2 Mizimbu 23 - Livulu lya Shukulu Kalunga

Ataliya vamutengulukila nakumulwisa

¹ Mu mwaka wamucitanu na ivali, Yehoyanda muka-kukombelela wayongwele ngeci eyi ikeyo simbu yakulinga cimo. Walizivasanene na vamyata va mbunga ya mashwalale vatanu mazina avo, Azaliya muna Njelohame, na Ishimela muna Njehohanane, na Azaliya muna Ovende, na Maseya muna Andaya, na Elishafate muna Zikeli.

² Co vakevo vaitanganene ku vinganda vyoshe vya mu Yunda, vanenele vaLevi ku Yelusalema na vakulunu voshe va vikota vya Isalele.

³ Co voshe vakungulukilile mu Njuvo ya Shukulu Kalunga, valikumiiye cikumiiyo na muna mwene Yowashe. Yehoyanda wendekele kuli vakevo ngwendi, “Ou ikeye muna mwene. Ikeye apwa mwene ololo, ngwe vene muje mwendekele Shukulu Kalunga ali vatekulwila va Mwene Ndaviti ngeci cikalingiwa.

⁴ Eci cikeco cuma citukalinga. Omo vaka-kukombelela na vaLevi vakaija ku vipangi a Litangwa Lyakuhwima, litambelo lyamucitatu lya vamo veni vanyunge ku vikolo vya Njuvo ya Shukulu Kalunga,

⁵ na litambelo likwavo lyamucitatu vanyunge lipela, vaje voshe vakasalao vakatumbama ku Cikolo ca Luvula. Co vanu voshe vakakungulukila mu cipango ca ku Njuvo ya Shukulu Kalunga.

⁶ Kesi mukatave munu umo akakovela mu Njuvo ya Shukulu Kalunga kuvanga lika vaka-kukombelela, na vaLevi vaje vali a vipangi. Vakevo vakasa kukovelamo, omwo vapwa vakujela, oloni vanu voshe vanapande kwononoka mashiko a Shukulu Kalunga, co vakakale anja.

⁷ VaLevi vanapande kunyunga mwene na mikwale yakushomwena cimweja, co vakakale amo nendi kwoshe kuje kwaya. Munu woshe akeseka kukovela mu Njuvo ya Shukulu Kalunga munapande kumutsiya.”

⁸ Ngecivene, vaLevi na vanu va mu Yunda vanyungile mashiko aje avalekele Yehoyanda muka-kukombelela. Co munu na munu wanenele vanu vendi vaje vapandele kuhwima a Litangwa Lyakuhwima, na vaje vapandele kupanga a Litangwa Lyakuhwima.

⁹ Co Yehoyanda waanene vaje vamyata makunga, na vintelo vije vyapwile vya Mwene Ndaviti vije vivanyungilile mu Njuvo ya Shukulu Kalunga.

¹⁰ Co waakele vaje vanalume vakele na mikwale mu mitambela yoshe kuzengeleka Njuvo ya Shukulu Kalunga, nakunyunga mwene.

¹¹ Yehoyanda watwalele Yowashe anja, co wamuzikile cilongo ku mutwe, wamwanene livulu lya mashiko a vumwene. Co vamupwisile mwene. Ngecivene, Yehoyanda muka-kukombelela amo na vana vendi vavwavesele mazi Yowashe, co vanu voshe vatambekele ngwavo, “Mwene ayoye myaka yoshe!”

¹² Co Ataliya wazivile muyoyo wa vanu vakele nakutwila mwene tuwelele, ngecivene, washatukilile ku Njuvo ya Shukulu Kalunga, kuje kwakungulukilile mbunga ya vanu.

¹³ Co wamwene mwene wamuhwa nemana ku manda ya vumwene ku cikolo ca Njuvo ya Shukulu Kalunga, ngwe ku futisi yavo, co vamyata va mbunga ya mashwalale na vaka-kwimba malupembo vamuzengelekele. Co vanu voshe vatambekele nakujolela nakwimba malupembo, vaka-kwimba va mu Njuvo ya Shukulu Kalunga na vyakwimbisa vyavo vatwamenenene ciwano. Co Ataliya watavwile vuzalo vwendi mukuviilila, co watambekele ngwendi, “Vungungu! Vungungu!”

¹⁴ Yehoyanda kashakele ngeci Ataliya vamutsiile ku mutambela wa Njuvo ya Shukulu Kalunga embwe, ngecivene, washikile vamyata va mashwalale ngwendi, “Mutwaleni anja oku mumwitisa mukati ka mikana ya vaka-kunyunga, co woshe amwamena mutsiyeni.”

¹⁵ Vamukwatele, co vamutwalele ku lipela, co vamutsiilile ku Cikolo ca Tuvalu.

Yehoyanda atengulula vyuma

¹⁶ Co Yehoyanda muka-kukombelela walikumiiye cikumiiyo na Mwene Yowashe amo na vanu voshe ngeci vapwe vanu va Shukulu Kalunga.

¹⁷ Asinoni vanu voshe vaile ku njuvo ya Mbale nakuyisiwula. Co vashandwele mitula na tumponya, vatsiile Matane muka-kukombelela wa Mbale kulutwe lwa mitula.

¹⁸ Yehoyanda waangwile vaka-kukombelela na vaLevi kupwa vakulunu va vipangi vya ku Njuvo ya Shukulu Kalunga. Vakevo vapangele vipangi vije vyavanene Mwene Ndaviti, nakukombelela vin̄ombelo vya kwenyeka kuli Shukulu Kalunga ngwe ku mashiko a Mosesa. Co lalo vapwile vakulunu vakukenga a myaso na a viwano.

¹⁹ Yehoyanda waangwile lalo vaka-vipangi vyakunyunga ku vikolo vya Njuvo ya Shukulu Kalunga ngeci vaje kuvajelele kesi vakovelemo.

²⁰ Co vamyata va mbunga ya mashwalale, na vanu va vulemu, na vamyata, na vanu voshe valipandakanene na Yehoyanda kusindikiya mwene kutunda ku Njuvo ya Shukulu Kalunga kuya ku lipela. Co vakovelelele ku cikolo cakama, vatumbikile mwene a litanda.

²¹ Vanu voshe vavwaelelele, co mu nganda mwolokele kuluu, omwo Ataliya vanamutsii laja.