2 Mizimbu 24 - Livulu lya Shukulu Kalunga

Mwene Yowashe wa mu Yunda

¹ Yowashe wakele na myaka itanu na myaka ivali omo wapwile mwene wa mu Yunda, washwanene mu Yelusalema myaka makumi awana. Lizina lya vaina lyapwile Zimbiya wa ku nganda ya Mbeleshemba.

² Yowashe walingile vije vyavwaelelesele Shukulu Kalunga, a matangwa oshe akuyoya kwa Yehoyanda muka-kukombelela.

³ Yehoyanda waangwilile Mwene Yowashe vanakazi vavali, co vakitile vana va vanalume na ava va vanakazi.

⁴ Omo Yowashe wakele a vumwene kasimbu, wayongwele kutungulula Njuvo ya Shukulu Kalunga.

⁵ Co wasanene vaka-kukombelela na vaLevi wavalekele ngeci vaye ku vinganda vya mu Yunda nakutambula vimbongo vya a mwaka na mwaka kuli vaIsalele vyakutungulwisa Njuvo ya Shukulu Kalunga. Co wavalekele ngeci vazambule kulinga cuma eci, oloni vaLevi veshwalele,

⁶ ngecivene, mwene wasanene Yehoyanda ntwama yavo, wamwihwile ngwendi, “Omwo vikajo unecelela vaLevi kutumbama ngoco kujeneka kuya mu Yunda na mu Yelusalema ngeci vanu valambule mulambu ngwe muje mwashikile Mosesa, ngamba ya Shukulu Kalunga, mukukwasa ku Mbalaka Mwakuliwanena?”

⁷ (Omwo vana va Ataliya, uje munakazi wamuvi, vasiwile Njuvo ya Shukulu Kalunga, na vyuma vyoshe vyakujela vije vyakelemo vivakundikile kuli Shukulu Kalunga, co vavyanene mukulemesa Mbale.)

⁸ Co mwene walekele vaLevi vashonge cikasa cakulambwila vacitumbike ku cikolo ca Njuvo ya Shukulu Kalunga.

⁹ Co vatumine lijwi mu Yelusalema mwoshe na mu Yunda kuli munu na munu alambule mulambu kuli Shukulu Kalunga ngwe uje walivangele kutambula Mosesa, ngamba ya Njambi, mu mambo.

¹⁰ Co vantwama na vanu voshe valambwile vimbongo mu cikasa, co cashulile.

¹¹ A litangwa na litangwa vaLevi vatwalele cikasa kuli mwata ikeye wacinyungile. Omo vamwene ngeci cinashulu, co muka-kusoneka wa mwene na muka-kwimanena na Muka-kukombelela Wakama vezile nakutundisa vimbongo mu cikasa, co vaciilwisile lalo mu mwela waco. Ngecivene, vakungulwile vimbongo vyavingi manene.

¹² Mwene na Yehoyanda vaanene vije vimbongo kuli vaje vakele nakuvwaesa ku Njuvo ya Shukulu Kalunga, co vakumwine vaka-kutavula mamanya, na vaka-kupandeka vinjuvo, na vaka-vipangi vyakufula vutale ngeci vavwaese Njuvo ya Shukulu Kalunga.

¹³ Voshe vaka-vipangi vakele nakuundangana manene, co vatungulwile Njuvo ya Shukulu Kalunga ngwe muje muyafwile akulivanga, yapwile yakukola.

¹⁴ Omo vamanesele kuyivwaesa, co vanenele ngolinde na siliva vije vyasaleleo kuli mwene na kuli Yehoyanda, vakevo vaipangesele kulinga malonga na vivala vikwavo vya mu Njuvo ya Shukulu Kalunga. Omo Yehoyanda wakele nakuyoya, vakele nakukombelela vin̄ombelo ku Njuvo ya Shukulu Kalunga a simbu na simbu.

Viyongola vya Yehoyanda vavitengulula

¹⁵ Omo Yehoyanda wakuluvalele kweta ku myaka yakupwa 130, co watsile.

¹⁶ Vamutsindile mu vimbumbo vya vumwene mu Nganda ya Ndaviti kwanuka vipangi vije vyalingile kuli vanu va Isalele na kuli Njambi na vya a Njuvo ya Shukulu Kalunga.

¹⁷ Oloni omo Yehoyanda natsi laja, co vantwama va mu Yunda vasindiiye Mwene Yowashe ngeci atolilile kuli vakevo.

¹⁸ Ngecivene, vanu valikelele kulemesela mu Njuvo ya Shukulu Kalunga, Njambi ya vakukulwila vavo, vashangumukile kulemesa tumponya, na vifwa vya Ashela njambi wa munakazi. Co vukalu vwa Shukulu Kalunga vwezile a Yunda na a Yelusalema omwo a vuvi ovu.

¹⁹ Shukulu Kalunga wavatuminine vaka-kwimanena kuvanangula ngeci veluke kuli ikeye, oloni vanu vavyanene kuvatolilila.

²⁰ Co Munzinzime wa Njambi wakovelele muli Zekaliya muna Yehoyanda muka-kukombelela. Wemanene akamwa ku mesho a vanu voshe nakuvaleka ngwendi, “Shukulu Kalunga Njambi nehula ngwendi omwo vika kumwononokela mashiko endi, co munalikokela n̄avava yeni vavenya? Yeni munamuseza, ngeci nendi lalo namiseza!”

²¹ Co Mwene Yowashe walipandakanene mu vutumbe vwakulwisa Zekaliya, a lishiko lya mwene vanu vashele mamanya Zekaliya mu cipango ca Njuvo ya Shukulu Kalunga.

²² Mwene wevalele ngozi yamulingilile Yehoyanda ishe ya Zekaliya, co watsiile Zekaliya. Omo Zekaliya wakele muyehi na kutsa, watambekele ngwendi, “Shukulu Kalunga amone eci ciwulinakulinga, nove lalo akunyanyamese!”

Kuhwa kwa vushwana vwa Yowashe

²³ Co capwile ngeci kukuhwa kwa mwaka, mashwalale va Silya valwisile Yunda na Yelusalema, vanyongesele vantwama voshe, vambatele vufuko vwavungi vuvapukwile, co vavutwalele ku Ndamasiku.

²⁴ Mashwalale va Silya vapwile vavandondo manene, oloni Shukulu Kalunga watavele ngeci vafungulule mashwalale vavangi va vaYunda omwo vanu vavyanene Shukulu Kalunga Njambi ya vakukulwila vavo. Mu ngila eyi mukemwo muvahisilile Mwene Yowashe.

²⁵ Yowashe wavetwele manene, omo vitozi vaile, vamyata vendi vavali vamukele munga yakumulwisa, co vamutsiilile mu mulili wendi, omwo ikeye Yowashe watsiile vana va Yehoyanda muka-kukombelela. Vamutsindile mu Nganda ya Ndaviti, oloni kesi mu vimbumbo vya vumwene.

²⁶ (Vaje vamukele munga yakumulwisa vapwile, Zavande, muna munakazi wa kaAmoni lizina lyendi Shimeya, na Yehozavande, muna munakazi wa kaMowavi lizina lyendi Shimeli.)

²⁷ Mu Livulu Lyakunungulula Vin̄anda vya Vimyene, mukemwo mutuwana vin̄anda vya vana va Yowashe, vuka-kwimanena vuvambulwile ali ikeye vwakumulwisa, na muje mwatungulwile Njuvo ya Shukulu Kalunga. Co munendi Amaziya wamushwanene kupwa mwene.