2 Mizimbu 28 - Livulu lya Shukulu Kalunga

Mwene Ahaze wa mu Yunda

¹ Ahaze wapwile mwene omo wakele na myaka makumi avali, co washwanene mu Yelusalema myaka likumi na itanu na umo. Ikeye kakavangeyeye vilinga vyavivwa vya kukulwila yendi Mwene Ndaviti, oloni walingile vije kuvyavwaelelesele Shukulu Kalunga,

² co wakavangeyeye vingila vya vimyene va mu Isalele. Wafulile vifwa vya vutale vya Mbale,

³ co wenyekelele insense mu Cana ca Hinome, wakombelelele vana vendi va vanalume kupwa vin̄ombelo vyakwenyekela ku tumponya, mukutembunwina vilinga vya vunyengwe vivalingile vanu vaje vaashekele Shukulu Kalunga mu lifuti omo vaIsalele vakele nakuya kulutwe.

⁴ Oloni mitambela ije vakele nakulemesela vaje vaka-kujeneka kukulaela, a malundu na mu minzinze yoshe ya miti yakutonola, Ahaze lalo nendi wakele nakukombelelako vin̄ombelo vya kwenyeka na kwenyekelako insense.

Nzita ya Silya na Isalele

⁵ Omwo Mwene Ahaze walingile vuvi, co Shukulu Kalunga Njambi yendi wamukundikile ku mavoko a mwene wa ku Silya ngeci amufungulule nakwambata vaYunda vavangi nakuvatwala ku Ndamasiku kupwa vinzinda. Co lalo Shukulu Kalunga wamukundikile mu mavoko a mwene wa vaIsalele.

⁶ Peka muna Lemaliya, wafungulwile Ahaze, co watsiile mashwalale vakupwa 120,000 vakusimpa va vaYunda mu litangwa limo. Shukulu Kalunga, Njambi ya vakukulwila vavo watavele ngeci eci cilingiwe, omwo vanu va mu Yunda vamuvyanene.

⁷ Lishwalale umo wa kaIsalele lizina lyendi Zikeli watsiile muna Mwene Ahaze lizina lyendi Maseya, na mukulunu wa mu lipela lizina lyendi Azelikame na Elekana uje wapwile wamucivali kuli muka-kushika wa mwene.

⁸ Nameme vaYunda vapwile vavushoko vwavo, oloni mashwalale va vaIsalele vafungulwile vanakazi na vanike vakupwa 200,000 kupwa vinzinda, co vavatwalele ku Samaliya, na vyuma vyavingi vyakupukula.

Ondende muka-kwimanena

⁹ Munalume umo lizina lyendi Ondende muka-kwimanena wa Shukulu Kalunga, wakele mu nganda ya Samaliya. Waliwanene na mashwalale va vaIsalele valinakwiluka na vinzinda vavo va vaYunda. Omo vakele nakukovela mu nganda, co wendekele kuli vakevo ngwendi, “Shukulu Kalunga Njambi ya vakukulwila veni naluvala na Yunda ngeci navakundika ku mavoko eni, oloni nazivi kukaluka kweni mumunavatsiilamo.

¹⁰ Co ololo munayongola kupwisa vanalume na vanakazi va mu Yelusalema na mu Yunda vindungo veni. Kuma yeni kumwazivukile ngeci neni lalo munalingi vuvi ku mesho a Shukulu Kalunga Njambi yeni ndi?

¹¹ Ngecivene, njitolilileni! Ava vinzinda vanapu vandolome veni na vandokazi veni. Veceleni vaye, kutewa Shukulu Kalunga akamihisa na vukalu vwendi.”

¹² Vantwama vawana va vanalume va ku Vumwene vwa ku Kunto, mazina avo, Azaliya muna Njehohanane, na Mbelekiya muna Meshilemote, na Njehizekiya muna Shalume, na Amasa muna Handalai navo lalo vapopolwele vilinga vya mashwalale.

