2 Mizimbu 34 - Livulu lya Shukulu Kalunga

Mwene Yosiya wa mu Yunda

¹ Yosiya wakele na myaka itanu na itatu omo wapwile mwene wa mu Yunda, co washwanene mu Yelusalema myaka makumi atatu na mwaka umo.

² Yosiya walingile vije vyavwaelelesele Shukulu Kalunga, co watembunwinine kukulwila yendi Mwene Ndaviti, wononokele mashiko oshe a Njambi.

Yosiya alwisa kulemesa kwa vaka-kujeneka kukulaela

³ Mu mwaka wamucitanu na itatu wakushwana kwa Yosiya, omo wapwile mukwenje, washangumukile kulemesa Njambi ya kukulwila yendi Mwene Ndaviti. Co omo kwetile myaka iwana, washangumukile kusiwula mitambela vakele nakulemesela vaka-kujeneka kukulaela, na vifwa vya Ashela njambi wa munakazi, na tumponya tukwavo twoshe.

⁴ Akushika kwendi, vanu vasiwile mitula ivalemeselele Mbale, na mitula ya insense. Co vatwile vunga vifwa vya Ashela, na tumponya tukwavo twoshe, asinoni vakuvile lije lito a vimbumbo vya vanu vaje vakele nakuvakombelela.

⁵ Asinoni wenyekele vitsiya vya vaka-kukombelela va vaka-kujeneka kukulaela a mitula aje avalemeselele. Co wajelesele mu Yunda na mu Yelusalema.

⁶ Co walingile cuma cimolika mu vinganda vya Manase, na Efalime, na Simyoni, nakweta ku kunto ku vinganda vya Nafetali.

⁷ Mu lifuti lyoshe lya Vumwene vwa ku Kunto wasiwile mitula na vifwa vya Ashela, co watwile tumponya vunga, wapujwile mitula yoshe ya insense mu vimbazuvwila, asinoni welukile ku Yelusalema.

Livulu lya Mashiko valiwana

⁸ Mu mwaka wamulikumi na itanu na itatu wakushwana kwendi, omo wamanesele kujelesa lifuti na Njuvo ya Shukulu Kalunga, Mwene Yosiya watumine vanalume vatatu vakavwaese Njuvo ya Shukulu Kalunga Njambi, mazina avo, Shafane muna Azaliya na Maseya nguvulu wa mu Yelusalema, na mwata wakama Njowa muna Yowahaze.

⁹ Co vimbongo vije vivakungulwile vaLevi vaka-kunyunga ku vikolo vavyanene kuli Hilikiya Muka-kukombelela Wakama. (Vimbongo evi vavitambwile kuli vanu va ku Efalime na Manase, na ku vanu va ku Vumwene vwa ku Kunto, na ku vanu va mu Yunda na Mbenjemani na ku vanu va mu Yelusalema.)

¹⁰ Co vimbongo evi vavyanene kuli vakulunu vatatu vaje vakele na moko yakuvwaesa Njuvo ya Shukulu Kalunga, co vakevo lalo vavyanene kuli

¹¹ vaka-kushonga na vaka-kutunga, ngeci valande mamanya na mavaya akupangesa vipangi vyakuvwaesa vinjuvo vivaviisile vimyene va mu Yunda.

¹² Ava vanu vapangele cipangi eci na vimbunge vyavo vyoshe. Vavatwamenenene kuli vaLevi vawana mazina avo, Njahate na Ovandiya va ku cikota ca Melali, Zekaliya na Meshulame va ku cikota ca Kohate. (Co vaLevi voshe vapwile vaka-kusungika kukwimba.)

¹³ VaLevi vakwavo vakele na vipangi vyakututa vivala nakutwamenena vanu mu vipangi vyakuliseza-seza, co vakwavo vapwile vaka-kusoneka, vamo vapwile vaka-kunyunga ku vikolo.

¹⁴ Omo vakele nakutundisa vimbongo mu njuvo yakuvitulikila, Hilikiya wawanene livulu lya Mashiko a Shukulu Kalunga, Mashiko aje aanene Njambi kuli Mosesa.

¹⁵ Co wendekele kuli Shafane ngwendi, “Njinawana livulu lya Mashiko mu Njuvo ya Shukulu Kalunga.” Hilikiya waanene Shafane livulu,

¹⁶ co Shafane walitwalele kuli mwene. Shafane walekele mwene ngwendi, “Tunalingi vyuma vyoshe vije viwatushikile.

