2 Mizimbu 8 - Livulu lya Shukulu Kalunga

Vilinga vya Solomoni

¹ Solomoni wambatale myaka makumi avali kutunga Njuvo ya Shukulu Kalunga na lipela lyendi.

² Co lalo watungulwile vinganda vije vyamwanene Mwene Hilame, co waakelemo va Isalele.

³ Solomoni wafungulwile lifuti lya Hamate, na Zova,

⁴ wasitile cimpaka cakukola ku nganda ya Palemeyela mu mambo. Watungulwile vinganda vyoshe vya mu Hamate vyakele mukati vije vyapwile vyakutulikila vyuma.

⁵ Co Solomoni watungulwile lalo vinganda vya Mbete Holone ya ku vulamatelo, na Mbete Holone ya ku vushelumukilo (vyapwile vinganda vya vimpaka na vikolo vyakupata),

⁶ na nganda ya Mbalate, na vinganda vyoshe vyakutulikila, na vinganda muje mwakele tuvalu na matemba endi a nzita. Na vyoshe vyashakele kutungila mu Yelusalema, na mu Lembanone, na mu mafuti oshe aje ashwanene.

⁷ Co vatekulwila va vaHiti, va vaAmoli, va vaPelezi, va vaHivi, na va vaNjevushi, kuvapwile vaIsalele, oloni vapwile

⁸ vatekulwila va vaje vasalele mu lifuti, vaje vanu va Isalele kuvavanyongesele, co Solomoni wavapwisile vindungo kweta na ku lelo lino.

⁹ Solomoni kapwisile vaIsalele vindungo. Wavapwisile mashwalale, na vamyata, na vaka-kutwamenena matemba a nzita, na vaka-kulonda a tuvalu.

¹⁰ Kwakele vamyata vakupwa 250 vaje vapangesele vanu vaje vapangele vipangi vyoshe vya Solomoni vyakutunga.

¹¹ Solomoni wajalwisile munakazi wendi, uje wapwile muna mwene wa ku Ingito, wamutundisile mu Nganda ya Ndaviti, co wamutwalele ku njuvo ije yamutungilile. Wendekele ngwendi, “Munakazi wange kapandele kukala mu lipela lya Mwene Ndaviti wa Isalele embwe, omwo mwela woshe kuje kunakala Cikasa ca Cikumiiyo unapu wakujela.”

¹² Co Solomoni wakombelelele vin̄ombelo kuli Shukulu Kalunga a mutula uje watungile kulutwe lya Njuvo ya Shukulu Kalunga.

¹³ Wakombelelele vin̄ombelo vya kwenyeka ngwe ku Lishiko lya Mosesa a litangwa na litangwa lyakujela. A Matangwa Akuhwima, na a Viwano vya Kutenama kwa Ngonde, na a viwano vitatu, na a Ciwano ca Makende Akujeneka Musima, na a Ciwano ca Kuteja, na a Ciwano ca Mapapela.

¹⁴ Akukavangeya mashiko aje aakele ishe Ndaviti, wavwaesele vipangi vya vaka-kukombelela vya a litangwa na litangwa, na vya vaLevi vaje vakele nakulikwasa na vaka-kukombelela kwimba myaso amolika nakupanga vipangi vyavo. Co wemikile lalo vaka-kunyunga ku Njuvo ya Shukulu Kalunga ngeci vase kupanga vipangi vyavo vyakunyunga ku cikolo cimo na cimo a litangwa na litangwa ngwe ku mashiko a Ndaviti, munu wa Njambi.

¹⁵ Co mashiko aje aanene Ndaviti kuli vaka-kukombelela na vaLevi a vinjuvo vyakutulikila na a vyuma vyeka, co vavikavele nakuvinyunga mwamuvwa.

¹⁶ A simbu ije vipangi vyoshe vya Solomoni vavimanesele. Kushangumukila kukwinda luvula lwa Njuvo ya Shukulu Kalunga kutwala kukumanesela kwayo, vipangi vyoshe vyendele mwamuvwa.

¹⁷ Asinoni Solomoni waile ku Eziongembele, na Elata, vikuma vya ku Linema lya Akava mu lifuti lya Endome.

¹⁸ Mwene Hilame wamutumine mato akama vaatwamenenene kuli vamyata vendi, vakele nakuwajavula kuli vaje vazivukile vingila vya mu mema. Co vaile ku lifuti lya Ofila amo na vamyata va Solomoni, co vanenelele Solomoni vinjeke vya ngolinde vyakutuvakana makilo akupwa 15,000.