2 Mizimbu 25 - Livulu lya Shukulu Kalunga

Mwene Amaziya wa mu Yunda

¹ Amaziya wapwile mwene omo wakele na myaka makumi avali na myaka itanu, washwanene mu Yelusalema myaka makumi avali na myaka itanu na iwana, vaina vapwile Njehoyandine wa ku Yelusalema.

² Walingile vije vyavwaelelesele Shukulu Kalunga, oloni kavilingile na mbunge yendi yoshe embwe.

³ Omo vumwene vwa Amaziya vwakolele na nzili, co watsiile vamyata vaje vatsiile ishe.

⁴ Nameme ngoco, katsiile vana vavo, oloni wakavele vije vyashikile Shukulu Kalunga mu Lishiko lya Mosesa ngwendi, “Visemi kuvapandele kutsila milonga ije ivanalingi vana vavo embwe, na vana lalo kuvapandele kutsila milonga ije ivanalingi visemi vavo embwe, oloni munu napande kutsila mulonga wanalingi ikeye vavenya.”

Nzita yakulwisa Endome

⁵ Mwene Amaziya wakungulwile vanalume voshe va muyati wa Yunda na Mbenjemani, wavaangunwine mu vimbunga vya vushwalale, ngwe ku vikota vyavo, co waakele vamyata ngeci vashike vimbunga vya vanalume vakupwa 1,000, na vimbunga vikwavo vya vanalume vakupwa 100. Eci capwile kupandakanako vanalume voshe vaje vakele na myaka makumi avali nambe kutuvakana, voshe vapwile 300,000. Vapwile mashwalale vakwanguka, vaje valivwaeselele cimweja kulwa nzita, vazivukile kulwisa makunga na vintelo.

⁶ Co lalo wakumwine mashwalale vakupwa 100,000 va ku Isalele na ndando ya siliva ya makilo akupwa 3,400.

⁷ Oloni muka-kwimanena waile kuli mwene wamulekele ngwendi, “Kesi uye na ava mashwalale va Isalele. Shukulu Kalunga kesi amolika na vanu ava va ku Vumwene vwa ku Kunto.

⁸ Yove wayongola ngeci amo vakakukwasa mu nzita, oloni Njambi ikeye ali na nzili yakukuhyanesa nambe yakukufungulula, co ikeye akatava ngeci vitozi veni vamifungulule.”

⁹ Amaziya wehwile muka-kwimanena ngwendi, “Vationi a siliva ije injinavafwete laja?” Muka-kwimanena wamukumbulwile ngwendi, “Shukulu Kalunga akakwilwisila vyavingi kutuvakana vije!”

¹⁰ Ngecivene, Amaziya welwisile ije mbunga ya mashwalale vakumwine, wavalekele ngeci veluke ku membo avo. Co velukile ku membo avo, oloni valuvalele manene na vanu va mu Yunda.

¹¹ Amaziya wasimpile, co watwamenenene mashwalale vendi ku Cana ca Mwongwa. Valwililile kuje, co vatsiile mashwalale va vaEndome vakupwa 10,000,

¹² co vafungulwile lalo vakwavo vakupwa 10,000. Co vatwalele vaje vinzinda akamwa ya lilundu ku nganda ya Sela, vavombilile asi a mamanya, co voshe vasanyozokele sanyu-sanyu.

¹³ Co a simbu ije mashwalale va vaIsalele vaje kuvaile na Amaziya ku nzita valwisile vinganda vya vaYunda mukati ka Samaliya na Mbete Holone, vatsiile vanalume vakupwa 3,000, co vapukwile vufuko vwavungi manene.

¹⁴ Omo Amaziya welukile nakufungulula vaEndome, wezile amo na tumponya twavo, co watushimbikile nakutulemesa, nakwenyekelako insense.

¹⁵ Eci caluvalesele Shukulu Kalunga, ngecivene, watumine muka-kwimanena kuli Amaziya. Co uje muka-kwimanena wamwihwile ngwendi, “Omwo vika ulemesela vinjambi veka vaje kuvasa nameme kwamena myonyo ya vanu vavo ku mavoko eni?”

¹⁶ Amaziya wamukumbulwile ngwendi, “Simbu ika twakwangwile kupwa muka-kunangula mwene? Oloka kuluu, ngeci kesi vakutsiye!” Co uje muka-kwimanena walikelele, oloni wendekele ngwendi, “Ololo njazivuka ngeci Njambi nayongola kukunyongesa omwo unalingi vyoshe evi, co unombwanesa kunangula kwange.”

Nzita yakulwisa Isalele

¹⁷ Mwene Amaziya wa mu Yunda na vaka-kumunangula vakele munga yakulwisa Isalele. Co watumine lijwi kuli Mwene Yehowashe wa mu Isalele, uje wapwile muna Yehoahaze mutekulu wa Yehu, nakumushongangeya ngeci valwe nzita.

¹⁸ Co Yehowashe watumine lijwi kuli Amaziya ngwendi, “A simbu imo muti wa mambimbo uje wakele a Minkinda ya Lembanone, watumine lijwi ku muti wa kendale ngwawo, ‘Tava munove ngeci amwambate munange.’ Co kwezile kasitu wa mu shwata wakulyatangelele uje muti wa mambimbo.

¹⁹ Nove lalo Amaziya, ulinakulishasha ngeci unafungulula vaEndome, oloni njikunangula ukale kwimbo lyove. Omwo vikajo ulishakela n̄ole ije ikanena tuyando ali yove na ali vanu vove?”

²⁰ Oloni Amaziya wavyanene kumutolilila. Omwo eci capwile cizango ca Njambi ngeci amukundike mu mavoko a vitozi vendi, omwo ikeye walemesele tumponya twa vaEndome.

²¹ Ngecivene, Mwene Yehowashe wa mu Isalele waile ku nzita, co walwisile Mwene Amaziya wa mu Yunda. Co valwililile ku Mbete Shemeshe mu Yunda,

²² mashwalale va vaYunda vavafungulwile, co vatewelele ku membo avo.

²³ Co Yehowashe wakwatele Amaziya wamutwalele ku Yelusalema. Wasiwile civumbe ca nganda ya Yelusalema kutunda ku Cikolo ca Efalime nakweta ku Cikolo ca ku Mbango, nunda ya mamita akupwa 200.

²⁴ Co watwalele ku Samaliya ngolinde na siliva yoshe na vyoshe vije vyawanene mu Njuvo ya Shukulu Kalunga, co wambatele lalo vivala vya mu Njuvo ya Shukulu Kalunga, vije vivanyungile vatekulwila va Ovende Endome, na vufuko vwa mu lipela. Co lalo waile amo na vinzinda.

²⁵ Mwene Amaziya wa mu Yunda wayoyele myaka likumi na itanu omo Mwene Yehowashe wa mu Isalele natsi laja.

²⁶ Co vilinga vikwavo vyeka vije vyalingile Amaziya kutunda kukushangumuka kutwala ku shongo yakushwana kwendi vavisoneka muLivulu lya Mizimbu ya Vimyene va mu Yunda na mu Isalele.

²⁷ Tunde a simbu ije Amaziya watengulukile nakuseza Shukulu Kalunga, kwakele munga yakumulwisa mu Yelusalema. Co akukotoka watewelele ku nganda ya Lakishe, oloni vitozi vendi vamukavele, co vakamutsiilile kuje.

²⁸ Muvila wendi vautwalele ku Yelusalema a cimulu, co vamutsindile mu vimbumbo vya vumwene mu nganda ya Ndaviti.