2 Mizimbu 3 - Livulu lya Shukulu Kalunga

¹ Mwene Ndaviti, ishe ya Solomoni, wavwaeselele cimweja mwela wakutungila Njuvo ya Shukulu Kalunga. Mwela wakele mu Yelusalema, ku Munkinda wa Moliya, kuje Shukulu Kalunga walisholwele kuli Ndaviti ku lijungwilo lya Alauna kaNjevushi. Co Mwene Solomoni washangumukile kutunga Njuvo ya Shukulu Kalunga

² mu ngonde yamucivali mu mwaka wamuciwana wakushwana kwendi.

³ Njuvo ya Shukulu Kalunga yatungile Mwene Solomoni yapwile mamita makumi avali na mamita atanu na avali mu vulaja, na mamita atanu na awana mu vwihi.

⁴ Co mulili wakukovelela wapwile amo na Njuvo ya Shukulu Kalunga, wapwile mamita atanu na awana, akamwa wapwile mamita makumi atanu na awana. Co vivumbe vya mukati vavisalimbisile na ngolinde yaivwa.

⁵ Mulili wakama vaufwikile na mavaya a kendale, vausalimbisile na ngolinde yaivwa, vacakeyeyemo vimweso vya miti ya mashakavale na malyenge.

⁶ Co mwene wacakeyeye mu Njuvo ya Shukulu Kalunga mamanya amavwa a seo yakama, na ngolinde ya ku lifuti lya Palevaime.

⁷ Wapangesele ngolinde mukusalimbisa vivumbe vya Njuvo ya Shukulu Kalunga na mashoko na vipamba na mapito. Co a vivumbe vacokweleo vimweso vya vakelumbi va mambava.

⁸ Mulili wa mukati, uvatumbwile Mwela Wakujela Manene, wapwile mamita atanu na awana mu vulaja, na mamita atanu na awana mu vwihi, seteko imolika na Njuvo ya Shukulu Kalunga. Co vapangesele ngolinde yakutuvakana vulemu makumi avali mukusalimbisa vivumbe vya Mwela Wakujela Manene.

⁹ Co ngolinde yakupwa mangilamu 570 vaipangesele mukulinga vimbambo, co milili lalo ya akamwa vaisalimbisile na ngolinde.

¹⁰ Co mwene washikile lalo vaka-kupanga vendi ngeci vapange vakelumbi vavali va mambava na vutale, vavafwikile na ngolinde, co vavaakele mu Mwela Wakujela Manene.

¹¹ Co vulaja vwa mambava a vakelumbi vwapwile mamita 2.2. Limbava lya kelumbi umo lyapwile mamita atanu na awana lyakwatele a civumbe ca mulili, co limbava likwavo lyapwile mamita atanu na awana kutunda a limbava lya kelumbi umo kweta a limbava lya kelumbi mukwavo.

¹² Co limbava lya kelumbi umo lyapwile mamita 2.2 lyakwatele a mbango ya mulili, co limbava lyendi likwavo lyakwatele ku limbava lya kelumbi mukwavo.

¹³ Mambava a vaje vakelumbi ajanjavalele, apwile mamita atanu na awana. Vemanene a mendi avo, co mesho avo akengele ku mulili.

¹⁴ Co livamba lya ku Mwela Wakujela Manene valitungile na linyu na vinanga vikwavo, vavilombele mu musumbele wakuzivuluka na wakuvenguluka na wakuvenga, co vavicakeyeye na vimweso vya vakelumbi va mambava.

Vimanda vivali vya vunengu

¹⁵ Mwene wapangele vimanda vivali, imo na imo yapwile mamita likumi na atanu na litambelo mu vulaja, co vavishimbikile kulutwe lwa Njuvo ya Shukulu Kalunga. Imo na imo yakele na mutwe wakupwa mamita 2.2 mu vulaja.

¹⁶ Co akamwa ya vimanda vashoveyeyeo malyenge akuvinda na mapomingilanete a vunengu akupwa 100.

¹⁷ Co vije vimanda vavishimbikile kumukulo na kumukulo wa cikolo ca Njuvo ya Shukulu Kalunga, manda imo ya mu mbwela vaitumbwile ngwavo Njakine, co ikwavo lalo ya ku kunto vaitumbwile ngwavo Mbowasi.