2 Mizimbu 31 - Livulu lya Shukulu Kalunga

Hezekiya akolesa yoyesi ya vuNjambi

¹ Omo vamanesele ciwano, vanu voshe va Isalele vaile ku nganda na nganda ya mu Yunda nakushimbula vimanda vya mamanya, vavatozwele vifwa vya Ashela njambi wa munakazi, co vasiwile mitula na mitambela ije vakele nakulemesela vaka-kujeneka kukulaela. Co valingile cuma eci mu mitambela yoshe ya mu Yunda, na mu mafuti a Mbenjemani na Efalime na Manase, asinoni voshe velukile ku membo avo.

² Co Mwene Hezekiya wakolesele lalo vipangi vya vaka-kukombelela na vaLevi, ngwe ku vipangi vya munu na munu. Evi vyapwile kukombelela vin̄ombelo vya kwenyeka na milambu ya kulitombola, na milambu ya cikandelela nakupanga mu Njuvo ya Shukulu Kalunga.

³ Co mwene waanene vya ku vufuko vwendi ngeci vipwe milambu ya kwenyeka ku mutondo na cingwezi a litangwa na litangwa na milambu ya kwenyeka a Litangwa Lyakuhwima, na a Ciwano ca Kutenama kwa Ngonde, na a viwano vije vishakiwa ngwe ku Mashiko a Shukulu Kalunga.

⁴ Co mwene walekele vanu vaje vakele mu Yelusalema vanene vin̄ombelo vije vyakundamene kuli vaka-kukombelela na vaLevi, ngeci vaane ku vije vishakiwa ngwe ku Lishiko lya Shukulu Kalunga.

⁵ Vwasi-vwasi omo vazivile lishiko eli, co vanu va Isalele vanenele vwana vwavo vwa vimbuto vyavivwa na vinyu na mazi a olive na vuki na vimbuto vikwavo vije valimine, co vanenele lalo cavulikumi ku vyuma vyoshe vije vakele navyo.

⁶ Co vanu voshe vaje vakele mu vinganda vya mu Yunda vanenele cavulikumi ca ku vingombe vavo, na vimanga, co lalo vanenele vyuma vyavingi manene vya vwana vuje vuvakundikile kuli Shukulu Kalunga Njambi yavo.

⁷ Vashangumukile kukungulula vwana mu ngonde yamucitatu, vakele nakukungulula noo ngonde yamucitanu na vivali.

⁸ Omo Mwene Hezekiya na vamyata vendi vamwene vungi vwa vyuma vije vivaanene, co vashangazalele Shukulu Kalunga nakushangazala vanu vendi va Isalele.

⁹ Co mwene wendekele kuli vaka-kukombelela na vaLevi a vwana vuje,

¹⁰ co Azaliya Muka-kukombelela Wakama, mutekulwila wa Zandoke, wendekele kuli ikeye ngwendi, “Tunde aje vanu vashangumukile kunena vwana vwavo ku Njuvo ya Shukulu Kalunga, tulinakulya mwamuvwa nakukuta, co vyavingi lalo vinasalao. Shukulu Kalunga navezikisa vanu vendi.”

¹¹ Hezekiya washikile ngeci vavwaese milili yakutulikila ije yakele mu Njuvo ya Shukulu Kalunga,

¹² co vaakelemo vwana vwoshe na cavulikumi ngeci vavinyungilemo. Co vaangwile kaLevi umo lizina lyendi Konaniya ikeye wapwile mukulunu wakuvinyunga, co ndolome yendi Shimei wapwile wakumwata.

¹³ Co vaangwile vaLevi likumi ngeci vavakwase, mazina avo, Njehiyele, na Azaziya, na Nahate, na Ashahele, na Njelimote, na Yozavande, na Elyele, na Isemakiya, na Mahate, na Mbenaya. Co vyoshe evi vyalingiwile mu nzili ya Mwene Hezekiya na Azaliya Muka-kukombelela Wakama.

¹⁴ Co Kole muna Imena, kaLevi ikeye wapwile muka-kunyunga ku Cikolo ca mu Ngangela ku Njuvo ya Shukulu Kalunga, ikeye wapwile mukulunu wakumona milambu ije ivaanene kuli Shukulu Kalunga nakuyipangazela.

¹⁵ Co mwisi yendi mwakele Endeni na Miniyamine, na Njeshuwa, na Shemaya na Amaliya na Shekaniya. Vavaangwile ngeci vapangezele vyakulya vavushoko vwavo vaLevi mu ngila yaivwa ngwe ku vipangi vyavo,

¹⁶ oloni kesi a vikota embwe. Vaanene litambelo kuli vanalume voshe vaje vakele na myaka makumi atatu nambe kutuvakana vaje vakele nakupanga a litangwa na litangwa mu Njuvo ya Shukulu Kalunga ngwe ku myela yavo.

¹⁷ Co vaka-kukombelela vavaanene vipangi vyavo ngwe ku vikota vyavo, vaLevi vaje vakele na myaka makumi avali nambe kutuvakana vavaanene vipangi mu vimbunga vyavo.

¹⁸ Co voshe vavasonekele amo na vanakazi vavo, na vana vavo va vanalume, na ava va vanakazi, na vavushoko vwavo, omwo vavashakele ngeci valivwaesele kupanga vipangi vyavo vyakujela a simbu yoshe-iyoshe.

¹⁹ Co mu membo oshe aje akundamene ku vatekulwila va Alone na mu mahya mwoshe mwakulila vimuna vaangwilemo vanalume, co vavasonekele mazina avo ngeci vaane vyakulya kuli vanalume voshe va mu naanga ya vaka-kukombelela na kuli munu woshe uje ivasonekelele ku cikota ca Levi.

²⁰ Mwene Hezekiya walingile vyavivwa mu lifuti lya Yunda mwoshe vije vyavwaelelesele Shukulu Kalunga Njambi yendi.

²¹ Vipangi vyoshe vyapangele vya ku Njuvo ya Shukulu Kalunga na vije vyalingile ngwe ku Mashiko na vizilika, mukushaka Njambi yendi, wavilingile na mbunge yendi yoshe, co wavezikile.