2 Mizimbu 27 - Livulu lya Shukulu Kalunga

Yotame Mwene wa mu Yunda

¹ Yotame wakele na myaka makumi avali na itanu omo wapwile mwene, washwanene mu Yelusalema myaka likumi na itanu na umo. Vaina vapwile Yelusha, muna Zandoke.

² Ikeye walingile vije vyavwaelelesele Shukulu Kalunga, ngwe mwalingile ishe Uziya, oloni kalingile vuvi vwakwenyekela insense mu Njuvo ya Shukulu Kalunga. Oloni nameme ngoco, vanu anga vakele nakulinga vuvi.

³ Yotame ikeye watungile Cikolo ca ku Kunto ca ku Njuvo ya Shukulu Kalunga, co watungilileko lalo cipango ca Ofele.

⁴ Co watungile vinganda mu lifuti lya minkinda lya Yunda, co mu shwata watungililemo vimpaka na tuposhi.

⁵ Walwile na mwene wa vaAmoni na mashwalale vendi, co wavafungulwile. Co wasindiiye vaAmoni vamulambwile a myaka itatu, makilo a siliva akupwa 3,400, na vulemu vwa tiliku vwakupwa 1,000, na mitonga ya mbale ya maumwa yakupwa 1,000.

⁶ Ngecivene, Yotame wakele na nzili omwo wakulaelele nakwononoka Shukulu Kalunga Njambi yendi.

⁷ Vilinga vikwavo vyakushwana kwa Yotame, na vinzita vyendi, na mashiko endi, vyoshe vavisoneka mu Livulu lya Mizimbu ya Vimyene va mu Isalele na mu Yunda.

⁸ Yotame wakele na myaka makumi avali na itanu omo wapwile mwene, co washwanene mu Yelusalema myaka likumi na itanu na umo.

⁹ Watsile, co vamutsindile mu Nganda ya Ndaviti, co munendi Ahaze wamushwanene kupwa mwene.