2 Mizimbu 36 - Livulu lya Shukulu Kalunga

Mwene Yowahaze wa mu Yunda

¹ Ngecivene, vanu va mu Yunda vaangwile Yowahaze muna Yosiya, co vamuvwavesele mazi nakumupwisa mwene mu Yelusalema.

² Yowahaze wapwile mwene wa mu Yunda omo wakele na myaka makumi avali na myaka itatu, co washwanene mu Yelusalema vingonde vitatu.

³ Co Mwene Neko wa ku Ingito wamupwisile cinzinda, co wafwetesele Yunda mulambu wa makilo a siliva akupwa 3,400 na makilo a ngolinde akupwa 34.

⁴ Mwene Neko waakele Elyakime ndolome ya Yowahaze a vumwene vwa mu Yunda, co watengulwile lizina lyendi kupwa Yehoyakime. Mwene Neko watwalele Yowahaze ku Ingito.

Mwene Yehoyakime wa mu Yunda

⁵ Yehoyakime wapwile Mwene wa mu Yunda omo wakele na myaka makumi avali na myaka itanu, co washwanene mu Yelusalema myaka likumi na umo. Walingile vuvi ku mesho a Shukulu Kalunga Njambi yendi.

⁶ Co Mwene Nevukaneza wa Mbambilone walwisile Yunda, wafungulwile Yehoyakime, vamukutile malyenge, vamutwalele ku Mbambilone.

⁷ Nevukaneza wambatele vufuko vwa mu Njuvo ya Shukulu Kalunga, co wakavwakele mu lipela lyendi mu Mbambilone.

⁸ Vyuma vyoshe vije vyalingile Yehoyakime, vilinga vyendi vya vunyengwe na vuvi vuje vwalingile, vavisoneka muLivulu lya Mizimbu ya Vimyene va mu Isalele na mu Yunda. Co munendi Yehoyakine wamushwanene kupwa mwene.

Mwene Yehoyakine wa mu Yunda

⁹ Yehoyakine wakele na myaka likumi na itanu na itatu omo wapwile mwene wa mu Yunda, co washwanene mu Yelusalema vingonde vitatu na matangwa likumi. Nendi lalo walingile vuvi ku mesho a Shukulu Kalunga.

¹⁰ Omo simbu ya nyangao yetele, Mwene Nevukaneza watwalele Yehoyakine ku Mbambilone nakumupwisa cinzinda, co wambatele vufuko vwa mu Njuvo ya Shukulu Kalunga. Asinoni Nevukaneza wapwisile Zendekiya inanu ya Yehoyakine mwene wa mu Yunda na mu Yelusalema.

Mwene Zendekiya wa mu Yunda

¹¹ Zendekiya wapwile mwene wa mu Yunda omo wakele na myaka makumi avali na mwaka umo, co washwanene mu Yelusalema myaka likumi na umo.

¹² Walingile vuvi ku mesho a Shukulu Kalunga, kalikeesele ku mesho a Njelemiya muka-kwimanena, uje wendekele majwi akutunda kuli Shukulu Kalunga.

Kuwa kwa Yelusalema

¹³ Zendekiya watengulukilile Mwene Nevukaneza nakumulwisa, uje wamusindiiye alisinge mu lizina lya Njambi ngeci akapwe wa kulongwa. Oloni katavele, co welukile kuli Shukulu Kalunga, Njambi ya Isalele.

¹⁴ Co lalo vantwama va mu Yunda, na vaka-kukombelela, amolika na vanu, vakavangeyeye vilinga vyavivi vya miyati ije yavazengelekele nakulemesa tumponya, mu ngila eyi vajwalesele Njuvo ya Shukulu Kalunga, ije yajelesele vavenya Shukulu Kalunga.

¹⁵ Co Shukulu Kalunga, Njambi ya vakukulwila vavo, wakele nakutuma vaka-kwimanena vanangule vanu vendi, omwo wakele na ngozi navo, na Njuvo yendi.

¹⁶ Oloni vanu vashendumwine miluwa va Njambi, vombwanesele majwi endi, co vajolele vaka-kwimanena vendi, noo akukotoka vukalu vwakama vwa Shukulu Kalunga vwakele ali vanu vendi, ngeci naumo wai waputumukile.

¹⁷ Ngecivene, Shukulu Kalunga wavanenelele mwene wa Mbambilone kwakuvalwisa. Co mwene watsiile vakwenje va mu Yunda nameme vene vaje vakele mu Njuvo ya Shukulu Kalunga. Ikeye katetelele munu embwe, mukwenje nambe mukulunu, munalume nambe munakazi, muka-kuvinja nambe mukangule. Njambi wavakundikile voshe kuli ikeye.

¹⁸ Co Mwene wa Mbambilone wapukwile Njuvo ya Shukulu Kalunga, na vufuko vwamwo, na vufuko vwa mwene na vamyata vendi, watwalele vyuma vyoshe ku Mbambilone.

¹⁹ Wenyekele Njuvo ya Shukulu Kalunga, amolika na nganda, na mapela amwo oshe, na vufuko vyamwo, co wasiwile civumbe ca nganda.

²⁰ Watwalele vanu vaje vasaleleo ku Mbambilone, co vakamupangelele ikeye nakupangela lalo vatekulwila vendi ngwe vindungo, nakweta ku vushwana vwa Vumwene vwa Pelesha.

²¹ Ngecivene, vyoshe vyendekele Shukulu Kalunga muli Njelemiya muka-kwimanena vyalingiwile ngwendi, “Lifuti likapwa ngundu a myaka makumi atanu na avali, kwana simbu ku Litangwa Lyakuhwima, lije kuvanyungile.”

Siluse Ashika vaYunda veluke

²² Mu mwaka wakulivanga omo Siluse wapwile mwene wa Pelesha, Shukulu Kalunga walingisile vije vyendekele muli Njelemiya muka-kwimanena ngeci vipwe vya vushunga. Shukulu Kalunga walingisile Mwene Siluse kusoneka lishiko nakulituma ngeci valilave nakulitambeka kwoshe-ikwoshe mu vumwene vwendi ngwavo,

²³ “Eli likelyo lishiko lya Siluse, mwene wa Pelesha. Shukulu Kalunga, Njambi wa Mwilu, ikeye nanjipwisa muka-kushwana kaye koshe, co nanjana moko yakumutungila Njuvo mu Yelusalema mu Yunda. Ngecivene, ololo, yeni voshe vaje vanapu vanu va Njambi, yeniko, co Shukulu Kalunga Njambi yeni akale amo neni.”