2 Mizimbu 7 - Livulu lya Shukulu Kalunga

Kukundika Njuvo ya Shukulu Kalunga

¹ Omo Mwene Solomoni wamanesele lilombelo lyendi, co tuhya twatundile mwilu, twenyekele vin̄ombelo vije vivakombelelele, co vumpau vwa Shukulu Kalunga vwashulisile Njuvo.

² Omwo Njuvo yashulile na vumpau vwa Shukulu Kalunga, co vaka-kukombelela kuvasele kukovelamo.

³ Omo vanu va Isalele vamwene tuhya tutunda mwilu, na vumpau vuje vwashulisile Njuvo ya Shukulu Kalunga, co vatsikamene asi, valemesele Njambi nakumushangala omwo vuvwa vwendi na cizemo cendi cije kucesi kutenguluka cakala ku myaka yoshe.

⁴ Asinoni, Mwene Solomoni na vanu vendi voshe vakombelelele vin̄ombelo kuli Shukulu Kalunga.

⁵ Wakombelelele vingombe vakupwa 22,000, na vimanga vakupwa 120,000 kupwa milambu ya kulitombola. Ngecivene, mwene na vanu voshe vakundikile Njuvo ya Shukulu Kalunga.

⁶ Co vaka-kukombelela vemanene mu myela ije ivavaanene, vemanene nakukenga kuli vaLevi, co vashangazalele Shukulu Kalunga na vyakwimbisa vije vyapangele Mwene Ndaviti, vembile mwaso ngwavo, “Cizemo cendi cije kucesi kutenguluka!” Ngwe muje mwavalekele Ndaviti. Co vaka-kukombelela vembile malupembo omo vanu voshe vemanene.

⁷ Solomoni wajelesele mutambela wa akati ka cipango, mwela wa kulutwe lwa Njuvo ya Shukulu Kalunga, co vakombelelele kuje vin̄ombelo vya kwenyeka vyamutunu, na milambu ya vimbuto vya vinona, na mazi a vimuna kupwa milambu ya kulitombola. Walingile vije omwo mutula wa vunengu uje wapangele wapwile waundondo manene ku milambu yoshe ije.

⁸ Co Solomoni na vanu voshe va Isalele valingile Ciwano ca Mapapela a matangwa atanu na avali. Co kwakele vanu vavangi manene kutunda ku Ngila ya ku Hamate ku kunto na ku nginga ya ku Ingito mu mbwela.

⁹ Co vamanesele matangwa atanu na avali akukundika mutula na matangwa akwavo lalo atanu na avali a ciwano. Co a litangwa lyakumanesela, vamanesele ciwano,

¹⁰ co a litangwa lyamumakumi avali na atatu ku ngonde yamucitanu na vivali, Solomoni washikile vanu veluke ku membo avo. Co voshe vamushangazalele a vivezikiso vyoshe vije vyaanene Shukulu Kalunga kuli vanu vendi va Isalele, na kuli Ndaviti, na kuli Solomoni.

Njambi alisholola lalo kuli Solomoni

¹¹ Omo Mwene Solomoni wamanesele kutunga Njuvo ya Shukulu Kalunga, na lipela, na vyuma vyoshe vyeka vije vyashakele kutunga,

¹² co Shukulu Kalunga walisholwele lalo kuli ikeye ku vutsiki. Wendekele kuli ikeye ngwendi, “Njinazivi lilombelo lyove, co njinatava Njuvo eyi iwunatungu kupwa mwela uje kuvakakombelela vin̄ombelo kuli yange.

¹³ Oshe aje anjivindikila nyonzi, nambe anjitumina vimbimba valye vimbuto, nambe kutuma mushongo wakulitambwisa ali vanu vange,

¹⁴ nga vanu vange vaje vanaliluku lizina lyange vakalikeesa, nakulombela, nakushakezeka cizango cange nakutenguluka ku vingila vyavo vya vuvi, co njikavaziva oku njili mwilu, njikavasambesa ku vuvi vyavo, co lifuti lyavo likakala mwamuvwa.

¹⁵ Njikanyunga Njuvo eyi, nakuziva malombelo oshe avakalombela mu mwela uno,

¹⁶ omwo njinaangula Njuvo eyi nakuyijelesa kupwa mwela uvakanjilemesela ku myaka yoshe. Njikainyunga nakuyivwaesa simbu yoshe.

¹⁷ Nga ukanjipangela mwamuvwa na kulongwa ngwe mwalingile isho Ndaviti, nga wononoka mashiko ange nakulinga vyuma vyoshe vije njakushiki,

¹⁸ co njikanyunga cikulaeso cange cije njalingile na isho Ndaviti, omo njamulekele ngwange vatekulwila vendi vakevo vakashwana Isalele simbu yoshe.

¹⁹ Oloni nga yove nambe vanu vove kumwononoka mashiko ange na vizilika vyange evi njinamyana, co mukalemesa vinjambi veka,

²⁰ co njikamitundisa mu lifuti lyange lije linjamyanene, co lalo njikavyana Njuvo eyi injinajelesa kupwa mwela wakunjilemesela. Co vanu voshe vakaisimutwiya nakushendumuna Isalele.”

²¹ “Ololo Njuvo eyi vanaisingimika manene, oloni munu woshe aketilako akalisimoka nakulikomokela, co akehula ngwendi, ‘Omwo vikajo Shukulu Kalunga nalingi eci ku lifuti lino na ku Njuvo eyi?’

²² Co vanu vakakumbulula ngwavo, ‘Omwo vanu va Isalele vasezele Shukulu Kalunga Njambi yavo, uje watundisile vakukulwila vavo ku Ingito. Vanongumuka na vinjambi veka nakuvalemesa. Ngecivene, Shukulu Kalunga nanena tuyando otu ali vakevo.’ ”