¹³ Vendekele ngwavo, “Kesi muvanene kuno ovo vinzinda! Yetu tunalingi laja vuvi ku mesho a Shukulu Kalunga, co tunamuluvalesa ngeci atuhise. Co ololo mushaka lalo kuwezelela ku mulonga wetu.”

¹⁴ Ngecivene, mashwalale velwisile vinzinda na vufuko vuvapukwile kuli vanu na vantwama vavo,

¹⁵ co vaje vanalume vawana vavaangwile ngeci vaane vuzalo vuje vuvapukwile. Vavaanene vuzalo na vin̄aku ngeci vazale, co vavaanene lalo vyakulya na vyakunwa, vavasatele mazi a olive a vimbandu vyavo. Vaje kuvakele na nzili yakwenda vavaakele a vimulu ngeci vendeleo, co vinzinda voshe vavelwisile ku lifuti lya vaYunda ku Yeliko, nganda ya mashakaVaLe Asinoni vaIsalele velukile kwimbo lyavo ku Samaliya.

Ahaze alomba Asilya kumukwasa

¹⁶ Mu mwaka uje vene, Mwene Ahaze watumine vanu kuli Tingelate Pilesele, mwene wa Asilya ngeci amukwase.

¹⁷ Omwo vaEndome vashangumukile lalo kulwisa vaYunda nakufungulula vinzinda vavangi.

¹⁸ A simbu ije vene vaFilisitiya vakele nakulwisa vinganda vya mu lifuti lya ku vushelumukilo vwa malundu mu kangombe ka yambi na mu mbwela ya lifuti lya Yunda. Vafungulwile vinganda vya Mbete Shemeshe, na Ainjalone, na Ngendelote, na vinganda vya Soko, na Timuna, na Ngimezo amo na membo avyo, co vatungile muje myaka yoshe.

¹⁹ Shukulu Kalunga wakeesele lifuti lya Yunda omwo Mwene Ahaze walingile mwamuvi, co wavulumwine manene kuli Shukulu Kalunga.

²⁰ Co mwene wa vaAsilya, kakwasele Ahave, oloni wamupopolwele nakumukovelesa mu vukalu.

²¹ Ngecivene, Ahaze wanonele ngolinde ya mu Njuvo ya Shukulu Kalunga, neyi ya mu lipela, neyi ya mu membo a vantwama va vanu, co wayanene kuli mwene wa Asilya, nameme walingile ngeci, oloni kucamukwasele embwe.

Vivi vya Ahaze

²² Omo tuyando twendi twaamene manene, uje munalume Ahaze wavulumwine manene ku mesho a Shukulu Kalunga.

²³ Wakombelelele vin̄ombelo ku vinjambi va vaSilya, vaje vamufungulwile. Wendekele ngwendi, “Vinjambi va vaSilya vakwasele vimyene vaSilya, ngecivene, nga njikombelela kuli vakevo, amo vakanjikwasa.” Oloni eci canenele vukalu vwakama ali ikeye na a lifuti lyendi.

²⁴ Co lalo Ahave wambatele vivala vyoshe vya mu Njuvo ya Shukulu Kalunga, co wavitetangele-tetangele. Washokele Njuvo ya Shukulu Kalunga nakutunga mitula mu mitambela yoshe ya Yelusalema.

²⁵ Mu vinganda vyoshe na membo oshe a mu Yunda watungililemo mitambela ije vakele nakulemesela vaje vaka-kujeneka kukulaela, co kuje wenyekeleleko insense ku vinjambi veka. Mu ngila eyi vene walikokelele vukalu vwa Shukulu Kalunga, Njambi ya vakukulwila vendi.

²⁶ Vilinga vyendi vyeka vyoshe vyakushwana kwendi, kutunda kukushangumukila kutwala ku shongo, vavisoneka muLivulu lya Mizimbu ya Vimyene va mu Yunda na mu Isalele.

²⁷ Mwene Ahave watsile, co vamutsindile mu Yelusalema, oloni kesi mu vimbumbo vya vumwene embwe. Co munendi Hezekiya wamushwanene kupwa mwene.