2 Mizimbu 5 - Livulu lya Shukulu Kalunga

¹ Omo Mwene Solomoni wamanesele vipangi vyoshe vya Njuvo ya Shukulu Kalunga, co wakovelesele vyuma vyoshe vije vyakundikile ishe Ndaviti kuli Shukulu Kalunga, siliva, na ngolinde, na vyuma vyeka, co wavyakele mu mulili yakutulikila mu Njuvo ya Shukulu Kalunga.

Solomoni akovelesa Cikasa ca Cikumiiyo mu Njuvo ya Shukulu Kalunga

² Asinoni Mwene Solomoni wasanene vantwama voshe va miyati na vikota vya Isalele vaije kuli ikeye ku Yelusalema ngeci vakashake Cikasa ca Cikumiiyo ca Shukulu Kalunga ku Siyone, Nganda ya Ndaviti, ngeci vacinene ku Njuvo ya Shukulu Kalunga.

³ Co voshe vezile ku Ciwano ca Mapapela.

⁴ Omo vantwama voshe vanakunguluka, co vaLevi vakakwile Cikasa ca Cikumiiyo,

⁵ vacitwalele ku Njuvo ya Shukulu Kalunga. Co vaka-kukombelela na vaLevi lalo vatwalele Mbalaka Mwakuliwanena na vivala vyayo vyoshe ku Njuvo ya Shukulu Kalunga.

⁶ Mwene Solomoni na vanu va Isalele voshe vakungulukilile kulutwe lwa Cikasa ca Cikumiiyo, nakukombelela vimanga na vingombe, vaje vapwile vavangi manene kuvasele kuvalava.

⁷ Asinoni vaka-kukombelela vambatele Cikasa ca Cikumiiyo nakucaka mu Njuvo ya Shukulu Kalunga, co vacitumbikile mu Mwela Wakujela Manene, mwisi ya vakelumbi va mambava.

⁸ Co mambava avo akujanjavala afwikilile kumo Cikasa na mikambo ije ivacambatelele.

⁹ Co mikambo yapwile yailaja manene ngeci vishongo vyayo vasele kuvimona akwimana kulutwe lwa Mwela Wakujela Manene, oloni mikambo kuvasele kuyimona vaka-anja. (Co ije mikambo na lelo lino kuyicili.)

¹⁰ Kumwakele cuma ceka lalo muje mukati ka Cikasa ca Cikumiiyo kuvanga vije vitale vya mamanya vivali vyaakelemo Mosesa ku Munkinda wa Sinai, omo Shukulu Kalunga walikumiiye na vanu va Isalele omo vatundile mu Ingito.

Vumpau vwa Shukulu Kalunga

¹¹ Vaka-kukombelela voshe vaje vakeleko valijelesele, nambe vakundamene ku munga ika nambe ika.

¹² Co vaLevi voshe vaje vapwile vaka-kwimba, Asafe, na Hemane, na Njendutune, na vanu va ku vikota vyavo, vazalele vuzalo vwa linyu. Co vaLevi vemanene ku mutambela wa mu ngangela kuyehi na mutula vakwatele vingenjo, na tulyalya, amo na vaka-kukombelela vakupwa 120 vaje vakele nakwimba malupembo.

¹³ Vaka-kwimba valikumbasanene mukwimba malupembo, na vingenjo na vyakwimbisa vyeka omo vakele nakushangazala Shukulu Kalunga. Vembile ngwavo, “Shangazaleni Shukulu Kalunga, omwo ikeye wapwa wamuvwa, cizemo cendi cakala ku myaka yoshe.” Omo vaka-kukombelela vatundile mu Njuvo ya Shukulu Kalunga, co lishelwa lyakovelele nakushulisa mu Njuvo ya Shukulu Kalunga ngeci vaka-kukombelela kuvasele kwilukilamo nakupanga vipangi vyavo,

¹⁴ omwo vumpau vwa Shukulu Kalunga vwashulisile Njuvo ya Shukulu Kalunga.