ya lifuti.

Kushwana kwa Solomoni

²⁹ Vilinga vya Solomoni kutunda kukushangumuka kweta nakukukotoka vavisoneka mu Livulu lya Mizimbu lya Natane Muka-kwimanena, na mu livulu lya Vuka-kwimanena vwa Ahiya wa ku Shilo, na mu livulu lya Vimona vya Indo Muka-kwimanena, vije vinendeka lalo akushwana kwa Mwene Yelovowame wa mu Isalele.

³⁰ Solomoni wapwile mwene wa mu Yelusalema na mu Isalele mwoshe a myaka makumi awana.

³¹ Solomoni watsile, co vamutsindile mu Nganda ya Ndaviti, co munendi Lehovowame washwanene a litanda lyendi kupwa mwene.