2 Mizimbu 19 - Livulu lya Shukulu Kalunga

Yehu muka-kwimanena aluvalesa Njosefati

¹ Mwene Njosefati wa mu Yunda welukile mwamuvwa ku lipela lyendi mu Yelusalema.

² Co Yehu muka-kwimanena, muna Hanani, waile kuli mwene Njosefati, wendekele kuli ikeye ngwendi, “Kuma yove unapande kukwasa vaka-vuvi nakuzema vaje vazinda Shukulu Kalunga ndi? Omwo unalingi eci vukalu vwa Shukulu Kalunga vuli ali yove.

³ Oloni nameme ngoco, vyavivwa vimo vavimwene muli yove. Omwo watundisile vifwa vyoshe vya Ashela njambi wa munakazi vije vivalemesele vanu, co uneseka kukava cizango ca Njambi.”

Njosefati atengulula vyuma

⁴ Mwene Njosefati wakele mu Yelusalema, visimbu vyavingi wendanganene mukati ka vanu, kutunda ku Mbeleshemba mu mbwela kweta na ku shongo ya lifuti lya malundu lya Efalime ku kunto, ngeci elwise vanu kuli Shukulu Kalunga, Njambi ya vakukulwila vavo.

⁵ Wemikile maako mu vinganda vya vimpaka mu nganda imo na imo ya mu Yunda,

⁶ wavashikile ngwendi, “Nyanyameni akwendeka omo musompa, omwo kumusompela vanu embwe, oloni musompela Shukulu Kalunga, co ikeye ali amo neni omo musompa n̄anda.

⁷ Singimikeni Shukulu Kalunga, sompeni mwamuvwa, omwo Shukulu Kalunga Njambi yetu kesi kutava makuli, nambe civembulu, nambe kutambula lizika-kanwa.”

⁸ Mu Yelusalema Njosefati waangwile vaLevi, na vaka-kukombelela, na vakulunu va mu naaga ya Isalele kupwa maako ngeci vaakwile milonga ya vaka-kujomboka Lishiko lya Shukulu Kalunga, nambe milonga ya akati ka vanu vaje vakele mu nganda.

⁹ Co wavashikile ngwendi, “Munapande kupanga vipangi vyeni nakusingimika Shukulu Kalunga, nakumwononoka mu vyuma vyoshe vimulinga.

¹⁰ Nga vavushoko vweni vatunda ku nganda ika nambe ika vanena n̄anda kuli yeni, nambe yakutsiya, nambe yakujomboka lishiko, nambe vizilika, munapande kuvalongesa mwamuvwa mwaya ngila ngeci kesi vakale na mulonga ku mesho a Shukulu Kalunga. Nga kumuvanangula, co vukalu vwa Shukulu Kalunga vukakala ali yeni na vavushoko vweni. Oloni nga muvanangula, co kumukakala na mulonga.

¹¹ Amaliya Muka-kukombelela Wakama ikeye akasompa vin̄anda vyoshe vya vuNjambi, co mwata wa mu Yunda Zevandiya muna Ishimela, nguvulu wa mu Yunda, ikeye akasompa vin̄anda vyoshe vya cisemwa. Co vaLevi vakevo vakamikwasa. Pweni vakusimpa, nyungeni vilongesa evi, co Shukulu Kalunga akale na vaje valinga vushunga!”