2 Mizimbu 33 - Livulu lya Shukulu Kalunga

Mwene Manase wa mu Yunda

¹ Manase wakele na myaka likumi na ivali omo wapwile mwene wa mu Yunda, washwanene mu Yelusalema myaka makumi atanu na itanu.

² Manase walingile vuvi ku mesho a Shukulu Kalunga akukavangeya vilinga vyavivi vya miyati ije yaashekele Shukulu Kalunga mu lifuti omo vanu vendi vakele nakuya kulutwe.

³ Ikeye watungulwile mitambela ije vakele nakulemesela vaka-kujeneka kukulaela ije yanyongesele ishe Hezekiya. Watungile mitula yakulemesela Mbale, co walingile vifwa vya Ashela njambi wa munakazi, co walemesele vingongonosi.

⁴ Watungile mitula ya vaka-kujeneka kukulaela mu Njuvo ya Shukulu Kalunga, mwela uje watumbwile Shukulu Kalunga ngwendi kukekwo kuvakamulemesela myaka yoshe.

⁵ Co mu vimbanja vivali vya mu Njuvo ya Shukulu Kalunga watungililemo mitula yakulemesela vingongonosi.

⁶ Ikeye wakombelelele vana vendi va vanalume mu Cana ca Hinome kupwa n̄ombelo ya kwenyeka. Co wataele vingombo na manseno nakwihula vaka-kulukiya na vaje vaka-kwendeka na vakulu. Ngecivene, walingile vuvi vwakama manene ku mesho a Shukulu Kalunga, co washangumwine vukalu vwendi.

⁷ Ikeye waakele cifwa ca Ashela njambi wa munakazi mu Njuvo ya Shukulu Kalunga, mwela uje watumbwile Njambi kuli Ndaviti na kuli munendi Solomoni ngwendi, “Muno mu Yelusalema, mu Njuvo eyi vene, ukewo mwela unjinalyangwila mu lifuti lyoshe ku miyati likumi na ivali ya Isalele kupwa mwela wakunjilemesela.

⁸ Co nga vanu va Isalele vononoka kushika kwange nakunyunga Mashiko oshe aje avaanene ngamba yange Mosesa, co kunjikatava ngeci vavasheke mu lifuti lije linjanene vakukulwila vavo.”

⁹ Manase watwamenenene vanu va mu Yunda mu kulinga vuvi vwakama manene kutuvakana vuvi vuje vuvalingile miyati ije yaashekele Shukulu Kalunga mu lifuti omo vanu vendi vakele nakuya kulutwe.

Kutenguluka kwa Manase

¹⁰ Nameme Shukulu Kalunga wanangwile Manase na vanu vendi, oloni vakevo kuvamutolililile.

¹¹ Ngecivene, Shukulu Kalunga watavele vamyata vaka-kushika mbunga ya mashwalale vaAsilya ngeci valwise Yunda. Co vafungulwile Manase, vamukovelesele tulovo, co vamukutile malyenge, vamutwalele ku Mbambilone.

¹² Co omo wakele nakuyanda, walambelelele Shukulu Kalunga Njambi yendi, co walikeesele ku mesho a Shukulu Kalunga Njambi ya vakukulwila vendi ngeci amukwase.

¹³ Co Njambi watavele lilombelo lya Manase, wamutavele eluke lalo ku Yelusalema nakushwana. Co aje vene Manase wazivukile ngeci kuma Shukulu Kalunga ikeye Njambi.

¹⁴ Munima ya vyuma evi, Manase watungulwile civumbe ca anja ku mutambela wa mu ngangela mu Nganda ya Ndaviti, kushangumukila ku shongo ya cana kuyehi na muna ndonga Ngihone ku kunto ya Cikolo ca Visi na mu mutambela wa nganda ya Ofele. Co waakele lalo muka-kushika vimunga vya mashwalale mu vinganda vyoshe vya vimpaka vya mu Yunda.

¹⁵ Co watundisile mu Njuvo ya Shukulu Kalunga vinjambi veka na cifwa cije caakelemo, na mitula ya vaka-kujeneka kukulaela ije yakele a malundu aje emanene Njuvo ya Shukulu Kalunga na mu mitambela ikwavo ya mu Yelusalema, watwalele vyuma vyoshe evi anja ya nganda, wavyumbilile kuti.

¹⁶ Co lalo watungulwile mutula wa Shukulu Kalunga, wakombeleleleo milambu ya kulitombola na milambu ya cikandelela. Washikile vanu voshe va mu Yunda valemese Shukulu Kalunga, Njambi ya Isalele.

¹⁷ Nameme vanu vakele nakukombelela vin̄ombelo ku mitambela ikwavo yakulemesela, oloni vavikombelelele lika kuli Shukulu Kalunga.

Kumaneselela kwa vushwana vwa Manase

¹⁸ Vyuma vyoshe vije vyalingile Manase, na lilombelo lyalombelele kuli Njambi yendi, na majwi a vaka-kwimanena vaje vendekele kuli ikeye mu lizina lya Shukulu Kalunga, Njambi ya Isalele, vyoshe vavisoneka mu Livulu lya Mizimbu ya Vimyene va mu Isalele.

¹⁹ Lilombelo lya mwene nakukumbulula kwa Njambi, vuvi vuje vwalingile omo kanda atenguluke, na vyuma vyavivi vije vyalingile, na mitambela ije vakele nakulemesela vaka-kujeneka kukulaela, na vifwa vya Ashela njambi wa munakazi vije vyalingile, na tumponya tuje twalemesele, vyoshe vavisoneka mu Livulu lya Mizimbu ya Vaka-kwimanena.

²⁰ Manase watsile, co vamutsindile ku lipela, co munendi Amoni wamushwanene kupwa mwene.

Mwene Amoni wa mu Yunda

²¹ Amoni wakele na myaka makumi avali na ivali omo wapwile mwene wa mu Yunda, co washwanene mu Yelusalema myaka ivali.

²² Walingile vuvi ku mesho a Shukulu Kalunga ngwe mwalingile ishe Manase, co walemesele tumponya tuje twalemesele ishe.

²³ Oloni ikeye kalikeesele ku mesho a Shukulu Kalunga, ngwe mwalikeesele ishe Manase, oloni ikeye wahyanene kulinga vuvi kutuvakana vuje vwalingile ishe.

²⁴ Vamyata va Amoni vamukele munga yakumulwisa, co vamutsiilile mu lipela.

²⁵ Vanu va mu Yunda vatsiile vaje vatsiile Amoni, co vapwisile munendi Yosiya mwene.