2 Mizimbu 21 - Livulu lya Shukulu Kalunga

¹ Njosefati watsile, co vamutsindile mu vimbumbo vya vumwene mu Nganda ya Ndaviti, co munendi Njeholame wamushwanene kupwa mwene.

Mwene Njeholame wa mu Yunda

² Njeholame muna Mwene Njosefati wa mu Yunda wakele na vandolome vendi vatanu na umo, mazina avo, Azaliya, na Njehiyele, na Zekaliya, na Azalyahu, na Mikaele, na Shefatiya.

³ Ishavo wavanene vwana vwavungi vwa ngolinde, na vwa siliva, na vufuko vwa seo, co wapwisile umo na umo muka-kushika nganda ya cimpaka ya mu Yunda. Oloni omwo Njeholame wapwile ntwatwa ya Njosefati, co wamupwisile shwana yendi.

⁴ Omo Njeholame washwanene, co watsiile vishongo vendi voshe, amo na vamyata vamo va vaIsalele.

⁵ Njeholame wapwile mwene omo wakele na myaka makumi atatu na myaka ivali, washwanene mu Yelusalema myaka itanu na itatu.

⁶ Wakavangeyeye vilinga vya Mwene Ahave na vimyene vakwavo va Isalele, omwo wambatele muna Ahave. Co walingile vuvi ku mesho a Shukulu Kalunga,

⁷ oloni Shukulu Kalunga katavele kunyongesa vumwene vwa Ndaviti embwe, omwo walingile laja cikumiiyo na ngamba yendi Ndaviti ngeci vatekulwila vendi vakashwana simbu yoshe.

⁸ Omo Njeholame washwanene, vaEndome vatengulukilile Yunda, valyangwilile mwene yavo.

⁹ Ngecivene, Njeholame na vamyata vendi vaile nakulwa na vaEndome. Co mbunga ya mashwalale vaEndome vavazengelekele, oloni a simbu ya vutsiki Njeholame na vamyata vendi vatewele.

¹⁰ VaEndome na lelo lino valimanena kutunda ku Yunda. A simbu ije lalo vanu va mu Limbena navo lalo valimanenene, co valyangwilile mwene yavo, omwo Njeholame wasezele Shukulu Kalunga Njambi ya vakukulwila vendi.

¹¹ Co mu Yunda na mu mafuti a malundu watungililemo myela yakulemesela vinjambi va vaka-kujeneka kukulaela, co watwamenenene vanu va mu Yunda na vanu va mu Yelusalema kulinga vuvi ku mesho a Shukulu Kalunga.

¹² Elinja muka-kwimanena watumine mukanda kuli Njeholame ngwendi, “Shukulu Kalunga, Njambi ya kukulwila yove Ndaviti nakuhisa, omwo kuwakavele cimweso ca isho Mwene Njosefati, nambe cimweso ca kuku yove Mwene Asa.

¹³ Oloni unatembunwina vingila vya vimyene va Isalele, co unatwamenena vanu va mu Yunda na vanu va mu Yelusalema nakuvapwisa vaka-kujeneka kukulaela, ngwe mwalingile Ahave na naanga yendi vaje vatwamenenene Isalele kupwa vaka-kujeneka kukulaela. Co lalo unatsii vishongo vove, vakevo vapwile vanu vavavwa kutuvakana yove.

¹⁴ Co kenga, Shukulu Kalunga akahisa vanu vove, na vana vove, na vanakazi vove, co akanyongesa lalo vufuko vwove vwoshe.

¹⁵ Ngecivene, ukavinja manene mwimo, co mila yove ikavinja manene a litangwa na litangwa.”

¹⁶ Shukulu Kalunga washangumwine vimbunge vya vaFilisitiya, na vaAlambe vaje vakele kuyehi na vaSundane ku cikuma ca mema a kalunga, ngeci vakalwise Njeholame.

¹⁷ Vezile nakulwisa Yunda, co vapukwile vufuko vwoshe vuvawanene mu lipela, co vatwalele vunzinda mashano va mwene voshe na vana vendi voshe kuvanga Ahaziya, munendi wa mutinikila ikeye lika wasaleleo.

¹⁸ Omo vyoshe evi vyahwile, Shukulu Kalunga wakovelesele mushongo wauvi manene mu mila ya mwene.

¹⁹ Omo kwetile myaka ivali, mushongo wakulile manene, co akukotoka mwene watsile mu tuyando twakama. Vanu vendi kuvakele mu myala ngwe muvalingile ali vakukulwila vendi.

²⁰ Njeholame wapwile mwene omo wakele na myaka makumi atatu na myaka ivali, washwanene mu Yelusalema myaka itanu na itatu. Omo watsile, naumo wai wakele na vusiwa. Vamutsindile mu Nganda ya Ndaviti, oloni kesi mu vimbumbo vya vumwene embwe.