2 Mizimbu 29 - Livulu lya Shukulu Kalunga

Mwene Hezekiya wa mu Yunda

¹ Hezekiya wapwile mwene wa mu Yunda omo wakele na myaka makumi avali na itanu, co washwanene mu Yelusalema myaka makumi avali na itanu na iwana. Vaina vapwile Aviya, muna Zekaliya.

² Wakavangeyeye vilinga vya kukulwila yendi Mwene Ndaviti, walingile vije vyavwaelelesele Shukulu Kalunga.

Kujelesa Njuvo ya Shukulu Kalunga

³ Mu ngonde yakulivanga ku mwaka omo Hezekiya wapwile mwene, co washokolwele vikolo vya Njuvo ya Shukulu Kalunga nakuvivwaesa.

⁴ Wakungulwile vaka-kukombelela na vaLevi mu cipango ca mu ngangela ya Njuvo ya Shukulu Kalunga,

⁵ wendekele kuli vakevo ngwendi, “Yeni vaLevi munapande kulijelesa ngeci mujelese Njuvo ya Shukulu Kalunga, Njambi ya vakukulwila veni. Tundiseni vyuma vyoshe vije vijwalesa ku Njuvo ya Shukulu Kalunga.

⁶ Vakukulwila vetu kuvakulaelele kuli Shukulu Kalunga Njambi yetu, oloni valingile vyavivi ku mesho endi. Vamusezele nakukengesa nima ku mwela kuje kwakala.

⁷ Vashokele vikolo vya Njuvo ya Shukulu Kalunga, vazimine vindeya, co vonwele kwenyeka insense nambe kukombelela vin̄ombelo vya kwenyeka mu Njuvo ya Shukulu Kalunga Njambi ya Isalele.

⁸ Omwo a cuma eci mukemwo Shukulu Kalunga naluvala na Yunda na Yelusalema, co cije calingile kuli vakevo cakasamesele nakuzivisa lyova munu woshe. Yeni mwazivuka mwamuvwa eci.

⁹ Vatatetu vavatsiilile mu nzita, co vanakazi vetu na vana vetu vanavatwala ku vunzinda.

¹⁰ “Co ololo njinayongola kulinga cikumiiyo na Shukulu Kalunga, Njambi ya Isalele, ngeci kesi atuluvalele lalo.

¹¹ Vana vange, kesi muungumuke embwe. Shukulu Kalunga namyangula ngeci mumwenyekele insense nakutwamenena vanu nakumulemesa.”

¹² VaLevi vakeleko ava. Va ku cikota ca Kohate vapwile, Mahate muna Amasai, na Njwele muna Azaliya. Va ku cikota ca Melali vapwile, Kishe muna Avendi, na Azaliya muna Njehalelele. Va ku cikota ca Ngeleshone vapwile, Yowahe muna Zimena, na Endeni muna Yowahe.

¹³ Va ku cikota ca Elizafane vapwile, Shimeli, na Njewele. Va ku cikota ca Asafe vapwile, Zekaliya, na Mataniya.

¹⁴ Va ku cikota ca Hemane vapwile, Njehwele, na Shimei. Va ku cikota ca Njendutune vapwile, Shemaya, na Uziyele.

¹⁵ Vanalume ava vakungulwile vavushoko vwavo vaLevi, co voshe valijelesele. Asinoni, ngwe mwavashikile mwene, vashangumukile kujelesa Njuvo ya Shukulu Kalunga ngwe ku lishiko lya Shukulu Kalunga.

¹⁶ Vaka-kukombelela vakovelele mu Njuvo ya Shukulu Kalunga nakuyijelesa, vatundisile vyuma vyoshe vije kuvyajelele mu cipango ca Njuvo ya Shukulu Kalunga. Co vaLevi vavituwisile vyoshe anja ya nganda, vavitwalelele ku cana ca Kindelone.

¹⁷ Vipangi vyashangumukile a litangwa lyakulivanga ku ngonde yakulivanga, co a litangwa lyamucitanu na atatu vamanesele vyoshe, amo na cikolo cakukovelela ku Njuvo ya Shukulu Kalunga. Asinoni vapangele lalo matangwa akwavo atanu na atatu, noo vetele ku ngonde yamulikumi na vitanu na imo, vakele nakuvwaesa Njuvo ya Shukulu Kalunga ngeci valemeselemo.

Vakundika lalo Njuvo ya Shukulu Kalunga

¹⁸ Co vaLevi vambulwile muzimbu kuli Mwene Hezekiya ngwavo, “Tunamanesa kujelesa Njuvo ya Shukulu Kalunga yoshe na mutula wa milambu ya kwenyeka na mesa yakwaka makende akujela na vivala vyavyo vyoshe.

