2 Mizimbu 4 - Livulu lya Shukulu Kalunga

Vivala vya mu Njuvo ya Shukulu Kalunga

¹ Mwene Solomoni watungile mutula wa vunengu, wapwile mamita atanu na awana mu vwihi, co mu vulaja wapwile mamita awana na litambelo.

² Co watungile lalo lizau lya mema lya vunengu, lyamuzinguluke lyakupwa mamita 2.2 mu kulova, na mamita 4.4 kutunda kumukulo umo kweta kumukulo ukwavo, lyoshe lyapwile lyamuvundungulu, vukama vwalyo vwapwile mamita 13.2.

³ Co ku shongo yoshe ya kanwa ka lizau kwakele mikana ivali ya vishuwa vya vunengu. Co vije vishuwa vya cifwa ca vingombe, vavikumbasanene amolika na lizau.

⁴ Lije lizau lyemanene a myongo ya vingombe likumi na vavali va vunengu vaje valikengesele vinima, co ku mutambela umo na umo kwakengele vingombe vatatu.

⁵ Co mitambela ya lizau yapwile mamilimita 75 a kuhima ngwe mbanda ya livoko. Co kanwa kalyo kafwile ngwe kukanwa ka nganja, yakutaleka akamwa ngwe vishani vya man̄anda. Co lije lizau lyashulile na mema akutekula mu viyenjo vyakupwa malita 60,000.

⁶ Co ikeye lalo wapangele vimbashiya likumi, vitanu vavyakele ku mutambela wa mu mbwela wa ku Njuvo ya Shukulu Kalunga, vitanu lalo vavyakele ku mutambela wa ku kunto. Vikevyo vyapwile vyakukushungwila vilyo vya vimuna vaje vavakele nakwenyeka mukukombelela vin̄ombelo. Co aje mema akele mu lizau lyakama apwile akujwela vaka-kukombelela.

⁷ Co wapangele vitumbikilo vya vindeya likumi vya ngolinde, ngwe muvamulekele kuvilinga, co wavyakele mu mulili wakama wa mu Njuvo ya Shukulu Kalunga, vitanu ku cilyo, vitanu ku cimoshwe.

⁸ Co wapangele lalo vimesa likumi, wavyakele mu Njuvo ya Shukulu Kalunga, vitanu ku cilyo, vitanu ku cimoshwe. Co wapangele malonga a ngolinde akupwa 100.

⁹ Watungile cipango cakama ca vaka-kukombelela, na cipango cakama, na mapito a ku vipango, waafwikile na vunengu.

¹⁰ Co waakele lizau kumukulo wa mu mbwela ya ngangela ku Njuvo ya Shukulu Kalunga.

¹¹ Co Hulame washongele vindeo, na vifwosholo, na malonga. Ngecivene, Hulame wamanesele vipangi vyendi vyoshe vyapangelele Mwene Solomoni vya mu Njuvo ya Shukulu Kalunga, walingile

¹² vimanda vivali vya kulutwe lwa Njuvo ya Shukulu Kalunga, na mitwe ivali ya vimanda na vimweso vya malyenge akuvinda a mutwe wa manda imo na imo.

¹³ Co na mapomingilanete a vunengu akupwa 400 mu mikana ivali umo na umo 100 kuzengulwisa vije vyakucakeya ku mutwe umo na umo wa manda.

¹⁴ Wapangele matemba likumi, na vimbashiya likumi, na lizau.

¹⁵ Co na vingombe likumi na vavali vakele mwisi ya lizau.

¹⁶ Co lalo na vindeo, na vifwosholo, na vimbonde vya mishomo. Vyoshe evi vyapwile vivala vya mu Njuvo ya Shukulu Kalunga, vije Hulame walingilile Mwene Solomoni. Vyoshe vyapwile vyakukwita mufwitilo wa vunengu.

¹⁷ Vyoshe evi mwene wavifulilile mu lutengo lwa mukati ka Sukote na Zelenda mu Cana ca Yondau.

¹⁸ Ngecivene, valingile vyuma vyavingi vije naumo wai wasele kulava vulemu vwa vunengu vuje vapangesele.

¹⁹ Mwene Solomoni wapangele lalo vivala vya ngolinde vya mu Njuvo ya Shukulu Kalunga, mutula, na vimesa vya makende akukombelela kuli Njambi,

²⁰ na citumbikilo ca vindeya na vindeya vyavivwa vya ngolinde vije vyakele nakushukuma kulutwe lwa Mwela Wakujela Manene ngwe muvayongwelelemo,

²¹ vishani vyakucakeya, na vindeya, na vimana,

²² na vyakuzimisa vindeya, na malonga, na vimbashiya vya insense, na vikango vyakwambatela manungu a tuhya. Vivala vyoshe evi vavilingile na ngolinde yakujela. Mapito a anja ya Njuvo ya Shukulu Kalunga, na mapito a ku Mwela Wakujela Manene vyapwile vya ngolinde.