¹⁷ Tunanono vimbongo vije vivatulikile mu Njuvo ya Shukulu Kalunga, co tunavyana kuli vaka-kupanga na kuli vaka-kuvatwamenena.”

¹⁸ Asinoni Shafane walekele mwene ngwendi, “Livulu eli lyananjana Hilikiya.” Co walilavelele mwene kutambekela.

¹⁹ Omo mwene wazivile vije valavele mu livulu lya Mashiko, watavwile vuzalo vwendi mukuviilila,

²⁰ co mwene waanene lishiko kuli Hilikiya na kuli Ahikame muna Shafane na kuli Avendone muna Mikaya na kuli Shafane muka-kusoneka wa mu mbanja na kuli Asaya katumwa ka mwene ngwendi,

²¹ “Yeni mukanjihwileko kuli Shukulu Kalunga nakwihwilako vanu ava vanasala mu Isalele na mu Yunda a vilongesa evi vili mu livulu eli livanawana. Shukulu Kalunga naluvala netu omwo vakukulwila vetu kuvasele kulinga vije vivasonekele mu livulu eli.”

²² Co a lishiko lya mwene, Hilikiya na vakwavo vaile nakwihula kuli Hulunda, muka-kwimanena wa munakazi wakele ku mutambela wamucivali ku Yelusalema. (Lizina lya munalume wendi lyapwile Shalume, muna Tikeva mutekulu wa Halehase, ikeye wakele nakunyunga vuzalo vwa mu Njuvo ya Shukulu Kalunga.) Co vamulekele vije vyalingiwile,

²³ ngecivene, wavalekele veluke kuli mwene, vakamuleke

²⁴ ngeci Shukulu Kalunga nendeka majwi awa ngwendi, “Njikanyanyamesa Yelusalema na vanu vamwo voshe, ngwe muvanasoneka mu livulu lije livanalavela mwene.

²⁵ Vakevo vananjivyana, co vanakombelela vin̄ombelo ku vinjambi veka, vanashangumuna vukalu vwange a vyuma vivanalingi. Vukalu vwange vunakatuka kulwisa Yelusalema, co kunjikavututumwisa embwe.

²⁶ Nameme vene ali mwene, Shukulu Kalunga Njambi ya Isalele nendeka ngwendi wazivi mwamuvwa vije vivanasoneka mu livulu,

²⁷ co watengulukile na kulikeesa ku mesho ange, watavwile vuzalo vwove nakulila, omo wazivile muje njalishungwiiye kunyanyamesa Yelusalema na vanu vamwo. Njinazivile lilombelo lyove,

²⁸ co cihiso eci njinashakele kunena a Yelusalema kucikaija kuvanga munima ya kutsa kwove. Njikakutava ngeci ukatse mu kwoloka.” Co vaje vanu velwisile awa majwi kuli Mwene Yosiya.

Yosiya alikumiiya cikumiiyo cakwononoka Shukulu Kalunga

²⁹ Mwene Yosiya wasanene vantwama voshe va mu Yunda na mu Yelusalema,

³⁰ voshe vaile amo ku Njuvo ya Shukulu Kalunga, amo na vaka-kukombelela na vaLevi na vanu voshe vaka-kufuka na tuutu. Co mwene wemanene kulutwe lwavo voshe, walavele kutambekela majwi oshe a mu livulu lya cikumiiyo lije livawanene mu Njuvo ya Shukulu Kalunga.

³¹ Co mwene wemanene kumukulo wa manda ya vumwene, walikumiiye na Shukulu Kalunga cikumiiyo cakumwononoka, nakunyunga mashiko endi nakushika kwawo na mbunge yendi yoshe, na mwonyo wendi woshe, nakukavangeya majwi a cikumiiyo ngwe muje muvawasonekele mu livulu.

³² Walingisile vanu va Mbenjemani na vanu voshe vakele mu Yelusalema kunyunga cikumiiyo. Ngecivene, vanu va mu Yelusalema vononokele cikumiiyo cije valingile na Njambi ya vakukulwila vavo.

³³ Co Mwene Yosiya wapujwile tumponya twoshe twa vunyengwe tuje twakele mu lifuti tuje twapwile twa vanu va Isalele, mukuyoya kwendi kwoshe, washakele vanu vapangele lika Shukulu Kalunga, Njambi ya vakukulwila vavo.