¹⁹ Co twanena lalo vivala vyoshe vije vyambatele Mwene Ahaze a simbu ije yajenekele kukulaela kuli Njambi, tunavivwaesa nakuvijelesa lalo. Vyoshe vili kuyehi na mutula wa Shukulu Kalunga.”

²⁰ Ngecivene, Mwene Hezekiya wakatukile mutondo-tondo, wakungulwile vantwama va mu nganda, voshe vaile ku Njuvo ya Shukulu Kalunga.

²¹ Vanenele vingombe va nkomba vatanu na vavali, na majamba a vimanga vatanu na vavali, na vana va vimanga vatanu na vavali, na majamba a vimembe vatanu na vavali, kupwa n̄ombelo yakutundisa vuvi vwa vaka-naanga ya vumwene na vanu va mu Yunda, nakujelesa Njuvo ya Shukulu Kalunga. Co mwene walekele vaka-kukombelela vatekulwila va Alone vakombelelele vin̄ombelo evi a mutula.

²² Co akulivanga vaka-kukombelela vatsiile vingombe va nkomba, asinoni vimanga, asinoni vana va vimanga, co vashamwinine maninga a n̄ombelo imo na imo a mutula.

²³ Akukotoka vanenele majamba a vimembe kuli mwene na ku mbunga ya vanu voshe vakungulukilile kuje, co vakambekele mavoko avo a majamba a vimembe.

²⁴ Asinoni vaka-kukombelela vatsiile majamba a vimembe, co vetilile maninga avo a mutula kupwa n̄ombelo ya a vuvi vwa vanu voshe, omwo mwene washikile ngeci vin̄ombelo vya kwenyeka, na vin̄ombelo vya a vuvi vipwe vya vaIsalele voshe.

²⁵ Co mwene wakavangeyeye vilongesa vije vyaanene Shukulu Kalunga kuli Mwene Ndaviti ali Ngande, muka-kwimanena wa mwene, na ali Natane muka-kwimanena, co ikeye waakele vaLevi mu Njuvo ya Shukulu Kalunga, na tulyalya, na vingenjo,

²⁶ vaLevi vemanene na visanzi ngwe vije vyapangesele Mwene Ndaviti. Co vaka-kukombelela lalo vemanene kuje na malupembo.

²⁷ Hezekiya washikile kukombelela n̄ombelo ya kwenyeka a mutula, omo vashangumukile kukombelela n̄ombelo ya kwenyeka, co vanu vembile myaso yakushangazala Shukulu Kalunga, co vaka-kwimba vashangumukile kwimba malupembo na visanzi, na vyuma vyeka vyakwimbisa.

²⁸ Vanu voshe vakungulukilile kuje vakele amo nakulemesa, co vaka-kwimba vakele nakwimba visanzi noo vin̄ombelo vya kwenyeka vyahwile.

²⁹ Asinoni Mwene Hezekiya na vanu voshe vatsikamene a mavuli nakulemesa Njambi.

³⁰ Co mwene na vantwama valekele vaLevi kwimbila Shukulu Kalunga myaso yakumushangazala ije yasonekele Ndaviti na Asafe muka-kwimanena. Ngecivene, munu na munu wembile nakujolela manene omo vatsikamene a mavuli nakulemesa Njambi.

³¹ Hezekiya wendekele kuli vanu ngwendi, “Ololo munajele, neneni vin̄ombelo vipwe mulambu wacikandelela kuli Shukulu Kalunga.” Co vononokele, co vamo valyanene vanenele vimuna vakukombelela kupwa vin̄ombelo vya kwenyeka.

³² Co vanenele vingombe va nkomba makumi atanu na avali, na majamba a vimanga akupwa 100, na vana va vimanga vakupwa 200 nakuvakombelela kupwa vin̄ombelo vya kwenyeka kuli Shukulu Kalunga.

³³ Co lalo vanenele vingombe va nkomba vakupwa 600, na majamba a vimanga akupwa 3,000 kupwa vin̄ombelo ngeci vanu valye.

³⁴ Vaka-kukombelela vapwile vavandondo ngeci vatsiye vimuna voshe ava, co vaLevi vavakwasele noo vamanesele vipangi. Co a simbu ije vaka-kukombelela vavangi valijelesele. (VaLevi vapwile va kulongwa mu vimbunge mukulijelesa kutuvakana vaka-kukombelela.)

³⁵ Kuwezelela ku vin̄ombelo vya kwenyeka vyoshe vyamutunu, vaka-kukombelela vakele na moko ya kwenyeka mazi a situ yakukombelela ije valile vanu, na milambu ya vinyu, ije vetilile a vin̄ombelo vya kwenyeka. Ngecivene, vanu vashangumukile lalo kulemesa mu Njuvo ya Shukulu Kalunga.

³⁶ Co Mwene Hezekiya amo na vanu vavwaelelele, omwo Njambi wavakwasele kulinga vyoshe evi mu vwasi.