2 Mizimbu 26 - Livulu lya Shukulu Kalunga

Mwene Uziya wa mu Yunda

¹ Vanu voshe va mu Yunda vaangwile Uziya muna Amaziya uje wakele na myaka likumi na itanu na umo omo wapwile mwene.

² (Omo ishe Amaziya watsile, Uziya wafungulwile nganda ya Elata, co wayitungulwile.)

³ Uziya wapwile mwene omo wakele na myaka likumi na myaka itanu na umo, washwanene mu Yelusalema myaka makumi atanu na ivali. Lizina lya vaina lyapwile Yekoliya wa ku Yelusalema.

⁴ Akukavangeya vilinga vya ishe, co ikeye walingile vije vyavwaelelesele Shukulu Kalunga.

⁵ Uziya wapangelele Shukulu Kalunga na kulongwa a matangwa ayoyele Zekaliya uje wamulongesele vya vuNjambi, co Njambi wamuvezikisile.

⁶ Uziya waile ku nzita nakulwisa vaFilisitiya. Wasiwile vivumbe vya vinganda vya Ngate na Njaminiya na Ashendonde, co watungile vinganda vya vimpaka kuyehi na Ashendonde na mu lifuti lyoshe lya Filisitiya.

⁷ Co Njambi wamukwasele kufungulula vaFilisitiya, na vaAlavya vaje vakele ku Ngulembale na vaMeuni.

⁸ VaAmoni valambwile mulambu kuli Uziya, co wakele na nzili manene, lutsimo lwendi lwetele ku Ingito.

⁹ Uziya watungile vimpaka vyakukola mu Yelusalema, co watungile tuposhi ku Mbango ya Cikolo na ku Cikolo ca ku Cana, kuje kucatengulukilile civumbe.

¹⁰ Watungile lalo vimpaka vya tuposhi mushandangala yangoco, wacokwele masima amangi, omwo wakele na matanga amangi a vimuna mu lifuti lya ku vushelumukilo vwa malundu mu kangombe ka yambi na mu vyana. Omwo wazemene kulima, co watakamesele vanu ngeci valime mahya a mikolovozi ya vushuka vwa vinyu mu lifuti lya malundu nakulima livu lya vwilo.

¹¹ Uziya wakele na mashwalale vavangi vakulwa nzita. Muzimbu wa vaka-kulwa vendi vautulikile kuli vaka-kusoneka vendi, Njeyele na Maseya vavatwamenenene kuli Hananiya, wa ku munga ya mwene.

¹² Co vamyata vaka-kushika nzita vapwile 2,600.

¹³ Co mwisi yavo mwakele mashwalale vakupwa 307,500, vaje vasele kulwila mwamuvwa mwene ku vitozi vendi.

¹⁴ Uziya waanene mashwalale vintelo, na makunga, na vitepa vya vikuvo vya nzita na tuzaku twa vikuvo twa nzita na mata a lusipa na mikili, na mamanya akwashesa mu cipapa ca kenya.

¹⁵ Co mu Yelusalema vanu vendi vaka-vutongwe vafulile vikuvo vyakwashesa nakumbila mamanya akama kutunda ku tuposhi na ku vimbango vya civumbe ca nganda. Co lutsimo lwendi lwaile kulyala, wapwile muka-nzili manene omwo Njambi wamukwasele.

Uziya vamuhisa omwo kulyalesa kwendi

¹⁶ Oloni omo Mwene Uziya wakele na nzili, co washangumukile kulyalesa, eci cikeco camunenesele kuwa kwendi. Washawile Shukulu Kalunga Njambi yendi akukovela mu Njuvo ya Shukulu Kalunga nakwenyekela insense a mutula wa insense.

¹⁷ Co Azaliya muka-kukombelela, amo na vaka-kwimanena va nzili vakusimpa vakupwa makumi atanu na atatu vakavele mwene munima.

¹⁸ Vamuvindikile, co vamulekele ngwavo, “Ove Uziya! Yove kuwesi na moko yakwenyekela insense Shukulu Kalunga. Kuvanga vaka-kukombelela lika vaje vakutunda kuli Alone vaje vavajelesa laja vakevo vanapande kulinga evi. Tunda mu mwela ou wakujela. Unavulumuna kuli Shukulu Kalunga Njambi, co kuukawana lalo vivezikiso vyendi.”

¹⁹ Uziya wemanene mu Njuvo ya Shukulu Kalunga kumukulo wa mutula wa insense, oku nakwata cikango cakwenyekela insense. Waluvalele na vaka-kukombelela, co vwasi-vwasi mushongo wa mbumba watuukile ku cihanga cendi.

²⁰ Co Azaliya na vakwavo vaka-kukombelela vakengele a luholo lwa mwene, co valikomokelele manene, vamutuwisile vwasi mu Njuvo ya Shukulu Kalunga. Co nendi watuukilemo vwasi, omwo Shukulu Kalunga wamuhisile.

²¹ Co kutunda aje vene Mwene Uziya wapwile muka-mbumba mukuyoya kwendi kwoshe. Co kasele lalo kukovela mu Njuvo ya Shukulu Kalunga, oloni wakele mu njuvo yendi endi lika, co wecelele vipangi vyoshe, oloni munendi Yotame washwanene lifuti.

²² Co Isaya muka-kwimanena muna Amoze wasonekele vyuma vyoshe vikwavo vije vyalingile Mwene Uziya a simbu yakushwana kwendi.

²³ Uziya watsile, vamutsindile kuyehi na vakukulwila vendi, oloni omwo mushongo wendi, kuvamutsindile mu vimbumbo vya vumwene. Co munendi Yotame wamushwanene kupwa mwene.