2 Mizimbu 16 - Livulu lya Shukulu Kalunga

Mwene Asa alizivasana na Mwene Mbenehandande wa Silya

¹ Mu mwaka wamumakumi atatu na itanu na umo wakushwana kwa Mwene Asa wa mu Yunda, Mwene Mbasha wa mu Isalele walwisile Yunda, co watungile cimpaka cakuzengeleka Lama, ngeci munu kesi atuuke nambe kukovela mu Yunda.

² Ngecivene, Asa wambatele siliva na ngolinde vije vyakele mu Njuvo ya Shukulu Kalunga na mu lipela, co wavitumine ku Ndamasiku, kuli Mwene Mbenehandande wa ku Silya, wendekele ngwendi,

³ “Tulikwate vusamba, ngwe muvalingile vatatetu. Eyi siliva na ngolinde vinapu vwana vwove. Co ololo ecela vusamba vwove na Mwene Mbasha wa mu Isalele, ngeci atundise mashwalale vendi mu lifuti lyange.”

⁴ Mbenehandande watavele ku viyongola vya Asa, co watumine vamyata vaka-kushika nzita yendi na mashwalale vavo kukalwisa vinganda vya Isalele. Vafungulwile Injone, na Ndani, na Avele Mbete Maka, na vinganda vyoshe vya Nafetali kuje kwakele vinjuvo vyakutulikila.

⁵ Omo Mwene Mbasha wazivile vije vyalingiwile, co walikelele kutunga cimpaka ku Lama, co wecelele vipangi vyendi.

⁶ Asinoni Mwene Asa wakungulwile vanalume va mu Yunda mwoshe wavalekele ngeci vatute mamanya na mavaya aje alikwasesele Mbasha ku Lama, co vawapangesele kutunga vimpaka vya vinganda vya Ngemba na Mizipa.

Hanani muka-kwimanena

⁷ A simbu ije vene Hanani muka-kwimanena waile kuli Mwene Asa wamulekele ngwendi, “Omwo wakulaelele kuli mwene wa Silya, kutuvakana kukulaela kuli Shukulu Kalunga Njambi yove, mukemwo nzita ya mwene wa ku Silya vanatewa.

⁸ Kuma vaSundane na vaLimbiya kuvakele na mashwalale vavangi na matemba amangi manene na vaka-kulonda a tuvalu ndi? Oloni omwo wakulaelele kuli Shukulu Kalunga, co wakuhyanesele.

⁹ Shukulu Kalunga akanyungu kaye koshe, ngeci amwese nzili vaje vanakulaela kuli ikeye na vimbunge vyavo vyoshe. Yove unalingi mwa vulema, cooni kutunda ku lelo nakutwala kulutwe simbu yoshe ukakala mu nzita.”

¹⁰ Co Asa waluvalele manene na muka-kwimanena, co wamushokele mu kamenga. Eyi ikeyo simbu ije Asa wayandesele vanu vamo na muuka.

Mamaneselelo akushwana kwa Asa

¹¹ Vilinga vyoshe vyakushwana kwa Asa kutunda kukushangumuka kweta nakukukotoka vavisoneka mu Livulu lya Mizimbu ya Vimyene va mu Yunda na mu Isalele.

¹² Mu mwaka wamumakumi atatu na iwana wakushwana kwendi, Asa wapwile cilema, wakele na mushongo wa mendi, oloni nameme ngoco katengulukilile kuli Shukulu Kalunga ngeci amukwase, oloni waile ku vimbanda.

¹³ Omo kwetile lika myaka ivali, watsile,

¹⁴ co vamutsindile mu mbumbo ya limanya ije yalicokwelele ikeye vavenya mu Nganda ya Ndaviti. Vavwaesele muvila wendi na n̄undu na mazi akunika lwengo lwaluvwa akumutsinda, co vakele mu myala nakumulila.